କେନ୍ଦ୍ରାପଡା: ଆଳି ବ୍ଲକ ନୂଆ ବଜାରରେ ନୂଆବର୍ଷ ତୋରଣ ନିର୍ମାଣକୁ ନେଇ ଦୁଇ ରାଜନୈତିକ ଦଳ ବିଜେପି ଓ ବିଜେଡି ମଧ୍ୟରେ ବିବାଦ ଦେଖିବାକୁ ମିଳିଛି । ସ୍ଥିତି ଆୟତ୍ତ କରିବାକୁ ପ୍ରଶାସନ ପକ୍ଷରୁ ଉକ୍ତ ସ୍ଥାନରେ ଶୁଭେଚ୍ଛା ତୋରଣ ନିର୍ମାଣ ନିଷେଧ କରାଯିବା ସହ ଭାରତୀୟ ନାଗରିକ ସୁରକ୍ଷା ସଂହିତା (ବିଏନଏସଏସ) ର ଧାରା-୧୬୩ ଜାରି କରାଯାଇଛି । ଉକ୍ତ ଅଞ୍ଚଳରେ ସଶସ୍ତ୍ର ପୋଲିସ ଫୋର୍ସ ମୁତୟନ କରାଯାଇଛି । ଏପରି ଘଟଣା ସମଗ୍ର ଜିଲ୍ଲା ରାଜନୀତିରେ ଏକ ଚର୍ଚ୍ଚାର ପ୍ରସଙ୍ଗ ପାଲଟିଛି ।
- ନୂଆବର୍ଷ ତୋରଣ ତିଆରିକୁ ନେଇ ୨ ଗୋଷ୍ଠୀ ମୁହାଁମୁହିଁ
ଆଳି ଥାନା ଅନ୍ତର୍ଗତ ନୂଆବଜାରର କେନ୍ଦ୍ରସ୍ଥଳ ଦୁର୍ଗା ମଣ୍ଡପ ନିକଟରେ ଆସନ୍ତା ନୂଆବର୍ଷ-୨୦୨୫ ପାଇଁ ଦଳୀୟ ତୋରଣ ନିର୍ମାଣକୁ କେନ୍ଦ୍ରକରି ଦୁଇ ରାଜନୈତିକ ଗୋଷ୍ଠୀ ମଧ୍ୟରେ ବିବାଦୀୟ ସ୍ଥିତି ସୃଷ୍ଟି ହୋଇଛି । ଗୋଟିଏ ସ୍ଥାନରେ ୨ଟି ଦଳ ତୋରଣ ନିର୍ମାଣ କରିବାକୁ ଜିଦ୍ ଧରିବା ଫଳରେ ଉତ୍ତେଜନା ପ୍ରକାଶ ପାଇଥିଲା ।
ସୂଚନାନୁସାରେ, ଦୀର୍ଘ ବର୍ଷ ଧରି ଉକ୍ତ ସ୍ଥାନରେ ଗୋଟିଏ ନିର୍ଦ୍ଦିଷ୍ଟ ଦଳ ପକ୍ଷରୁ ତୋରଣ ନିର୍ମାଣ ହୋଇଆସୁଥିଲା । ଚଳିତବର୍ଷ ଗୋଟିଏ ଦଳ ତୋରଣ ନିର୍ମାଣ କରିବାକୁ ପ୍ରସ୍ତୁତି ଚଳାଇଥିବା ବେଳେ ଅପରପକ୍ଷରୁ ଏହାକୁ ବିରୋଧ କରାଯାଇଥିଲା । ଫଳରେ ଉଭୟ ଦଳର କର୍ମୀ ଓ ସମର୍ଥକ ମୁହାଁମୁହିଁ ହେବା ସହ ବିବାଦ ଉତ୍ତେଜନାପୂର୍ଣ୍ଣ ସ୍ଥିତିକୁ ଯାଇଥିଲା । ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ଗୋଷ୍ଠୀଙ୍କୁ ବୁଝାସୁଝା କରିବା ଉକ୍ତ ସ୍ଥାନରେ ତୋରଣ ନିର୍ମାଣ କରିବା ନେଇ ନିଷେଧାଦେଶ ଜାରି କରିଥିଲେ ।
ଜାରି ହେଲା ୧୬୩ ବିଏନଏସ
ସ୍ଥିତିକୁ ଆୟତ୍ତ କରିବାକୁ ପ୍ରଶାସନ ପକ୍ଷରୁ ‘ବିଏନଏସଏସ’ର ଧାରା 163 ଜାରି କରାଯାଇଛି । ବିବାଦର ସମାଧାନ ପାଇଁ ୨ ଦିନ ହେଲା ଉଭୟ ଗୋଷ୍ଠୀଙ୍କ ସହ ଆଳି ତହସିଲଦାର, ଏସଡିପିଓ, ଉଚ୍ଚପଦସ୍ଥ ପ୍ରଶାସନିକ ଅଧିକାରୀମାନେ ଆଲୋଚନା ଜାରି ରଖିଛନ୍ତି । ଉଭୟ ପକ୍ଷଙ୍କ ମଧ୍ୟରେ ସମାଧାନର ବାଟ ନବାହାରିବାରୁ ଗଣ୍ଡଗୋଳ ଆଶଙ୍କାରେ ଘଟଣାସ୍ଥଳରେ ପୋଲିସ ମୁତୟନ ହେବା ସହ ୧୬୩-ବିଏନଏସ ଜାରି କରାଯାଇଛି । ଆଳି ତହସିଲଦାର ଶାନ୍ତି ସ୍ୱରୂପ ମିଶ୍ରଙ୍କ ନିର୍ଦ୍ଦେଶରେ ଦୁର୍ଗା ମଣ୍ଡପର ୫୦ ମିଟର ଦୂରତା ପର୍ଯ୍ୟନ୍ତ ଭାରତୀୟ ନ୍ୟାୟ ସଂହିତା ଧାରା- ୧୬୩ ଜାରି କରାଯାଇଛି ।
ଏନେଇ ଆଳି ତହସିଲଦାର କହିଛନ୍ତି,"ନୂଆବର୍ଷର ତୋରଣ ଲଗାଇବା ନେଇ ୨ ଗୋଷ୍ଠୀ ମଧ୍ୟରେ କନ୍ଦଳ ହୋଇଥିଲା । ତାକୁ ସମାଧାନ କରିବା ପାଇଁ ୨ ଦିନ ଧରି ଆମେ ଚେଷ୍ଟା କରିଥିଲୁ । ୨ ଗୋଷ୍ଠୀ ମଧ୍ୟରେ ମାରପିଟ ହେବାର ଆଶଙ୍କା ଅଛି । ତେଣୁ ଆମେ ଉକ୍ତ ଅଞ୍ଚଳରେ ବିଏନଏସଏସର ଧାରା- ୧୬୩ ଲାଗୁ କରିଛୁ । ସ୍ଥିତିରେ ସୁଧାର ଆସିଲେ ଏହାକୁ ପ୍ରତ୍ୟାହାର କରିବା ଦିଗରେ ଚିନ୍ତା କରାଯିବ ।"
ଇଟିଭି ଭାରତ, କେନ୍ଦ୍ରାପଡା
