URBAN RESULT: DJ ବଜାଇ ମିଠା ଖୁଆଇ ଭବାନୀପାଟଣାରେ ଖୁସି ମନାଇଲା ବିଜେଡି

ଭବାନୀପାଟଣା: ପୌର ଫଳାଫଳ ଆସିବା ପରେ ବିଜେଡି ଶିବିରେ ଉତ୍ସାହ ଦେଖିବାକୁ ମିଳିଛି । ଭବାନୀପାଟଣା ପୌର ଗଡ଼ ପୁଣି ଥରେ ବିଜେଡି ଖାତାକୁ ଯାଇଛି । ବିଜେଡ଼ିର ପୌର ଅଧ୍ୟକ୍ଷା ପ୍ରାର୍ଥିନୀ ସଂଯୁକ୍ତା ବେହେରା ୧୪ ହଜାର ୧୩୫ ଟି ଭୋଟ ପାଇ ନିଜ ନିକଟତମ ପ୍ରତିଦ୍ବନ୍ଦୀ ବିଜେପି ପ୍ରାର୍ଥିନୀ ବିନିତା ଦାଶଙ୍କ ଠାରୁ ୮୪୭ ଟି ଭୋଟ ବ୍ୟବଧାନରେ ବିଜୟ ହୋଇ ବିଜେଡିର ଗଡ଼ ରକ୍ଷା କରିଛନ୍ତି । ଆଉ ବିଜେଡିର ବିଜୟ ଘୋଷଣା ପରେ ବିଜେଡି ନେତା ଓ କର୍ମୀଙ୍କ ମନରେ ଉତ୍ସାହ ଦେଖା ଦେଇଥିବା ବେଳେ ଉତ୍ସବମୁଖର ହୋଇଛି ବିଜେଡି ଶିବିର। ଏହି ବିଜୟ ପରେ ବିଜେଡିର ବିଜୟ ଶୋଭାଯାତ୍ରାରେ ଅନୁଷ୍ଠିତ ହୋଇଯାଇଛି । ଭବାନୀପାଟଣା ବଳଜୀ ମନ୍ଦିର ଠାରୁ ଶୋଭାଯାତ୍ରାରେ ବାହାରି ଜନମତକୁ ସମ୍ମାନ ଜଣାଇଥିଲେ ବିଜେଡି ନେତା ଓ କର୍ମୀ । ବାଣ ଫୁଟାଇ ଡିଜେ ବାଦ୍ୟର ତାଳେ ତାଳେ ମିଠା ଖୁଆଇ ଅବିର ଲଗାଇ ନାଚି ଉଠିଛନ୍ତି ବିଜେଡି କର୍ମୀ । ଏହି ଶୋଭାଯାତ୍ରାରେ ନବ ନିର୍ବାଚିତ ବିଜେଡି ପୌରାଧ୍ୟକ୍ଷା ସଂଯୁକ୍ତା ବେହେରା, ବିଜୁ ମହିଳା ଜନତା ଦଳ ଜିଲ୍ଲା ସଭାନେତ୍ରୀ ଲଳିତା ନାଏକଙ୍କ ସମେତ ଅନେକ ଦଳୀୟ କର୍ମୀ ସାମିଲ ହୋଇଥିଲେ । କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ