ବଣାଇ ବିଧାୟକଙ୍କ ଆଇନ ଅମାନ୍ୟ ଆନ୍ଦୋଳନ, ବଣାଇ ବ୍ଲକକୁ ଧସାଇ ପଶିଲେ ଶହ ଶହ କର୍ମକର୍ତ୍ତା

ରାଉରକେଲା: ସୁନ୍ଦରଗଡ ଜିଲ୍ଲା ବଣାଇ ଅଞ୍ଚଳ ପ୍ରତି ରାଜ୍ୟ ସରକାରଙ୍କ ଅବହେଳା ଅଭିଯୋଗରେ ବଣାଇ ବିଧାୟକଙ୍କ ପକ୍ଷରୁ ଆଇନ ଅମାନ୍ୟ ଆନ୍ଦୋଳନ ଜୋରଦାର କରାଯାଇଛି । ରାଜ୍ୟ ସରକାରଙ୍କୁ ବିରୋଧ କରି ଶହ ଶହ ସିପିଆଇଏମ କର୍ମକର୍ତ୍ତା ବଣାଇ ବ୍ଲକ ଅଫିସରେ ଧସେଇ ପଶିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି । ଏହି ସମୟରେ ପୋଲିସ ସହ ବିକ୍ଷୋଭକାରୀଙ୍କ ଧସ୍ତାଧସ୍ତି ହୋଇଥିଲା । ରାଜ୍ୟ ସରକାର ବଣାଇ ପ୍ରତି ବୈମାତୃକ ମନଭାବ ପୋଷଣ କରୁଥିବା ଅଭିଯୋଗ କରିଛନ୍ତି ବିକ୍ଷୋଭକାରୀ ।

ଆଜି(ଶୁକ୍ରବାର) ବଣାଇ ବିଧାୟକ ଲକ୍ଷ୍ମଣ ମୁଣ୍ଡାଙ୍କ ନେତୃତ୍ୱରେ ବିକ୍ଷୋଭକାରୀମାନେ ବଣାଇ ବ୍ଲକ କାର୍ଯ୍ୟାଳୟରେ ଧାରଣା ଦେଇଥିଲେ । ଆରଡିଡି ବହୁମୁଖୀ ଖେଳ ପଡ଼ିଆରୁ ଶହ ଶହ ସଂଖ୍ୟାରେ ସିପିଆଇଏମ କର୍ମକର୍ତ୍ତାମାନେ ମୁଖ୍ୟ ରାସ୍ତା ଦେଇ ବିଶାଳ ରାଲି କରିଥିଲେ । ତେବେ ବ୍ଲକ ଅଫିସକୁ ଧସେଇ ପସିବା ବେଳେ ପୋଲିସ ତାଙ୍କୁ ରୋକିବାକୁ ଚେଷ୍ଟା କରିଥିଲେ । ଯେଉଁପାଇଁ ବିକ୍ଷୋଭକାରୀ ଓ ପୋଲିସ ମଧ୍ୟରେ ଧସ୍ତାଧସ୍ତି ଦେଖିବାକୁ ମିଳିଥିଲା । 

ଭାରତୀୟ କମ୍ୟୁନିଷ୍ଟ ପାର୍ଟି( ମାର୍କ୍ସବାଦୀ) ସହିତ ମିଶି ବିକ୍ଷୋଭକାରୀମାନେ 18 ଟି ଦାବି ଉପସ୍ଥାପନ କରିଥିଲେ ।' ଆମ ଓଡ଼ିଶା ନବୀନ ଓଡ଼ିଶା' ଯୋଜନାରେ ପଞ୍ଚାୟତକୁ 50 ଲକ୍ଷ ଟଙ୍କାର ଅନୁଦାନ ଆବଣ୍ଟନକୁ ତୀବ୍ର ବିରୋଧ କରାଯାଇଥିଲା । ତେବେ ଏହି ଯୋଜନା ପ୍ରକ୍ରିୟାରେ ସରପଞ୍ଚଙ୍କ ଭୂମିକାକୁ ଅବହେଳା କରାଯାଉଥିବା ଅଭିଯୋଗ ଆଣିଥିଲେ ବିକ୍ଷୋଭକାରୀ । ଏଥିସହ ବଣାଇଗଡ କଲେଜକୁ ସଂପୂର୍ଣ୍ଣ ସରକାରୀ କଲେଜ ଭାବେ ଘୋଷଣା କରିବା, ବଣାଇ ସରକାରୀ ଡାକ୍ତରଖାନାରେ ଡାକ୍ତର ଏବଂ ନର୍ସମାନଙ୍କ ପାଇଁ ଉନ୍ନତ ଅବସ୍ଥା ସହ ନୂତନ ଡାକ୍ତର ଓ ନର୍ସ ନିଯୁକ୍ତି ପାଇଁ ଦାବି କରିଥିଲେ ବିକ୍ଷୋଭକାରୀ ।

ଇଟିଭି ଭାରତ, ରାଉରକେଲା