ପୁରୀ: କୋରୋନାରୁ ରାଜ୍ୟବାସୀଙ୍କୁ ସୁରକ୍ଷିତ ରଖିବା ପାଇଁ ଲକଡାଉନ ବ୍ୟବସ୍ଥା କରିଛନ୍ତି ସରକାର । ହେଲେ ପୁରୀ ଜିଲ୍ଲା ପିପିଲିରେ କୋରୋନା କଟକଣାକୁ ମାନୁନାହାନ୍ତି ଦୋକାନୀ ଓ ଗ୍ରାହକ । କୋରୋନା ସଂକ୍ରମଣକୁ ରୋକିବା ପାଇଁ ପିପିଲି ସାପ୍ତାହିକ ହାଟକୁ ପିପିଲି ପ୍ରଶାସନ ତରଫରୁ ବନ୍ଦ କରାଯାଇଥିବା ବେଳେ ରାସ୍ତା ପାର୍ଶ୍ବରେ ପନିପରିବା ଓ ଅତ୍ୟାବଶ୍ୟକୀୟ ସାମଗ୍ରୀ ବିକ୍ରି କରିବା ପାଇଁ ଅନୁମତି ଥିଲା ।
ହେଲେ ଶୁକ୍ରବାର ପିପିଲି ହାଟ ଥିବାରୁ ହାଟ ବନ୍ଦ ଥିବା ସତ୍ତ୍ବେ ରାସ୍ତା କଡରେ ଦୋକାନୀ ଏବଂ ଗ୍ରାହକଙ୍କ ବେଶ ଭିଡ଼ ଦେଖିବାକୁ ମିଳିଥିଲା । କେହି ପାଳନ କରିନଥିଲେ ସାମାଜିକ ଦୂରତା ।
ଯେଉଁଭଳି ଲୋକଙ୍କ ଭିଡ ଲାଗି ରହିଛି ଯଦି କେହି ଜଣେ ବି କୋରୋନା ସଂକ୍ରମିତ ଥିବେ ତେବେ ବଡ଼ ସଂଘାତିକ ଅବସ୍ଥା ହେବ ବୋଲି ସ୍ଥାନୀୟ ଲୋକ କହିଛନ୍ତି । ଏହାକୁ ଦୃଷ୍ଟିରେ ରଖି ପିପିଲି ପୋଲିସ ପକ୍ଷରୁ ସଚେତନତା କରାଯିବା ସହ ଅମାନିଆଙ୍କ ଠାରୁ ଫାଇନ ଆଦାୟ କରାଯାଇଥିବା ବେଳେ ଛୋଟ ଦୋକାନୀଙ୍କ ଠାରୁ ଫାଇନ ଆଦାୟକୁ ବିରୋଧ କରିଛନ୍ତି ବ୍ୟବସାୟୀ ।
ଖୋଲା ସ୍ଥାନରେ ପ୍ରଶାସନ ବ୍ୟବସାୟ ନେଇ ବ୍ୟବସ୍ଥା କରିବା ପରିବର୍ତ୍ତେ ଛୋଟ ଉଠା ଦୋକାନୀଙ୍କୁ ପୋଲିସ ଫାଇନ କରିବା ଠିକ୍ ନୁହେଁ ବୋଲି ବ୍ୟବସାୟୀ କହିଛନ୍ତି । ଲକଡାଉନ ସମୟରେ ଲୋକଙ୍କ ପାଖରେ ରୋଜଗାର ନଥିବା ବେଳେ ପୋଲିସ ଫାଇନ ଆଦାୟ କରି ଗରିବ ଲୋକଙ୍କୁ ହଇରାଣ କରିବା ଠିକ୍ ନୁହେଁ ବୋଲି ବ୍ୟବସାୟୀ ମତ ରଖିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
