କଟକ: ଗଲେ ବବି ଆସିବେ କି ବେବି ? ଓଡିଶା କ୍ରିକେଟ ଆସୋସିଏସନ ସଭାପତି ରେସରେ ପୂର୍ବତନ ରଣଜୀ ଖେଳାଳି ବା କୋଚ ଲଳିତେନ୍ଦୁ ବିଦ୍ୟାଧର ମହାପାତ୍ର । ପ୍ରଣବ ପ୍ରକାଶ ଦାସ ଓଡ଼ିଶା କ୍ରିକେଟ ଆସୋସିଏସନ-ଓସିଏ ସଭାପତି ପଦରୁ ଇସ୍ତଫା ଦେବା ପରେ ନୂଆ ସଭାପତି କିଏ ହେବେ ସେ ନେଇ କଳ୍ପନାଜଳ୍ପନା ଲାଗି ରହିଛି । ଏହାରି ମଧ୍ୟରେ ଲଳିତେନ୍ଦୁ ବିଦ୍ୟାଧର ଏହି ପଦବୀ ପାଇଁ ଇଚ୍ଛୁକ ଥିବା ରେଭେନ୍ସା ବିଶ୍ୱବିଦ୍ୟାଳୟରେ ଅନୁଷ୍ଠିତ ୨୮ତମ ଆଥଲେଟିକ ମିଟରେ ଯୋଗ ଦେଇ ଗଣମାଧ୍ୟମରେ ପ୍ରତିକ୍ରିୟା ରଖିଛନ୍ତି ।
'ଓସିଏ ପଦବୀ ପାଇଁ ମୁଁ ଇଚ୍ଛୁକ':
ଲଳିତେନ୍ଦୁ ବିଦ୍ୟାଧର ମହାପାତ୍ର କହିଛନ୍ତି, ''ବର୍ତ୍ତମାନ ପର୍ଯ୍ୟନ୍ତ ଓସିଏର ମୁଁ ମେମ୍ବର ନାହିଁ । ଦେଖିବା ଆଗକୁ କଣ ହେଉଛି । ଓଡିଶା କ୍ରିକେଟ ମୋତେ ବହୁତ ସୁନାମ ଦେଇଛି । ମୋତେ ଫେରିବାକୁ ସୁଯୋଗ ମିଳିଲେ ମୁଁ ଫେରିବି । ଆମକୁ ମାନିବାକୁ ପଡ଼ିବ ବର୍ତ୍ତମାନ ସମୟରେ ଓଡ଼ିଶା କ୍ରିକେଟ ପଛରେ ରହିଛି । ଯାହାର କାରଣ କେବଳ ଖେଳାଳି ନୁହନ୍ତି ବରଂ ସମ୍ପୂର୍ଣ୍ଣ ସଂଘ ଏଥିପାଇଁ ଚିନ୍ତା କରିବା ଆବଶ୍ୟକ । ସଂଘ ସମେତ ପୂର୍ବତନ ଖେଳାଳିମାନଙ୍କୁ ଏକାଠି କରି ଆଲୋଚନା କରାଗଲେ ଏହି ସ୍ଥିତିରେ ସୁଧାର ଆସି ପାରିବ । 'ଓସିଏ ସଭାପତି ପଦରୁ ଇସ୍ତଫା ଦେବା ବବି ଦାସଙ୍କ ବ୍ୟକ୍ତିଗତ ନିଷ୍ପତ୍ତି । ଭଲ ପ୍ରଦର୍ଶନ ହେଉନାହିଁ ବୋଲି ଖାଲି ଖେଳାଳିଙ୍କୁ ଦୋଷ ଦେଲେ ହେବନି, ବହୁତ କଥା ଭାବିବାକୁ ପଡ଼ିବ । ଖେଳାଳି, କୋଚ, ଚୟନକର୍ତ୍ତା ସମସ୍ତେ ବସିକି ପ୍ରଦର୍ଶନ ଉପରେ ଆଗାମୀ ଭବିଷ୍ୟତ ନେଇ ଆଲୋଚନା କରିବା କଥା । ମୁଁ ନିଶ୍ଚିତ ଭାବେ ରେସରେ ଅଛି । ''
ଏହା ମଧ୍ୟ ପଢନ୍ତୁ-OCAରୁ ବବି ଦାସ ଆଉଟ୍, ସଭାପତି ପଦରୁ ଦେଲେ ଇସ୍ତଫା - BABI DAS QUIT OCA
କ୍ରିକେଟରୁ କୋଚ୍ ଏବେ ଓସିଏ ସଭାପତି ଦୌଡ଼ରେ :
୧୯୮୫ ରୁ ୧୯୮୯ ପର୍ଯ୍ୟନ୍ତ ରଣଜୀ କ୍ରିକେଟର ଭାବରେ ନିଜର ପ୍ରତିଭା ଦେଖାଇଥିଲେ ବେବି । ସେହିପରି ୧୯୯୪ ରୁ ୧୯୯୯ ପର୍ଯ୍ୟନ୍ତ ଓଡିଶା ଟିମର କୋଚ ଭାବରେ ଓଡ଼ିଶା ଟିମକୁ ଏକ ନୂଆ ଦିଗ ଦର୍ଶନ ଦେଖାଇଥିଲେ ଲଳିତେନ୍ଦୁ ବିଦ୍ୟାଧର ମହାପାତ୍ର । ଏହରି ଭିତରେ ୨୬, ବର୍ଷ ବିତି ଯାଇଛି । ଯଦି ଓସିଏ ପକ୍ଷରୁ ସୁଯୋଗ ମିଳେ ତେବେ କ୍ରିକେଟର ନିଶ୍ଚୟ ବିକାଶ କରିବି ବୋଲି କହିଛନ୍ତି ପୂର୍ବତନ ଓଡ଼ିଶା ରଣଜୀ କୋଚ୍ ଲଳିତେନ୍ଦୁ ବିଦ୍ୟାଧର ମହାପାତ୍ର ।
'ଲଳିତେନ୍ଦୁ ଓସିଏକୁ ଆସିଲେ କ୍ରିକେଟ ବିକାଶ ହୋଇ ପାରିବ' :
ଓଡ଼ିଶା କ୍ରିକେଟ ସଂଘ ରେ ୭୩ ଜଣ ସଦସ୍ୟ ଓସିଏ ର ସଭାପତି ବାଛିବେ। ଯଦି କୌଣସି କ୍ଳବ, କିମ୍ବା ଜିଲ୍ଲାରୁ ସେ ନିର୍ବାଚନ ସମୟରେ ନାମାଙ୍କନ ଭରନ୍ତି ଓ ଓସିଏ ର ସଦସ୍ୟ ଲଳିତେନ୍ଦୁ ବିଦ୍ୟାଧର ମହାପାତ୍ରଙ୍କୁ ଭୋଟ ଦେଇ ସଭାପତି ଭାବରେ ଚୟନ କରନ୍ତି ତେବେ ନିଶ୍ଚୟ ସେ ଓସିଏର ସଭାପତି ହେବେ ଏଥିରେ ଦ୍ବିମତ ନାହିଁ । ପୂର୍ବରୁ ସେ ଓଡିଶା କ୍ରିକେଟ ସହ ଜଡିତ ଅଛନ୍ତି । ଏପରିକି ସେ ଥିଲେ ଜଣେ ଦକ୍ଷ କୋଚ୍ ଓ କ୍ରିକେଟର । ତେଣୁ ସେ ଓସିଏକୁ ଆସିଲେ କ୍ରିକେଟର ମଧ୍ୟ ବିକାଶ ହୋଇ ପାରିବ ବୋଲି କହିଛନ୍ତି ଓସିଏ ସମ୍ପାଦକ ସଞ୍ଜୟ ବେହେରା । ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି, ''ପୂର୍ବତନ ସଭାପତି ପ୍ରଣବ ପ୍ରକାଶ ଦାସ ଷ୍ଟାଡିୟମରେ ଲ୍ୟାଣ୍ଡ ଟାଇଟଲ ସେ କରିଥିଲେ । ଅଲିମ୍ପିକ୍ସ ଆସୋସିଏସନ ନାଁରେ କରିଛନ୍ତି । ଯଦି ବେବି ଆସିବେ ମେମ୍ବରମାନେ ଭୋଟ ଦେଲେ ସେ ବିଜୟୀ ହେବେ । ସେ ଆଗରୁ ଖେଳିଛନ୍ତି ଓ କୋଚ ମଧ୍ୟ ଥିଲେ । ''
ଡିସେମ୍ବର 29 ତାରିଖରେ ଓଡ଼ିଶା କ୍ରିକେଟ ଆସୋସିଏସନ (ଓସିଏ) ସଭାପତି ପଦରୁ ଇସ୍ତଫା ଦେଇଥିଲେ ବରିଷ୍ଠ ବିଜେଡି ନେତା ପ୍ରଣବ ପ୍ରକାଶ ଦାସ । ତାଙ୍କ ସ୍ଥାନରେ ଓସିଏ ଉପ-ସଭାପତି ପଙ୍କଜ ଲୋଚନ ମହାନ୍ତି ଏବେ ସଭାପତି ଦାୟିତ୍ବ ତୁଲାଉଛନ୍ତି ।
ଇଟିଭି ଭାରତ, କଟକ
