Watch: ଚୋରି କରିବାକୁ ଆସି ହଟହଟା ଚୋର, ମେଣ୍ଢାଙ୍କ ସହ କଟିଲା ରାତି

ନବରଙ୍ଗପୁର: ମେଣ୍ଢା ଚୋରି କରିବାକୁ ଯାଇ ହଟହଟା ହେଲେ ଚୋର । ରାତି ଅଧିଆ ଚୋରି କରିବାକୁ ଆସି ମେଣ୍ଢାଙ୍କ ସହ ରାତି ବିତାଇଲେ ଚୋର । ମେଣ୍ଢା ସହ ବନ୍ଧା ହେଲେ ଓ ଚପଲ ମାଳ ପିନ୍ଧିଲେ ତିନି ଯୁବକ । ସକାଳ ହେବା ମାତ୍ରେ ତିନି ଚୋରଙ୍କୁ ପୋଲିସ ଜିମା ଦେଲେ ଗ୍ରାମବାସୀ । ଏଭଳି ଘଟଣା ଘଟିଛି ନବରଙ୍ଗପୁର ଝରିଗାଁ ବ୍ଲକ ଉମରକୋଟ ଥାନା ଅନ୍ତର୍ଗତ ଗୋବରୀ ନୁଆଗୁଡ଼ା ଗ୍ରାମରେ। ତିନି ଯୁବକ ହେଉଛନ୍ତି ରାମ ହରିଜନ, ଦୁର୍ଜନ ହରିଜନ ଓ ଖଗପତି ହରିଜନ । ବୁଧବାର ବିଳମ୍ବିତ ରାତିରେ ପାଞ୍ଚ ଜଣ ମେଣ୍ଢା ଚୋର ନୂଆଗୁଡ଼ା ଗ୍ରାମରେ ପଶି ହିରଣ ଗଣ୍ଡ ଓ ରଘୁ ଗୌଡଙ୍କ ଘରରୁ ପାଞ୍ଚଟି ମେଣ୍ଢାକୁ ଅଖାରେ ଭର୍ତ୍ତି କରି ଦୁଇ ଜଣ ସହଯୋଗୀଙ୍କ ବାଇକରେ ବାନ୍ଧିଥିଲେ । ଏହାପରେ ଆହୁରି ଦୁଇଟି ମେଣ୍ଢାଙ୍କୁ ନେବାକୁ ଆସିଥିବା ବେଳେ ମେଣ୍ଢା ଚିତ୍କାର କରିଥିଲା।  ଏହା ଶୁଣିବା ପରେ ମେଣ୍ଢା ରଖିଥିବା ଘର ଲୋକେ ନିଦରୁ ଉଠିପଡ଼ି ଚୋର ତିନି ଜଣଙ୍କୁ କାବୁ କରିଥଲେ । ପରେ ତିନି ଜଣଙ୍କୁ ଚପଲ ମାଳ ପିନ୍ଧାଇବା ସହ ମେଣ୍ଢା ମାନଙ୍କ ସହ ବାନ୍ଧି ଗାଁ ଦାଣ୍ଡରେ ଅଟକ ରଖିଥିଲେ। ଉମରକୋଟ ପୋଲିସ ଘଟଣା ସ୍ଥଳରେ ପହଞ୍ଚି ତିନି ଚୋରଙ୍କୁ ଉଦ୍ଧାର କରିବା ସହ ଦୁଇଟି ବାଇକ ଜବତ କରିଛି । ଏହି ଘଟଣାର ଭିଡିଏ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।  

ଇଟିଭି ଭାରତ, ନବରଙ୍ଗପୁର