Train Accident: ମୃତକଙ୍କ ମଧ୍ୟରେ ପୁଅକୁ ଖୋଜୁଛି ବାପା, ନପାଇ ବାଚାଳ ପ୍ରାୟ

ବାଲେଶ୍ବର: ଜୀବିତଙ୍କ ମଧ୍ୟରେ ନୁହେଁ, କୁଢ କୁଢ ମୃତଦେହ ମଧ୍ୟରେ ପୁଅକୁ ଖୋଜୁଛି ବାପା । ଆଉ ପୁଅକୁ ନ ପାଇ ଯେପରି ସେ ବାଚାଳ ପ୍ରାୟ । ଚଟାଣରେ ପଡ଼ିଥିବା ଶହ ଶହ ମୃତକଙ୍କ ମଧ୍ୟରେ ପୁଅକୁ ଖୋଜି ବାପା ଅଧୈର୍ଯ୍ୟ ହୋଇପଡ଼ିଛି । 

କାହାକୁ କହିବ, କିଏ ତା' ପୁଅକୁ ଖୋଜି ଆଣିବ ? କାରଣ ଏଠାରେ ମୃତକଙ୍କ ସଂଖ୍ୟା ୧୦ କି ୨୦ ନୁହେଁ । ଶହ ଶହ ଅଜଣା ମୃତଦେହ ପଡ଼ି ରହିଛି । ସେହି ଅସହାୟ ବାପାର ଛାତିଫଟା କାନ୍ଦର ଦୃଶ୍ୟକୁ ଯିଏ ବି ଦେଖୁଛି ତାର ମନ ଆନ୍ଦୋଳିତ ହୋଇଉଠୁଛି । ପାଠ ପଢିବାକୁ ଯାଇଥିବା ପୁଅ କରମଣ୍ଡଳ ଏକ୍ସପ୍ରେସରେ ଘରକୁ ଫେରୁଥିଲା । 

ହେଲେ କରମଣ୍ଡଳ ପାଇଁ କାଳ ଦିନ ଶୁକ୍ରବାର ଘଟିଥିଲା ଭୟଙ୍କର ଦୁର୍ଘଟଣା ।  ଦୁର୍ଘଟଣା ଖବର ପାଇବା ପରେ ଭଦ୍ରକ ସୁଗର ଅସହାୟ ବାପା ନିଜ ନୟନପିତୁଳାକୁ ଖୋଜିବା ଲାଗି ବାଲେଶ୍ବର ଧାଇଁଛନ୍ତି ।  

ଇଟିଭି ଭାରତ, ବାଲେଶ୍ବର