AIର ଭବିଷ୍ୟତକୁ ନେଇ ହାତ ମିଶାଇଲେ ସମସ୍ତ ଦେଶ, ଭାରତର ରହିବ ଗୁରୁତ୍ବପୂର୍ଣ୍ଣ ଭୂମିକା

ନୂଆଦିଲ୍ଲୀ: ଦେଶର ରାଜଧାନୀ ନୂଆଦିଲ୍ଲୀରେ ଗତ 12 ତାରଖ ଠାରୁ ଗ୍ଲୋବାଲ ପାର୍ଟନରସିପ ଅନ ଆର୍ଟିଫିସିଆଲ ଇଣ୍ଟେଲିଜେନ୍ସର ଶିଖର ସମ୍ମିଳନୀ ଆୟୋଜିତ ହୋଇଥିବା ବେଳେ ଆଜି ଶେଷ ଦିନ ରହିଥିଲା । ଗତ 3 ଦିନ ଆର୍ଟିଫିସିଆଲ ଇଣ୍ଟେଲିଜେନ୍ସକୁ ନେଇ ଚାଲିଥିଲା ତର୍କବିତର୍କ ଏବଂ ଆଲୋଚନା । ତେବେ ଆଜିର ସମ୍ମିଳନୀ ଶେଷ ହେବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି କେନ୍ଦ୍ର ରାଷ୍ଟ୍ର ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର । ଏଆଇର ଭବିଷ୍ୟତ ନିର୍ଦ୍ଧାରିତ କରିବା ପାଇଁ ସମସ୍ତ ଦେଶ ମିଳିତ ଭାବେ କାର୍ଯ୍ୟ କରିବା ପାଇଁ ସହମତ ପ୍ରକାଶ କରିଥିବା ନେଇ ମନ୍ତ୍ରୀ କହିଛନ୍ତି ।  

ସେ ଆହୁରି ମଧ୍ୟ କହିଛନ୍ତି, "ଏଆଇର ଭବିଷ୍ୟତ ନିର୍ଣ୍ଣୟ କରିବା ସମସ୍ତ ଦେଶ ଏକାଠି ହେବା ଉଚିତ । ଏହା ନିଷ୍ପତ୍ତି କୌଣସି ବ୍ୟକ୍ତି କିମ୍ବା କୌଣସି ଗୋଟିଏ ଦେଶ ଉପରେ ଛାଡିବା ଉଚିତ୍‌ ନୁହେଁ । କେବଳ ଗୋଟିଏ କିମ୍ବା ଦୁଇଟି ଦେଶ ମିଶି ଏଆଇର ଭବିଷ୍ୟତ ଗଠନ କରିପାରିବେ ନାହିଁ । ଆପଣ ଏକ୍ସପୋରେ ଦେଖିପାରିବେ ଭାରତ ଶହ ଶହ ଷ୍ଟାଟଅପ ରହିଛି । ଭାରତୀୟ ଏଆଇ କେତେ ପରିପକ୍ବ ତାହା ବିଶ୍ବବାସୀ ଜାଣିଛନ୍ତି । ଏଆଇର ଭବିଷ୍ୟତ ଗଠନ କରିବାରେ ଭାରତ ଏକ ପ୍ରମୁଖ ଭୂମିକା ଗ୍ରହଣ କରିବ।"  

ପ୍ରକାଶଥାଉକି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ ଡିସେମ୍ବର 8 ତାରିଖରେ ଏହି ଶିଖର ସମ୍ମିଳନୀ ବିଷୟରେ ସୂଚନା ଦେଇ ସମସ୍ତ ଦେଶବାସୀଙ୍କୁ ନିମନ୍ତ୍ରଣ କରିଥିଲେ । ଏହି ସମ୍ମିଳନୀରେ ବିଶ୍ବର ପ୍ରାୟ 27ଟି ଦେଶ ସାମିଲ ରହିଥିଲେ । ଏହା ସହିତ ସମ୍ମିଳନୀରେ 150ରୁ ଅଧିକ ଜଣ ସେମାନଙ୍କର ମତ ରଖିଥିଲେ।"

ଆର୍ଟିଫିସିଆଲ ଇଣ୍ଟେଲିଜେନ୍ସର ଶିଖର ସମ୍ମିଳନୀର ପ୍ରଥମ ଦିନରେ ପ୍ରଧାନମନ୍ତ୍ରୀ ଯୋଗ ଦେଇ ଏଆଇର ଅପବ୍ୟବହାର ନେଇ ଦେଶବାସୀଙ୍କୁ ଚେତାବନୀ ଦେଇଥିଲେ । ଏକବିଂଶ ଶତାବ୍ଦୀର ବିକାଶରେ ଏଆଇ ସବୁଠାରୁ ବଡ଼ ଉତ୍ସ ହୋଇପାରେ କିନ୍ତୁ ଏକବିଂଶ ଶତାବ୍ଦୀକୁ ଧ୍ବସଂ କରିବାର ମଧ୍ୟ ସମାନ କ୍ଷମତା ଏଆଇ ପାଖରେ ରହିଛି ବୋଲି ଦେଶବାସୀଙ୍କୁ ସମ୍ବୋଧିତ କରିଥିଲେ ପ୍ରଧାନମନ୍ତ୍ରୀ। 

ବ୍ୟୁରୋ ରିପୋର୍ଟ, ଇଟିଭି ଭାରତ