ଶିକ୍ଷକଙ୍କ ମାଡ଼ରେ ଛାତ୍ରଙ୍କ ମୃତ୍ୟୁ ! ମୃତଦେହ ରଖି ସ୍କୁଲ ଆଗରେ ଧାରଣା

ବାଲେଶ୍ବର: ଶିକ୍ଷକଙ୍କ ମାଡ଼ ଯୋଗୁଁ ଛାତ୍ରଙ୍କ ମୃତ୍ୟୁ ହୋଇଥିବା ଅଭିଯୋଗ । ଛାତ୍ରଙ୍କ ମୃତଦେହ ରଖି ବିଦ୍ୟାଳୟ ଆଗରେ ଧାରଣା ହେଲେ ପରିବାର ଲୋକେ ଓ ଗ୍ରାମବାସୀ । ଏପରି ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା କୁଳିଗାଁରେ । ବିଦ୍ୟାଳୟ ଏବେ ଦଣ୍ଡମୁକ୍ତ ହୋଇଥିବା ବେଳେ କେଉଁ ପରିସ୍ଥିତିରେ ଶିକ୍ଷକ ଏମିତି ମାଡ଼ ମାରିଲେ ତାହାକୁ ନେଇ ଏବେ ପ୍ରଶ୍ନବାଚୀ ହୋଇଛି । ସୂଚନା ଅନୁସାରେ, ବାଲେଶ୍ୱର ଜିଲ୍ଲା ଖନ୍ତାପଡ଼ା ଥାନା କୁଳିଗାଁ ବଂଶୀଧର ବିଦ୍ୟାପୀଠ । ଏହି ବିଦ୍ୟାଳୟରେ ସାହାରଦା ଗ୍ରାମର ଗୋବିନ୍ଦ ଚନ୍ଦ୍ର ଦାସଙ୍କ ପୁଅ ସୁମନ୍ତ ଦାସ 10 ଶ୍ରେଣୀରେ ପାଠପଢୁଥିଲେ । ଗତକାଲି (ଶନିବାର) ବିଦ୍ୟାଳୟକୁ ଯାଇଥିବା ବେଳେ କୌଣସି କାରଣରୁ ଶିକ୍ଷକ ଛାତ୍ରଙ୍କୁ ମାଡ ମାରିଥିଲେ । ରାତିରେ ଛାତ୍ରଙ୍କ ଛାତିରେ ଯନ୍ତ୍ରଣା ହେବାରୁ ପରିବାର ଲୋକେ ତାଙ୍କୁ ଡାକ୍ତରଖାନା ନେଇଥିଲେ । ଡାକ୍ତରଖାନାରେ ଚିକିତ୍ସିତ ଅବସ୍ଥାରେ ଛାତ୍ରଙ୍କ ମୃତ୍ୟୁ ହୋଇଥିବା ଡାକ୍ତର ଘୋଷଣା କରିଥିଲେ । ଶିକ୍ଷକଙ୍କ ଅମାନୁଷିକ ମାଡରେ ଛାତ୍ର ଜଣଙ୍କର ମୃତ୍ୟୁ ହୋଇଥିବା ଅଭିଯୋଗ କରି ବିଦ୍ୟାଳୟ ଆଗରେ ମୃତଦେହ ରଖି ନ୍ୟାୟ ଦାବି କରିଛି ପରିବାର । ଏହାସହ ପରିବାର ଲୋକେ କଣ୍ଟାପଡା ଥାନାରେ ଶିକ୍ଷକ ସୂର୍ଯ୍ୟ ନାରାୟଣ ମଲିକଙ୍କ ନାଁରେ ଏତଲା ଦାୟର କରିଛନ୍ତି । ତେବେ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ପରିବାର ଲୋକଙ୍କୁ ବୁଝାସୁଝା କରିବା ସହ ତଦନ୍ତ ଆରମ୍ଭ କରିଛି । 

ଇଟିଭି ଭାରତ, ବାଲେଶ୍ବର