Watch Video: ମଦ ପିଇ ହାଇଡ୍ରାମା, ୨୦ ଫୁଟ ଉପରେ ପୁସ୍‌ଅପ୍ ମାରିଲା ଯୁବକ

ବଲାଙ୍ଗୀର: ମଦ ପିଇ ଯୁବକଙ୍କ ହାଇଡ୍ରାମା  । ୨୦ ଫୁଟ ଉପରକୁ ଚଢି ପୁସ୍‌ଅପ୍ ମାରିଲା ମଦ୍ୟପ ଯୁବକ  । ଯିଏ ଦେଖିଲା ସିଏ ଘଡିଏ ଅଟକିଗଲା । ଏଭଳି କିଛି ଦୃଶ୍ୟ ଦେଖିବାକୁ ମିଳିଛି ବଲାଙ୍ଗୀର ପାଟଣାଗଡ଼ ବଥର୍ଲା ଛକରେ । ଜଣେ ଯୁବକ ବଥର୍ଲା ଗ୍ରାମରେ ଥିବା  ୨୦ ଫୁଟ ଉଚ୍ଚ ସ୍ଵାଗତ ଗେଟ୍‌ ଉପରକୁ ଚଢି ବ୍ୟାୟାମ କରୁଥିବାର ଦେଖାଯାଇଛି  । ଯୁବକ ଜଣ ମଦ ପିଇ ଅତି ବିପଦସଙ୍କୁଳ ଅବସ୍ଥାରେ ଗେଟ ଉପରେ ଚଢି ଯାଇଥିଲା ଏବଂ ବ୍ୟାୟାମ କରିଥିଲା  । ରାସ୍ତା ମଝିରେ ଏହି ଗେଟ୍‌ ଥିବାରୁ ସେହି ବାଟ ଦେଇ ଯାଉଥିବା ଲୋକମାନେ ଏହି ଦୃଶ୍ୟ ଦେଖି ଅଟକି ଯାଇଥିଲେ । ଲୋକେ ଯୁବକଙ୍କୁ ଓହ୍ଲାଇ ଆସିବା ପାଇଁ ଅପିଲ୍‌ କରିଥିଲେ । ହେଲେ ଦୀର୍ଘ ଘଣ୍ଟା ଧରି ମଦ୍ୟପ ଯୁବକ ସେଠି ଛିଡା ହୋଇ ହାଇଡ୍ରାମା କରିଥିଲା । ପରେ ପୋଲିସ ଆସୁଥିବା ଭୟରେ ସେ ନିଜେ ଗେଟରୁ ସୁରକ୍ଷିତ ଭାବରେ ତଳକୁ ଓହ୍ଲାଇ ଥିଲା ।  

ସମ୍ପୃକ୍ତ ଯୁବକ ବଥର୍ଲା ଗ୍ରାମର ହିରୁ ସାହୁ ବୋଲି ପରିଚୟ ମିଳିଛି  । ସେ ମଦ ପିଇ ଏହି କାଣ୍ଡ ଭିଆଇ ଥିବା ଜଣାପଡିଛି । ଯାହାର ଭିଡିଓ ବର୍ତ୍ତମାନ ସମୟରେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି । ଏହି ଘଟଣା ସମ୍ପର୍କରେ ପୋଲିସ୍ ସୂଚନା ପାଇଥିଲେ ସୁଦ୍ଧା କୌଣସି ପଦକ୍ଷେପ ନନେଇ କେବଳ ଚେତାବନୀ ଦେଇ ଛାଡି ଦେଇଛି । କିଛି ଦିନ ତଳେ ବଲାଙ୍ଗୀର ଦେଓଗାଁଠାରେ ୮୦ ଫୁଟ ଉଚ୍ଚ ପାଣି ଟାଙ୍କି ଉପରକୁ ଚଢି ଜଣେ ଯୁବକ ପ୍ରେମ ନିବେଦନ କରିବା ଘଟଣା ଚର୍ଚ୍ଚାର ବିଷୟ ପାଲଟିଥିଲା ।

ଇଟିଭି ଭାରତ, ବଲାଙ୍ଗୀର