Firing in Marriage ceremony: ଗୁଳି ଚଳାଇ ବିଧାୟକଙ୍କ ପୁଅର ସେଲିବ୍ରେସନ, ଭିଡିଓ ଭାଇରାଲ

ରାୟପୁର: ଖୁସିର ମୁହୂର୍ତ୍ତକୁ ସେଲିବ୍ରେଟ୍‌ କରିବା ଲାଗି ଫୁଟିଲା ଗୁଳି । ଖୋଲା ଆକାଶରେ ଫାୟାରିଂ କରି ଖୁସି ମନାଇଲେ ରାଜସ୍ଥାନ କୁଶଲଗଡ଼ ବିଧାୟକ ରମିଲା ଖଡିୟାଙ୍କ ପୁଅ ରୋହିତ ଖଡିୟା । ବିଧାୟକଙ୍କ ପୁଅ ସହିତ ଆଉ ୨ଜଣ ଯୁବକଙ୍କ ମଧ୍ୟ ସାଥୀରେ ଫାୟାରିଂ କରିଥିବା ଭିଡିଓରେ ଦେଖିବାକୁ ମିଳିଛି । ଏକ ବିବାହ ଉତ୍ସବରେ ଏମାନେ ଏପରି ଗୁଳି ଫୁଟାଇଥିବା ବେଳେ ଏହାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ରୋହିତ ଖଡିୟା ୧୫ ସେକେଣ୍ଡ ଧରି କରିଥିବା ଫାୟାରିଂର ଭିଡିଓକୁ ନିଜ ସୋସିଆଲ ମିଡିଆ ଆକାଉଣ୍ଟରେ ମଧ୍ୟ ସେୟାର କରିଛନ୍ତି । ହେଲେ ଏହାକୁ ନେଇ ବିବାଦ ଉପୁଜିବା ପରେ ସେ ଏହାକୁ ନିଜ ଆକାଉଣ୍ଟରୁ ହଟାଇଛନ୍ତି । ବିଧାୟକଙ୍କ ପୁଅର ଏଭଳି ଆଚରଣକୁ ସାଧାରଣରେ ନିନ୍ଦା କରାଯାଇଛି । ଏପରି ଫାୟାରିଂ ଦ୍ବାରା କୌଣସି ଅଘଟଣ ଘଟିବାର ଆଶଙ୍କା କରି ଲୋକେ ଏନେଇ ଅସନ୍ତୋଷ ବ୍ୟକ୍ତ କରିଛନ୍ତି । ବିଧାୟକଙ୍କ ପୁଅ ରୋହିତ ଯୁବ କଂଗ୍ରେସର ଜିଲ୍ଲା ଉପସଭାପତି ଭାବେ ଦାୟତ୍ବରେ ଥିବା ମଧ୍ୟ ଜଣାପଡ଼ିଛି । ସେପଟେ ଏନେଇ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ ।