ସୁବର୍ଣ୍ଣପୁର: ଲୋକଙ୍କୁ ମାଗଣା ସ୍ବାସ୍ଥ୍ୟ ସେବା ଯୋଗାଇ ଦେବା ପାଇଁ ସରକାର ରାଜ୍ୟ ରାଜକୋଷରୁ କୋଟି କୋଟି ଟଙ୍କା ବ୍ୟୟ କରି ଖୋଲିଛନ୍ତି ଡାକ୍ତରଖାନା । ହେଲେ ସ୍ଥାନୀୟ ଉଲୁଣ୍ଡା ବ୍ଲକ ଯାଲୋଏ ସ୍ବାସ୍ଥ୍ୟକେନ୍ଦ୍ରରେ ବିପର୍ଯ୍ୟସ୍ତ ହୋଇପଡିଛି ସ୍ବାସ୍ୟ ସେବା । ଡାକ୍ତରଖାନାରେ ରୋଗୀ ସେବା କରୁଛନ୍ତି ଆଟେଡାଣ୍ଟ । ଡାକ୍ତରଖାନାରେ ଆଜିକୁ 3 ବର୍ଷ ହେଲା ଡାକ୍ତର ନାହାଁନ୍ତି । ଫାର୍ମାସିଷ୍ଟ ଅଧିକାଂଶ ସମୟରେ ଅନୁପସ୍ଥିତ ରହୁଛନ୍ତି । ଫଳରେ ସ୍ଥାନୀୟ ଲୋକେ ବାଧ୍ୟ ହୋଇ ଜିଲ୍ଲା ମୁଖ୍ୟ ଚିକିତ୍ସାଳୟ ଉପରେ ନିର୍ଭର କରୁଛନ୍ତି ।
ଏ ହେଉଛି ଯାଲୋଏସ୍ଥିତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଅବସ୍ଥା । ଏହା ଆଜି କି କାଲିର ଘଟଣା ନୁହେଁ । ଡାକ୍ତର ଓ ଅନ୍ୟାନ୍ୟ କର୍ମଚାରୀଙ୍କ ଅନୁପସ୍ଥିତି ବର୍ଷ ବର୍ଷ ଧରି ରହୁଛି । ଫଳରେ ଡାକ୍ତରଖାନାଟି ଚାଲିଛି ଭଗବାନଙ୍କ ଭରସାରେ। ଡାକ୍ତରଖାନାରେ ଡାକ୍ତର ନିଯୁକ୍ତି ହୋଇଛନ୍ତି ସତ କିନ୍ତୁ 3 ବର୍ଷ ହେଲା ଡେପୁଟେସନ ଡାକ୍ତର ଯାଇଛନ୍ତି ଅନ୍ୟ ଡାକ୍ତରଖାନାକୁ । ଫାର୍ମାସିଷ୍ଟ ପ୍ରାୟ ସମୟରେ ଅନୁପସ୍ଥିତ ରହୁଛନ୍ତି । ଫଳରେ ଏଠାରେ ଡାକ୍ତରୀ ସେବା କରନ୍ତି ଆଟେଡାଣ୍ଟ ।
ଲୋକଙ୍କୁ ଇନ୍ଜେକ୍ସନ ମଧ୍ୟ ଦେଉଛନ୍ତି ସେ । ଡାକ୍ତରଖାନାରେ ସମସ୍ତ ପ୍ରକାର ଭିତ୍ତିଭୂମି ଥିଲେ ମଧ୍ୟ କର୍ମଚାରୀ ଅଭାବରେ ଲୋକେ ବାଧ୍ୟ ହୋଇ ଜିଲ୍ଲା ସଦର ମହକୁମା ଡାକ୍ତରଖାନା ଉପରେ ନିର୍ଭର କରୁଛନ୍ତି ।
ଉଲୁଣ୍ଡା ଏବଂ ବୀରମହାରାଜପୁର ବ୍ଲକର 8ଟି ପଞ୍ଚାୟତର ପାଖାପାଖି ଲକ୍ଷେରୁ ଅଧିକ ଜନସାଧାରଣ ସ୍ବାସ୍ଥ୍ୟସେବା ଓ ଚିକିତ୍ସା ପାଇଁ ଡାକ୍ତରଖାନାକୁ ଦୌଡି ଆସୁଥିବାବେଳେ ନିରାଶ ହୋଇ ଘରକୁ ଫେରୁଛନ୍ତି ।
ବିଶେଷକରି ଗରିବ ଜନସାଧାରଣଙ୍କ ପାଖରେ ସ୍ବାସ୍ଥ୍ୟସେବା ଓ ଚିକିତ୍ସା ନ ପାଇ ବହୁ ହଇରାଣର ସମ୍ମୁଖୀନ ହେଉଛନ୍ତି । ଆଉ ସ୍ବାସ୍ଥ୍ୟସେବା ନ ପାଇ ଅଞ୍ଚଳବାସୀ ସ୍ଥାନୀୟ କ୍ବାକ୍ ଉପରେ ନିର୍ଭର କରିବାକୁ ବାଧ୍ୟ ହେଉଛନ୍ତି । ଏଠାରେ ସ୍ଥାୟୀ ଡାକ୍ତର ନିଯୁକ୍ତି ପାଇଁ ସ୍ଥାନୀୟ ଲୋକେ ଦାବି କରୁଥିଲେ ମଧ୍ୟ ଲୋକଙ୍କ ଦାବିକୁ ପ୍ରଶାସନ ଗୁରୁତ୍ବ ଦେଉନଥିବା ଅଭିଯୋଗ କରିଛନ୍ତି ।
ଅପରପକ୍ଷରେ ଜିଲ୍ଲାରେ ଡାକ୍ତର କମ ଥିବାରୁ ଏଠାରୁ ଡାକ୍ତରଙ୍କୁ ଉଲୁଣ୍ଡା ଡେପୁଟେସନରେ ଦିଆଯାଇଛି ବୋଲି ଭାରାପ୍ରାପ୍ତ ଜିଲ୍ଲା ଚିକିତ୍ସା ଅଧିକାରୀ କହିଛନ୍ତି । ତେବେ ଯାଲୋଏ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ କେବେ ନିୟମିତ ଡାକ୍ତର ଆସିବେ ଓ ଚିକିତ୍ସା ଲୋକେ ଠିକ୍ ଭାବରେ ପାଇପାରିବେ ତାହା ଦେଖିବା ବାକି ରହିଲା ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
