ତୁଷାରପାତ ସାଙ୍ଗକୁ ବର୍ଷା, କାଶ୍ମୀରରେ ସାଧାରଣ ଜୀବନ ଅସ୍ତବ୍ୟସ୍ତ

ରବିବାର କାଶ୍ମୀର ଉପତ୍ୟକାରେ ମଧ୍ୟମ ଧରଣର ବର୍ଷା ହୋଇଛି । ତା ସାଙ୍ଗକୁ କେତେକ ସ୍ଥାନରେ ତୁଷାରପାତ ମଧ୍ୟ ହୋଇଛି । ଫଳରେ ପାହାଡ଼ିଆ ଅଞ୍ଚଳରେ ପାରଦ ୦ ଡିଗ୍ରୀକୁ ଖସି ଆସିଛି । ମିଶ୍ରିତ ଜଳବାୟୁ ସାଧାରଣ ଜୀବନ ଉପରେ ପ୍ରଭାବ ପକାଇଛି । ରାଜରାସ୍ତା ତୁଷାରଚ୍ଛନ୍ନ ହୋଇ ବନ୍ଦ ହୋଇଛି । ଶ୍ରୀନଗର ସହ ଲେହ, ଗୁରେଜ୍‌-ବାନ୍ଦିପୁରା ଓ ସୋପିଆନ୍‌ ଅଞ୍ଚଳରେ ପ୍ରବଳ ତୁଷାରପାତ ହୋଇଛି । ଡିସେମ୍ବର ୬ ତାରିଖ ପର୍ଯ୍ୟନ୍ତ ଏଭଳି ପାଗ ରହିବା ନେଇ ପାଣିପାଗ ବିଭାଗ ଅନୁମାନ କରିଛି । ଅନନ୍ତନାଗ ଓ ପୁଲୱାମାରେ ମଧ୍ୟମ ଧରଣର ବର୍ଷା ମଧ୍ୟ ଦେଖିବାକୁ ମିଳିଛି । ଜମ୍ମୁର ଅଧିକାଂଶ ଅଞ୍ଚଳରେ ପ୍ରବଳ ବର୍ଷା ହେବାନେଇ ପୂର୍ବାନୁମାନ କରିଛି ପାଣିପାଗ ବିଭାଗ ।