CDS ଜେନେରାଲ ବିପିନ ରାୱତଙ୍କୁ ଶ୍ରଦ୍ଧାଞ୍ଜଳି

ସିଡିଏସ ଜେନେରାଲ ବିପିନ ରାୱତଙ୍କ ଅକାଳ ବିୟୋଗରେ ଦେଶବ୍ୟାପି ଶୋକର ଛାୟା ଖେଳିଯାଇଥିବା ବେଳେ ଭଦ୍ରକ ସହରର ବିଭିନ୍ନ ସ୍ଥାନରେ ଦିବଙ୍ଗତ ଆତ୍ମାମାନଙ୍କ ସଦଗତି ପାଇଁ କ୍ୟାଣ୍ଡେଲ ମାର୍ଚ୍ଚ କରାଯିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି । ମୁକୁନ୍ଦପୁର ପଞ୍ଚାୟତ ଅନ୍ତର୍ଗତ ବିଦ୍ୟାଧରପୁର ଶିବ ମନ୍ଦିରରୁ ଏକ ମହମବତୀ ଶୋଭାଯାତ୍ରାରେ ବାହାରି ସ୍ଥାନୀୟ ଅଞ୍ଚଳରେ ପରିକ୍ରମା କରାଯାଇଥିଲା । ପରେ ସ୍ଥାନୀୟ ମୁକୁନ୍ଦପୁର ଥାନେଶ୍ୱରୀ, ଶିବ ଓ ହନୁମାନ ମନ୍ଦିରରେ ଏକସଙ୍ଗେ ଦ୍ବୀପଦାନ କରାଯାଇଥିଲା । ଏହି କାର୍ଯ୍ୟକ୍ରମରେ ଶହଶହ ଆବାଳ-ବୃଦ୍ଧ-ବନିତା ସାମିଲ ହୋଇଥିଲେ । ସେହିପରି ତିହିଡି ସଦର ବଜାରରେ ଓଟିଓ କ୍ୟାବ ପକ୍ଷରୁ କ୍ୟାଣ୍ଡେଲ ଶୋଭାଯାତ୍ରା କରାଯାଇ ଶେଷରେ ଭାଟପଡାସ୍ଥିତ ତାରିଣୀ ମନ୍ଦିରରେ ସମୂହ ଦୀପଦାନ କରା ଯାଇଥିଲା।