ହାତୀ ପଲରୁ ଅଲଗା ହୋଇ ଦନ୍ତା କରୁଛି ଆତଙ୍କ, ଭୟଭୀତ ଗ୍ରାମବାସୀ

ଢେଙ୍କାନାଳ: ଭୁବନ ବ୍ଲକର ବିଭିନ୍ନ ଗାଁରେ ପଲରୁ ଅଲଗା ହୋଇଥିବା ଦନ୍ତାର ଆତଙ୍କ । ଗାଁରେ ପଶି କଦଳୀବାଡି ନଷ୍ଟ କରିବା ସହ ଘରକାନ୍ଥ ଭାଙ୍ଗି ଦେଇଥିବା ଅଭିଯୋଗ । ସୂଚନା ଅନୁଯାୟୀ, ଗତକାଲି(ସୋମବାର) ମଧ୍ୟ ରାତିରୁ ଗନ୍ଦିଆ ବ୍ଲକ ଦଲାର ଓ ହରିପୁର ଗ୍ରାମ ନିକଟ ପାହାଡରୁ ବ୍ରାହ୍ମଣୀ ନଦୀ ପାର ହୋଇ ଦନ୍ତା ପଶି ଆସିଥିବା ଗ୍ରାମବାସୀ ଅଭିଯୋଗ କରିଛନ୍ତି । ପ୍ରଥମେ ଦନ୍ତାଟି ନଦୀ ପାର ହୋଇ ଭୁଷଳ ପଞ୍ଚାୟତର କିର୍ତ୍ତନପୁର ଗ୍ରାମରେ ପଶି କଦଳୀ ଗଛ ଭାଙ୍ଗିବା ସହିତ ଜଣକ ଘରୁ ଧାନ ବସ୍ତା ନେଇଯାଇଥିବା ଅଭିଯୋଗ ହୋଇଥିଲା । ପରେ ସେହି ପଞ୍ଚାୟତର କଞ୍ଚନବାହାଳୀ ଗ୍ରାମରେ ପଶି ଦିଲ୍ଲୀପ ମୁଣ୍ଡାଙ୍କ ଘର ଶୁଣ୍ଢରେ ପେଲିବା ଦ୍ବାରା ଘର କାନ୍ଥ ଫାଟିଥିବା ଦେଖିବାକୁ ମିଳିଛି । ତେବେ ଖବର ପାଇ ବନ ବିଭାଗ ହାତୀଟିର ଗତିବିଧି ଉପରେ ନଜର ରଖିବା ସହିତ ହାତୀଟିକୁ ଘଉଡାଇବାକୁ ଉଦ୍ୟମ ଚଳେଇଥିବା କହିଛନ୍ତି । ତେବେ ଗୋଠଛଡା ଦନ୍ତା ହାତୀଟି କଞ୍ଚନବାହାଳୀ ସଂରକ୍ଷିତ ଜଙ୍ଗଲ ମଧ୍ୟରେ ଥିବା ବନିବିଭାଗ ସୂଚନା ଦେଇଛନ୍ତି । ଭୁବନ ଅଞ୍ଚଳରେ ବହୁ ଦିନ ପରେ ହାତୀ ପଶିଥିବାରୁ ଗ୍ରାମବାସୀ ଭୟଭିତଥିବା ଜଣାପଡିଛି ।
 

ଇଟିଭି ଭାରତ, ଢେଙ୍କାନାଳ