Jharsuguda Bypoll: ଅମଲିପାଲିରେ ମୁଖ୍ୟମନ୍ତ୍ରୀଙ୍କ ପ୍ରଚାର, ଅଭିଭାଷଣ ବେଳେ ହେଲେ ଭାବୁକ

ଝାରସୁଗୁଡ଼ା: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଜିଲ୍ଲା ଗସ୍ତ କରି ଅମଲିପାଲିଠାରେ ବିଶାଳ ଜନସଭାରେ ଲୋକଙ୍କୁ ଉଦବୋଧନ ଦେଇଛନ୍ତି । ନିର୍ବାଚନୀ ପ୍ରଚାରରେ ବିଜେଡି ପ୍ରାର୍ଥିନୀ ଦୀପାଳି ଦାସଙ୍କୁ ବିପୁଳ ଭୋଟରେ ଜୟଯୁକ୍ତ କରିବାକୁ ଉପସ୍ଥିତ ଜନତାଙ୍କୁ ଅନୁରୋଧ କରିଥିଲେ । ମହିଳାମାନଙ୍କୁ ବିରୋଧୀ ଦଳ ଯେଭଳି ଭାବରେ ଆକ୍ରୋଶ ରଖି ଅଶାଳୀନ ମନ୍ତବ୍ୟ ଦେଉଛନ୍ତି ସେଥିରୁ ଖ୍ୟାନ୍ତ ରହିବାକୁ ସେ ଅନୁରୋଧ କରିଛନ୍ତି । ଏହି ସମୟରେ ସେ ଭାବୁକ ହୋଇପଡ଼ିଥିବା ଦେଖିବାକୁ ମିଳିଛି।  

ନିର୍ବାଚନୀ ସଭାରେ ବିପୁଳ ସଂଖ୍ୟାରେ ପୁରୁଷ ଏବଂ ମହିଳାମାନେ ଯୋଗଦାନ କରିଥିଲେ ଏବଂ ଦୀପାଳୀଙ୍କ ପାଇଁ ଭୋଟ ଭିକ୍ଷା କରି କାନ୍ଦିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତାଙ୍କର ଅଭିଭାଷଣ ସମୟରେ ଆଖିରୁ ଝରିଲା ଲୁହ । ଦୀପାଳିଙ୍କ ପାଇଁ ଭୋଟ ମାଗିବା ସମୟରେ ଭାବୁକ ହୋଇ ଆଖିରୁ ଲୁହ ଝରାଇଛନ୍ତି । ସେପଟେ ଦୀପାଳି ମଧ୍ୟ ଭାବୁକ ହୋଇପଡ଼ିଲେ । କହିଲେ ମୁଖ୍ୟମନ୍ତ୍ରୀଙ୍କ ସମ୍ମୁଖରେ ନିଜର ଅଭିଭାଷଣ ଦେବା ତାଙ୍କ ପିତା ନବ ଦାସଙ୍କ ସ୍ବପ୍ନ ଥିଲା ଏବଂ ଏହା ଆଜି ସତ ହୋଇଛି ।  

ବାପା ସ୍ବର୍ଗରୁ ଦେଖି ଖୁସି ହେଉଥିବେ । ଝାରସୁଗୁଡ଼ାବାସୀ ମଧ୍ୟ ତାଙ୍କ ପ୍ରତି ଭଲପାଇବା ଆଗାମୀ ୧୦ତାରିଖରେ ଦେଖାଇବେ । ସେପଟେ ପଦ୍ମପୁର ନିର୍ବାଚନରେ ଦୀପାଳି ଦାସ ବର୍ଷା ସିଂ ବରିହାଙ୍କ ପାଇଁ ଭୋଟ ମାଗିଥିଲେ । ତେବେ ଏହି ଉପନିର୍ବାଚନରେ ଦୀପାଳିଙ୍କ ପାଇଁ ଭୋଟ ମାଗିଛନ୍ତି ବର୍ଷା । ବଡ଼ ବ୍ୟବଧାନରେ ଏହି ଉପନିର୍ବାଚନରେ ଦୀପାଳି ବିଜୟୀ ହେବେ ବୋଲି ସେ କହିଛନ୍ତି।  

ଇଟିଭି ଭାରତ, ଝାରସୁଗୁଡ଼ା