ରାଉରକେଲା: ଆକାଶ ଛୁଆଁ ପରିବା ଦର । ଦାମ୍ ଶୁଣିଲେ ଛାତିରେ ପଶୁଛି ଛନକା । ବର୍ଷା ଯୋଗୁଁ ପନିପରିବା ଦରରେ ବୃଦ୍ଧି ଲୋକଙ୍କ ପକେଟକୁ ପ୍ରଭାବିତ କରୁଛି । ସେଞ୍ଚୁରୀ ପାର୍ କରିବା ପରେ ରୋଷେଇ ଘରୁ ଉଭାନ ହୋଇଯାଇଛି ଟମାଟୋ । ଅନ୍ୟାନ୍ୟ ସବୁଜ ପନିପରିବା ଦର ମଧ୍ୟ ଖୁବ୍ ଅଧିକ ରହିଛି । ଓଡ଼ିଶାର ବ୍ୟସ୍ତବହୁଳ ସହର ରାଉରକେଲାରେ ଅତ୍ୟାବଶ୍ୟକୀୟ ପନିପରିବା ଦର ବୃଦ୍ଧି ଯୋଗୁଁ ଗ୍ରାହକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଖାସ୍ କରି ମଧ୍ୟବିତ୍ତ ଏବଂ ଗରିବ ପରିବାର ଉପରେ ଅଧିକ ବୋଝ ପଡୁଛି । କିଲୋ ଜାଗାରେ ଅଢେଇଶହ କିଣୁଛନ୍ତି ଲୋକେ ।
ସହରରେ ଟମାଟୋ କିଲୋ ପ୍ରତି 100ରୁ 120 ଟଙ୍କାରେ ବିକ୍ରି ହେଉଛି । କାଙ୍କଡ଼ କେଜି 100 ଟଙ୍କା, ଭେଣ୍ଡି କିଲୋ ପ୍ରତି 60-80 ଟଙ୍କାରେ ମିଳୁଛି । ସେହିପରି ପୋଟଳ 80 ଟଙ୍କା, କଲରା କେଜି 100 ଟଙ୍କା, ଝୁଡଙ୍ଗ 90 ଟଙ୍କା କିଲୋ ଏବଂ ବିନ୍ 200 ଟଙ୍କାରେ ପହଞ୍ଚିଛି । ବାଇଗଣ 60 ଟଙ୍କାରେ ମିଳୁଥିବା ବେଳେ ଶିମଲା ଲଙ୍କା 190-200 ଟଙ୍କା, ଗାଜର 180 ଟଙ୍କା ରହିଛି । ପନିପରିବା ଦର ବୃଦ୍ଧି ପାଇବାର ବିଭିନ୍ନ କାରଣ ରହିଛି । ପ୍ରଥମତଃ ପ୍ରତିକୂଳ ପାଗର ପ୍ରଭାବ ସାରା ରାଜ୍ୟରେ ଫସଲ ଅମଳକୁ ଯଥେଷ୍ଟ ମାତ୍ରାରେ ପ୍ରଭାବିତ କରିଛି । ଏହି ଅପ୍ରତ୍ୟାଶିତ ପାଗ ଯୋଗୁଁ ପରିବା ନଷ୍ଟ ହୋଇଥିବା ଯୋଗୁଁ ଦର ବୃଦ୍ଧି ପାଉଛି ।
ରାଉରକେଲାରେ ପରିବା ଦର ବୃଦ୍ଧିର ଅନ୍ୟ ଏକ କାରଣ ହେଉଛି ପରିବହନ ଖର୍ଚ୍ଚ ବୃଦ୍ଧି । ଇନ୍ଧନ ଦର ବୃଦ୍ଧି ପାଇବାର ସିଧାସଳଖ ପ୍ରଭାବ ପରିବହନ ଖର୍ଚ୍ଚ ଉପରେ ପଡ଼ୁଛି, ଯାହା ଫଳରେ ପନିପରିବା ଦର ସାମଗ୍ରିକ ଭାବେ ବୃଦ୍ଧି ପାଉଛି । କୋଭିଡ-19 ମହାମାରୀ ଯୋଗୁଁ ଯୋଗାଣ ଶୃଙ୍ଖଳା ବାଧାପ୍ରାପ୍ତ ହେବା ଫଳରେ ଚାଷୀ ଓ ଯୋଗାଣକାରୀମାନେ ସମ୍ମୁଖୀନ ହେଉଥିବା ସମସ୍ୟା ବୃଦ୍ଧି ପାଇଛି ଏବଂ ବଜାରରେ ପନିପରିବା ଉପଲବ୍ଧ ହେବାରେ ବାଧା ଉପୁଜିଛି । ଚାହିଦା ଓ ଯୋଗାଣ ପୁରା ହୋଇପାରୁ ନଥିବା ଯୋଗୁଁ ଏଭଳି ସ୍ଥିତି ଉପୁଜିଛି । ପରିବା ବଜାରର ଚାହିଦା ଏବଂ ଯୋଗାଣର ଗତିଶୀଳତା ମଧ୍ୟ ମୂଲ୍ୟ ନିର୍ଦ୍ଧାରଣ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ ।
ଏହାମଧ୍ୟ ପଢନ୍ତୁ: ବୌଦ୍ଧ ବଜାରରେ ଆକାଶ ଛୁଆଁ ପନିପରିବା ଦର, ଚିନ୍ତାରେ ଖାଉଟି
କ୍ରମବର୍ଦ୍ଧିଷ୍ଣୁ ଜନସଂଖ୍ୟା ଓ ଖାଦ୍ୟପେୟରେ ପରିବର୍ତ୍ତନ ଯୋଗୁଁ ପରିବା ଚାହିଦା ଧୀରେ ଧୀରେ ବଢ଼ିବାରେ ଲାଗିଛି । କିନ୍ତୁ ଚାହିଦା ବଢ଼ିବା ସହିତ ଯୋଗାଣ ଠିକ୍ ଭାବେ ହୋଇପାରୁ ନାହିଁ । ଯାହାଫଳରେ ଅଭାବ ଦେଖାଦେଇଛି । ସେହିପରି ଦର ବୃଦ୍ଧି ପଛରେ ଶୀତଳ ଭଣ୍ଡାର ସମସ୍ୟା ରହିଥିବା ଅଭିଯୋଗ କରିଛନ୍ତି ଲୋକେ । ନିମ୍ନ ଆୟ ବର୍ଗର ପରିବାର ଗୁଡ଼ିକ ଅତ୍ୟାବଶ୍ୟକ ପନିପରିବା କିଣିବାରେ ଅଧିକ ଚ୍ୟାଲେଞ୍ଜ ଅନୁଭବ କରୁଛନ୍ତି । ବର୍ଦ୍ଧିତ ପରିବା ଦର ଲୋକଙ୍କ ମାସିକ ବଜେଟକୁ ସମ୍ପୂର୍ଣ୍ଣ ଦୋହଲାଇ ଦେଇଛି । ଆଗକୁ ଦର ଆହୁରି ବଢିବାର ଆଶଙ୍କା ରହିଥିବାରୁ ଚିନ୍ତାରେ ପଡିଛନ୍ତି ଖାଉଟି ।
ଇଟିଭି ଭାରତ, ରାଉରକେଲା
