Hirakud: ଖୋଲିଲା ଆଉ 4 ଗେଟ, 12 ଗେଟରେ ହେଉଛି ବନ୍ୟା ଜଳ ନିଷ୍କାସନ

ସମ୍ବଲପୁର: ଛତିଶଗଡ଼ର କଲମା ବ୍ୟାରେଜ ଖୋଲିବା ପରେ ବଢିବାରେ ଲାଗିଛି ହୀରାକୁଦ ଜଳସ୍ତର ।  ପୁଣି ଖୋଲିଲା ହୀରାକୁଦର 4 ଗେଟ । ଏବେ ମୋଟ ୧୨ଟି ଗେଟ ଦେଇ ହେଉଛି ବନ୍ୟା ଜଳ ନିଷ୍କାସନ ।  ଗତ 23 ତାରିଖରେ ଚଳିତ ମୌସୁମୀର ପ୍ରଥମ ବନ୍ୟଜଳ ନିଷ୍କାସନ ପାଇଁ ହୀରାକୁଦର 5ଟି ଗେଟ ଖୋଲା ଯାଇଥିବା ବେଳେ ଗତକାଲି ପୁଣି 3ଟି ଗେଟ ଖୋଲା ଯାଇଥିଲା । ତେବେ ଜଳ ଭଣ୍ଡାରର ଜଳ ସ୍ତର ହ୍ରାସ ପାଉନଥିବା ଯୋଗୁଁ ଆଜି ପୁଣି 4ଟି ଗେଟ ଖୋଲିଛନ୍ତି ହୀରାକୁଦ ଡ୍ୟାମ କର୍ତ୍ତୃପକ୍ଷ ।  

ଅନ୍ୟପଟେ ଆଗକୁ ଲଘୁଚାପ ଜନିତ ବର୍ଷର ସମ୍ଭାବନାକୁ ଦୃଷ୍ଟିରେ ରଖି ତଳ ମୁଣ୍ଡରେ ଥିବା ସମ୍ବଲପୁର ସହରର ତଳି ଅଞ୍ଚଳରେ ରହୁଥିବା ଲୋକଙ୍କୁ ଜିଲ୍ଲା ଜରୁରୀକାଳୀନ ବିଭାଗ ପକ୍ଷରୁ ସତର୍କ ରହିବାକୁ ପରାମର୍ଶ ଦିଆଯାଇଛି । ହୀରାକୁଦ ଜଳ ଭଣ୍ଡାରର ସର୍ବୋଚ୍ଚ ଜଳ ଧାରଣ କ୍ଷମତା 630 ଫୁଟ ହୋଇଥିବା ବେଳେ ବର୍ତ୍ତମାନ ଏହାର ଜଳ ସ୍ତର 613.77 ଫୁଟ ରହିଛି ।  ବର୍ତ୍ତମାନ ହୀରାକୁଦର ଉପର ମୁଣ୍ଡରୁ ଜଳ ଭଣ୍ଡାରକୁ ସେକେଣ୍ଡ ପ୍ରତି 1ଲକ୍ଷ 38 ହଜାର 861 କ୍ୟୁସେକ ଜଳ ପ୍ରବେଶ କରୁଥିବା ବେଳେ 12ଟି ଗେଟ ଓ କେନାଲ ଓ ପାୱାର ଚ୍ୟାନେଲ ଦେଇ ସେକେଣ୍ଡ ପ୍ରତି ତଳମୁଣ୍ଡ ମହାନଦୀକୁ 2 ଲକ୍ଷ 19 ହଜାର 108 କ୍ୟୁସେକ ବନ୍ୟଜଳ ନିଷ୍କାସନ ହେଉଛି । କର୍ଭ ରୁଲ ଅନୁସାରେ ଜୁଲାଇ ଶେଷ ସୁଦ୍ଧା ହୀରାକୁଦର ଜଲ ସ୍ତରକୁ 605 ଫୁଟକୁ ଖସାଇବାକୁ ପଡିବ ବୋଲି କହିଛନ୍ତି ଜିଲ୍ଲା ଜରୁରୀ କାଳୀନ ଅଧିକାରୀ ଆଦିତ୍ୟ ପଣ୍ଡା ।

ଇଟିଭି ଭାରତ, ସମ୍ବଲପୁର