Hockey World Cup Opening Ceremony: ଷ୍ଟାଡିୟମ ଆଗରେ ଲମ୍ବା ଲାଇନ, ସୁରକ୍ଷା ବ୍ୟବସ୍ଥା ଚାଦର ତଳେ ସିଲଭର ସିଟି

କଟକ: ଆରମ୍ଭ ହୋଇଛି ହକି ମହାକୁମ୍ଭର ଉଦଘାଟନୀ ଉତ୍ସବ । ହକି ବିଶ୍ବକପର ଉଦଘାଟନୀ ଉତ୍ସବ ପାଇଁ ବାରବାଟୀ ଷ୍ଟାଡିୟମ ଆଗରେ ପ୍ରଶଂସକଙ୍କ ଲମ୍ବା ଲାଇନ ଦେଖିବାକୁ ମିଳିଛି । ଶାନ୍ତିଶୃଙ୍ଖଳାର ସହ ଉଦଘାଟନୀ ଉତ୍ସବ ଯେପରି ଶେଷ ହେବ ସେନେଇ ଜିଲ୍ଲା ପ୍ରଶାସନ, ପୋଲିସ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଏହି ଉତ୍ସବ ଅବସରରେ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ପରିବେଶଷ କରାଯିବାର କାର୍ଯ୍ୟକ୍ରମ ରହିଛି । ବଲିଉଡ ଷ୍ଟାର ରଣବୀର ସିଂ ଓ ଦିଶା ପଟାନୀ ଏହି ସାଂସ୍କୃତିକ କାର୍ଯ୍ୟକ୍ରମ ଅବସରର ଯୋଗ ଦେବେ । ଏହା ସହିତ ପ୍ରତିଷ୍ଠିତ ସଙ୍ଗୀତ ନିର୍ଦ୍ଦେଶକ ପ୍ରୀତମ ଓ ତାଙ୍କର ଗୃପ ଦ୍ବାରା ସଙ୍ଗୀତ ପରିବେଷଣ କରାଯିବ । ସବୁଠାରୁ ଆକର୍ଷଣୀୟ ହେବ ରଣବୀର ସିଂଙ୍କ ଷ୍ଟେଜ୍‌ ଏଣ୍ଟ୍ରି । ଅପରାହ୍ନ 3ଟାରୁ ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇ ରାତି 9ଟା ପର୍ଯ୍ୟନ୍ତ ଜାରି ରହିବ । ସଂନ୍ଧ୍ୟା ଠିକ୍‌ 6ଟା ବେଳେ ମୁଖ୍ୟମନ୍ତ୍ରୀ ଉତ୍ସବରେ ଯୋଗ ଦେବା ସହ ଆନୁଷ୍ଠାନିକ ଭାବେ ଏହାକୁ ଉଦଘାଟିତ କରିବେ । ରାଜ୍ୟ ସରକାର ଏହି ଉଦଘାଟନ ଉତ୍ସବକୁ ଦେଶର ସମସ୍ତ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଯୋଗ ଦେବା ପାଇଁ ନିମନ୍ତ୍ରଣ କରିଥିବାରୁ ବହୁ ରାଜ୍ୟର ମୁଖ୍ୟମନ୍ତ୍ରୀମାନେ ଏହି କାର୍ଯ୍ୟକ୍ରମରେ ଯୋଗ ଦେବେ। ଇଟିଭି ଭାରତ, କଟକ