କାର୍‌ ସହ ଡ୍ରାଇଭରଙ୍କୁ ୨ କିଲୋମିଟର ଘୋଷାଡି ନେଲା ଟ୍ରକ, ଭିଡିଓ ଭାଇରାଲ

ବେଙ୍ଗାଲୁରୁ: କର୍ଣ୍ଣାଟକ ଉଡୁପିରୁ ବର୍ତ୍ତମାନ ସମୟରେ ଏକ ଭିଡିଓ ବେଶ୍ ଭାଇରାଲ ହେବାରେ ଲାଗିଛି  । ଗୋଟିଏ ଟ୍ରକ ଏକ କାରକୁ ପ୍ରାୟ ୨ କିଲୋମିଟର ଯାଏଁ ଘୋଷାଡି ନେଉଥିବାର ଭିଡିଓରେ ଦେଖାଯାଇଛି । ଏହି ସମୟରେ କାର୍‌ ଭିତରେ ଚାଳକ ମଧ୍ୟ ବସିଛନ୍ତି । ମିଳିଥିବା ସୂଚନା ଅନୁସାରେ, କାରଟି ସାଗର ଅଞ୍ଚଳରୁ ମାଙ୍ଗାଲୋର ଆଡକୁ ଯାଉଥିଲା  । ଏତିକି ବେଳେ କାର ଡ୍ରାଇଭର ଭାରସାମ୍ୟ ହରାଇ ଆଗରେ ଯାଉଥିବା ଏକ ଟ୍ରକକୁ ଧକ୍କା ଦେଇଥିଲେ । ଏହାପରେ କାରଟି ଟ୍ରକ୍‌ ତଳେ ଫସି ଯାଇଥିଲା  । ହେଲେ ଟ୍ରକ୍‌ ଡ୍ରାଇଭର ଏ ସମ୍ପର୍କରେ ଜାଣି ପାରିନଥିଲେ । ତେଣୁ ଗାଡ଼ି ଅଟକାଇବା ବଦଳରେ କାରକୁ ୨ କିଲୋମିଟର ଯାଏଁ ଘୋଷାଡ଼ି ନେଇଥିଲେ । ଏହାଦେଖି ସେହି ବାଟ ଦେଇଯାଉଥିବା ଅନ୍ୟ ଗାଡ଼ି ଚାଳକ ଟ୍ରକର ପିଛା କରି ଅଟକାଇବାକୁ ଚେଷ୍ଟା କରିଥିଲେ ।  ପୁରା ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ୨ କିଲୋମିଟର ପରେ ଟ୍ରକ ଅଟକିବା ପରେ କାର ଚାଳକ ବାହାରି ଥିଲେ । ତେବେ ତାଙ୍କର ବିଶେଷ କ୍ଷତି ହୋଇନଥିବା ସୂଚନା ମିଳିଛି ।