ରାୟଗଡା: ମାଓବାଦୀଙ୍କ ତୁମୁଳ କାଣ୍ଡ । ରାସ୍ତା କାମରେ ନିୟୋଜିତ ଜେସିବି ପୋଡି ନିଜ ସ୍ଥିତି ଜାହିର କରିଛିନ୍ତି । ସବୁବେଳେ ଦୁର୍ଗମ ଅଞ୍ଚଳରେ ରାସ୍ତା କାମକୁ ବିରୋଧ କରି ପୋଡା ଜଳା କରୁଥିବାବେଳେ ଶୁକ୍ରବାର ରାତିରେ ରାସ୍ତା କାମରେ ନିୟୋଜିତ 2 ଜେସିବି ଓ ରୋଲରରେ ନିଆଁ ଲଗାଇଛନ୍ତି ।
ମୁନିଗୁଡା ବ୍ଲକ ଅମ୍ବାଦଳା ଥାନା ଅନ୍ତର୍ଗତ ଶରଧାପୁର ଠାରୁ ଥୁଆପାଡ଼ି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା ଅନ୍ତର୍ଗତ ଚାଲିଥିଲା ରାସ୍ତା କାମ । ଏହି କାମକୁ ବିରୋଧ କରି ମାଓବାଦୀ ଘଟାଇଛନ୍ତି ଲଙ୍କା କାଣ୍ଡ ।
ସୂଚନା ମୁତାବକ, ଶୁକ୍ରବାର ମଧ୍ୟ ରାତିରେ 2 ମହିଳା ସମେତ 15ରୁ ଊର୍ଦ୍ଧ୍ବ ମାଓବାଦୀ ଟିକର ପଡାରେ ଥିବା ଠିକାଦାର କ୍ୟାମ୍ପରେ ପହଞ୍ଚି ଗାଡିକୁ ଜାଳି ଦେବା ସହ 3 ଟି ହାତଲେଖା ପୋଷ୍ଟର ଛାଡିଯାଇଛନ୍ତି । ଉକ୍ତ ପୋଷ୍ଟରରେ କଟକ ଡଙ୍ଗରରେ ଥିବା ବକସାଇଟ ଖଣି କମ୍ପାନୀକୁ ଟେକିଦେବା ପାଇଁ ଏହି ରାସ୍ତା ନିର୍ମାଣ ହେଉଥିବା କହିବା ସହ ଲୋକଙ୍କ ଯିବା ଆସିବା ପାଇଁ 8 ଫୁଟର ରାସ୍ତା ନିର୍ମାଣ ପାଇଁ ଦାବି କରିଛି ବାଂଶଧାରା ଘୁମୁସର ନାଗାବଳୀ ଡିବିଜନାଲ କମିଟି (CPI ମାଓବାଦୀ) ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
