ରାୟଗଡ଼ା: କାହାପାଇଁ ପୁଷମାସ ତ ପୁଣି କାହାପାଇଁ ସର୍ବନାସ । କୋରୋନା ଆଣିଛି ଏଭଳି ଉପହାର । ସାରା ଦେଶରେ କୋରୋକୁ ନେଇ ଲକଡ଼ାଉନ, ସଟଡ଼ାଉନ ଚାଲିଥିବାବେଳେ ଏହାର ବେଶ ଫାଇଦା ନେଉଛନ୍ତି ମଦ ମାଫିଆ । ରାୟଗଡ଼ା ଜିଲ୍ଲା କାଶୀପୁର ବ୍ଲକ ଅନ୍ତର୍ଗତ ଟିକିରି ଥାନା ଅଞ୍ଚଳର ପାହାଡ଼ ସନ୍ଧିରେ ବହିଯାଉଥିବା ଝରଣା ନିକଟରେ ରନ୍ଧା ଚାଲିଛି ବେଧଡ଼କରେ ଚୋରା ଦେଶୀ ମଦ । ସେଥିପାଇଁ ସ୍ଥାନୀୟ ପୋଲସ ସହାୟତାରେ ଟିକିରି ଝୋଡ଼ିଆସାହି, ପରଜାସାହି ଏବଂ କନ୍ଧସାହିର ମହିଳାମାନେ ଏକାଠି ହୋଇ ଆରମ୍ଭ କରିଛନ୍ତିି ଅପରେସନ ବେଆଇନ ଚୋରା ମଦ ଭାଟି ଭଙ୍ଗା ଅଭିଯାନ ।
ଗୋଟିଏ ପଟେ ଲୋକଙ୍କ ପାଖରେ କାମଧନ୍ଦା ଅଭାବ ସାଙ୍ଗକୁ ଦିନ ଦିନ ଘରେ ବସି ରହିବାର ଫାଇଦା ନେଉଛନ୍ତି ଚୋରା ମଦ ବେପାରୀ । ଏବେ ଗାଁ ଗାଁରେ ଚାଲିଛି ବେଆଇନ ମଦ ଫ୍ୟାକ୍ଟ୍ରରୀ । କେଉଁଠି ପାହାଡ଼ ଖୋଲ ତ ପୁଣି କେଉଁଠି ନଦୀ ଖୋଲକୁ ବାଛି ରଖିଛନ୍ତି ସୁରକ୍ଷିତ ଜାଗା । ଦିନେକି ଅଧେ ନୁହେଁ ମାସ ମାସ ଧରି ରନ୍ଧା ଚାଲିଛି ବେଧଡ଼କରେ ଚୋରା ଦେଶୀ ମଦ । ହେଲେ ଏଥର ଚୋରା ମଦ ବେପାରୀଙ୍କୁ ପାନେ ଦେବାପାଇଁ ପୋଲିସ କି ଅବକାରୀ ବିଭାଗ ନୁହେଁ ବରଂ ଏଥର ଅଣ୍ଟା ଭିଡ଼ିଛନ୍ତି ଗାଁର ମହିଳାମାନେ ।
ବର୍ତ୍ତମାନ ସ୍ଥିତିରେ ରୋଜଗାର ନଥିବାବେଳେ ଘରର ପୁରୁଷମାନେ ଘରେ ମହଜୁଦ ଥିବା ଧାନ ମାଣ୍ଡିଆ ଚାଉଳ ବିକିବା ସହ ସ୍ତ୍ରୀ ପିଲାଙ୍କ ସୁନା ଗହଣା ବିକି ମଦ ପିଇ ଘରେ ମରାପିଟା କରୁଥିବା ମହିଳାମାନେ ଅଭିଯୋଗ ଆଣିଛନ୍ତି । ହେଲେ ପଣ କରିଛନ୍ତି ନା ରହିବ ଚୁଲି ନା ହେବ ମଦରନ୍ଧା । ମୂଳରୁ ଭାଙ୍ଗିଲେ ସବୁ ସରିବ । ଏହାର ନ୍ୟାୟରେ ମହିଳାମାନେ ପୋଲିସ ସହାୟତାରେ ଆରମ୍ଭ କରିଛନ୍ତି ଅପରେସନ ଭାଟି ଭଙ୍ଗା ଅଭିଯାନ । ଏଥିରେ ସ୍ଥାନୀୟ ପୋଲିସ ମଧ୍ୟ ସହାୟତା ଯୋଗାଇ ଦେଉଛି ।
ତେବେ ଏନେଇ ରାୟଗଡ଼ା ଏସପିଙ୍କ କହିବା କଥା ହେଲା ଏହି ଲକଡ଼ାଉନ ସମୟରେ ପୋଲିସ ପକ୍ଷରୁ ୩୮୯ ମାମଲା ରୁଜୁ କରାଯିବା ସହିତ ୧୦୦ରୁ ଊର୍ଦ୍ଧ୍ୱ ଲୋକଙ୍କୁ ଗିରଫ କରାଯାଇଛି । ତାସହ ହଜାର ହଜାର ଲିଟର ପୋଚ ସାଙ୍ଗକୁ ମଦ ମଧ୍ୟ ନଷ୍ଟ କରାଯାଇଛି । କେବଳ ପୋଲିସ କି ଅବକାରୀ ବିଭାଗ ଏହାକୁ ରୋକି ପାରିବ ନାହିଁ । ଏଥିପାଇଁ ଟିକିରି ଭଳି ଜିଲ୍ଲାର ଅନ୍ୟ ଅଞ୍ଚଳରେ ମଧ୍ୟ ସ୍ଥାନୀୟ ଲୋକ ସଚେତନ ହେବେ ତେବେ ଜିଲ୍ଲାରୁ ବେଆଇନ ଚୋରା ମଦ ଭାଟି ଅପସରିଯିବ ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
