ରାୟଗଡା: ଜିଲ୍ଲା ପୋଲିସକୁ ଏକ ବଡ ଧରଣର ସଫଳତା ମିଳିଛି । ପୋଲିସ ପକ୍ଷରୁ ସୋମବାର ଭୋର ସମୟରେ ହୋଇଥିବା ଏନକାଉଣ୍ଟରରେ ଦୁର୍ଦ୍ଦାନ୍ତ ଅପରାଧୀ ଶିବା ହାଡ଼ପା ଗୁରୁତର ଭାବେ ଆହତ ହୋଇଛି। ଶିବା ସଂକେଶ ଜଙ୍ଗଲରେ ଲୁଚିଥିବା ସୂଚନା ପାଇ ରାୟଗଡା ଟାଉନ ଥାନା ପୋଲିସ ପକ୍ଷରୁ ଅତର୍କିତ ଚଢ଼ାଉ କରାଯାଇଥିଲା। ଚଢ଼ାଉ ବେଳେ ନିଶ୍ଚିତ ଗିରଫରୁ ବର୍ତ୍ତି ଖସି ପଳାଇବାକୁ ଚେଷ୍ଟା କରି ଶିବା ପୋଲିସ ଉପରକୁ ତିନି ରାଉଣ୍ଡ ଗୁଳି ଚଳାଇଥିଲା। ତେବେ ପୋଲିସ ପକ୍ଷରୁ ପାଲଟା ଦୁଇ ରାଉଣ୍ଡ ଗୁଳି ଚାଳନାରେ ଶିବାର ବାମ ଗୋଡରେ ଗୁଳି ବାଜିଥିଲା ଓ ସେ ଆହତ ହୋଇଥିଲା ।
ଅପରାଧୀ ଶିବା ହାଡ଼ପା ଓ ପୋଲିସ ମଧ୍ୟରେ ଗୁଳି ବିନିମୟରେ ଶିବା ସହିତ ଅନ୍ୟ ତିନିଜଣ ଥିବା ଏସପି ଶ୍ରବଣ ବିବେକ ଏମ ସୂଚନା ଦେଇଥିବା ବେଳେ ଅନ୍ଧାରର ସୁଯୋଗ ନେଇ ଅନ୍ୟ ମାନେ ଖସି ପଳାଇଛନ୍ତି । ତେବେ ଏହି ଏନକାଉଣ୍ଟରରେ ଶିବା ସହିତ ଅନ୍ୟଜଣେ ପୋଲିସ ଅଧିକାରୀ ରିଜନ କିଣ୍ଡୋ ଏବଂ ହାବିଲଦାର ଦିଲ୍ଲୀପ ହୋତା ମଧ୍ୟ ଆହତ ହେଇଛନ୍ତି। ଶିବାର ଗୋଡରେ ଗୁଳି ବାଜିବା ପରେ ସେ ତଳେ ପଡିଯାଇଥିଲା ଓ ତାକୁ ପୋଲିସ କାବୁ କରିନେଇଥିଲା। ଗୁରୁତର ଶିବାକୁ ପ୍ରଥମେ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି କରାଯାଇ ପରେ ତାକୁ ବ୍ରହ୍ମପୁର ଏମକେସିଜି ମେଡିକାଲକୁ ସ୍ଥାନାନ୍ତରିତ କରାଯାଇଛି।
ଶିବା ପ୍ରାୟ 50ରୁ ଅଧିକ ମାମଲାରେ ଜଡିତ ଥିବା ରାୟଗଡ଼ା ଏସପି ଡ଼ ଶ୍ରବଣ ବିବେକ ଏମ୍ ସୂଚନା ଦେଇଛନ୍ତି। ସୂଚନା ଯୋଗ୍ୟ ଯେ ମହାରାଷ୍ଟ୍ର ପୁଣେ ଠାରେ କାର୍ଯ୍ୟରତ ବିଭୂତି ପୂଜାରୀ 19 ତାରିଖ ଦିନ ବିଶାଖାପାଟଣା ଆସି ନିଜ ପୈତୃକ ଗ୍ରାମ ଏସ.ରାମପୁର ଯିବା ନିମନ୍ତେ ବିଶାଖାପାଟଣା ଠାରୁ ଟିଟିଲାଗଡ ପର୍ଯ୍ୟନ୍ତ ଧାନବାଦ-ଏଲଇପି ଟ୍ରେନରେ ଯାତ୍ରା କରିଥିଲେ । ଯାତ୍ରା ସମୟରେ ଶିବା ନେତୃତ୍ବରେ 11 ଜଣ ଅପରାଧୀ ରାୟଗଡା ସଦର ମହକୁମା ଠାରୁ ମାତ୍ର 5 କି.ମି ଦୂର ଲାଡ୍ଡା ଷ୍ଟେସନ ଠାରେ ତାଙ୍କୁ ଅପହରଣ କରିନେଇଥିଲେ । ଏକ ସୁରକ୍ଷିତ ସ୍ଥାନରେ ବିଭୂତି ପୂଜାରୀକୁ ରଖି ତାଙ୍କ ପିତା ପଞ୍ଚାନନ ପୂଜାରୀଙ୍କୁ ପୁଅ ଅପରହଣ ହୋଇଥିବା ସୂଚନା ଦେବା ସହ 10 ଲକ୍ଷ ଟଙ୍କା ଦାବି କରିଥିଲେ। ରାୟଗଡା ପୋଲିସ ସ୍ବତନ୍ତ୍ର ଟିମ ଗଠନ କରି 6 ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିଲା ତେବେ ଚଢ଼ାଉ ସମୟରେ ମୁଖ୍ୟ ଅଭିଯୁକ୍ତ ହଡ଼ପା ଶିବା ଫେରାର ହୋଇଯାଇଥିଲା ।
ରାୟଗଡ଼ାରୁ ରଞ୍ଜନ ରଥ, ଇଟଭି ଭାରତ
