ଗୁଣି ଗାରେଡ଼ି ସନ୍ଦେହରେ ଟାଙ୍ଗିଆରେ ହାଣି ହତ୍ୟା, ଅଭିଯୁକ୍ତ ଗିରଫ

କେନ୍ଦୁଝର: ଗୁଣି ଗାରେଡ଼ି ସନ୍ଦେହରେ ଜନୈକ ବ୍ୟକ୍ତିଙ୍କୁ ନିର୍ମମ ହତ୍ୟା । କେନ୍ଦୁଝର ଜିଲ୍ଲା କାଞ୍ଜିପାଣି ଥାନା ଅନ୍ତର୍ଗତ ରୁଗୁଡିଖସଡ଼ା ଗ୍ରାମରେ ଏଭଳି ଘଟଣା ଘଟିଛି । ମୃତକ ଜଣକ ହେଉଛନ୍ତି ରୁଗୁଡିଖସଡ଼ା ଗ୍ରାମର ଅଜୟ ଦେହୁରୀ । ଉକ୍ତ ଗ୍ରାମର ଛବି ଦେହୁରୀର ବାପାଙ୍କ ଗତବର୍ଷ ପୂର୍ବେ କୌଣସି କାରଣରୁ ମୃତ୍ୟୁ ହୋଇଥିଲା । ଗୁଣି ଗାରେଡ଼ି ଯୋଗୁଁ ତାଙ୍କର ମୃତ୍ୟୁ ହୋଇଥିବା ଛବି ସନ୍ଦେହ କରୁଥିଲା । କିଛି ଦିନ ହେବ ଛବିର ମଧ୍ୟ ଦେହ ଖରାପ ରହୁଥିଲା । ଅଜୟ ଗୁଣି କରିଥିବା ନେଇ ଗାଁ ଲୋକଙ୍କଠାରୁ ଶୁଣି ଛବି ତାଙ୍କ ଘରକୁ ଯାଇ ତାକୁ ଏ ସମ୍ପର୍କରେ ପଚାରିଥିଲା । ଅଜୟ କୌଣସି ପ୍ରତିକ୍ରିୟା ନଦେବାରୁ ରାଗି ଯାଇ ଘର ଆଗରେ ରଖାଯାଇଥିବା ଟାଙ୍ଗିଆରେ ହାଣି ହତ୍ୟା କରିଛି ଛବି । ସୂଚନା ପାଇ କାଞ୍ଜିପାଣି ପୋଲିସ ଘଟଣାସ୍ଥଳରେ ପହଞ୍ଚି ଛବିକୁ ଗିରଫ କରିବା ସହ ମୃତଦେହ ବ୍ୟବଚ୍ଛେଦ କରି ଅଧିକ ତଦନ୍ତ ଚଳାଇଛି । ଏନେଇ ପୋଲିସର ପ୍ରତିକ୍ରିୟା ମିଳିପାରି ନାହିଁ ।

ଇଟିଭି ଭାରତ, କେନ୍ଦୁଝର