ଦରମା ବୃଦ୍ଧି ଓ ପଦୋନ୍ନତି ପାଇଁ କୃଷି କର୍ମଚାରୀଙ୍କ ଦାବି, ରାଜ୍ୟବ୍ୟାପୀ ଆନ୍ଦୋଳନ ଚେତାବନୀ

ଭବାନୀପାଟଣା: ପଦୋନ୍ନତି ଓ ଦରମା ବୃଦ୍ଧି ପାଇଁ ଦାବିପତ୍ର ପ୍ରଦାନ କଲେ ଗ୍ରାମ୍ୟ କୃଷି କର୍ମଚାରୀ। ଆଜି ଜିଲ୍ଲାରେ କାର୍ଯ୍ୟରତ ସମସ୍ତ ଗ୍ରାମ୍ୟ କୃଷି କର୍ମଚାରୀ ଓ ଅତିରିକ୍ତ କୃଷି କର୍ମଚାରୀ ସାମିଲ ହୋଇ ଭବାନୀପାଟଣାଠାରେ ଥିବା ଜିଲ୍ଲାପାଳଙ୍କ କାର୍ଯ୍ୟାଳୟକୁ ଯାଇ ସେଠାରେ ଏକ ଦାବିପତ୍ର ପ୍ରଦାନ କରିଛନ୍ତି । ସରକାର କୃଷକ ଓ କୃଷି କାର୍ଯ୍ୟକୁ ଗୁରୁତ୍ବ ଦେଇ ଅନେକ ଯୋଜନା କରୁଛନ୍ତି । କୃଷକଙ୍କ ସମସ୍ତ ସମସ୍ୟା ଓ ତାର ସମାଧାନ ପାଇଁ କୃଷି ବିଭାଗରେ ଅନେକ ତଳ ସ୍ତରର କର୍ମଚାରୀ ନିଯୁକ୍ତ କରିଛନ୍ତି । ଗ୍ରାମ୍ୟ କୃଷି କର୍ମଚାରୀଙ୍କ ସମେତ ବ୍ଲକମାନଙ୍କରେ ମଧ୍ୟ କର୍ମଚାରୀ ନିଯୁକ୍ତ କରିଛନ୍ତି ସରକାର । 

ବିଶେଷ କରି ସରକାରଙ୍କ କାଳିଆ ଯୋଜନା, ବଳରାମ ଯୋଜନା ଜାତୀୟ ଖାଦ୍ୟ ସୁରକ୍ଷା ଯୋଜନା, ମିଲେଟ ମିଶନ, ଜଳନିଧି ଯୋଜନା, କୃଷି କଲ୍ୟାଣ ଆଦି ଯୋଜନାରେ ସରକାର ସମସ୍ତ କୃଷି କର୍ମଚାରୀଙ୍କୁ ନେଇ କାମ କରୁଛନ୍ତି । ହେଲେ ତାହା ଅସ୍ଥାୟୀ ମାଧ୍ୟମର ହୋଇଥିବାରୁ ଅନେକ ସମସ୍ୟା ହେଉଛି । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି କର୍ମଚାରୀ । କୃଷି ବିଭାଗ କର୍ମଚାରୀ ଚନ୍ଦ୍ର ମୋହନ ଚାନ୍ଦ କହିଛନ୍ତି, "ଦରମା କମ୍ ହେତୁ ଆର୍ଥିକ ସମସ୍ୟା ଦେଇ ଗତି କରିବାକୁ ପଡୁଛି । ଆଜି ରାଜ୍ୟ ସରକାରଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି । ଯଥାଶୀଘ୍ର ରାଜ୍ୟ ସରକାର ସମସ୍ତ AAO ଏବଂ VAWମାନଙ୍କୁ ପଦୋନ୍ନତି କରିବା ସହ ଦରମା ବୃଦ୍ଧି ଦାବି କରନ୍ତୁ । ସମସ୍ତ ଦାବିକୁ ସରକାର ପୂରଣ ନକଲେ ଆସନ୍ତା ଦିନରେ ରାଜ୍ୟବ୍ୟାପୀ ଆନ୍ଦୋଳନ ହେବା ସହ କାର୍ଯ୍ୟବନ୍ଦ ଆନ୍ଦୋଳନ ମଧ୍ୟ କରାଯିବ ।"
 

ଇଟିଭି ଭାରତ, କଳାହାଣ୍ଡି