ପୁରୀ: ଲକଡାଉନ ଏବଂ କୋରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ସରକାର ଶ୍ରୀମନ୍ଦିରକୁ ଭକ୍ତଙ୍କ ପ୍ରବେଶ ଉପରେ ଲଗାଇଥିଲେ କଟକଣା । ମାର୍ଚ୍ଚ 20 ତାରିଖରୁ ଏହି କଟକଣା ଲାଗୁ ରହିଛି । ଫଳରେ ଦୀର୍ଘ ଦୁଇ ମାସରୁ ଅଧିକ ସମୟ ହେବ ଭକ୍ତମାନେ ମହାପ୍ରଭୁଙ୍କ ଦର୍ଶନ ପାଇନାହାନ୍ତି । ସେହିପରି ଭକ୍ତ ପ୍ରବେଶ କଟକଣା ପରେ ଶ୍ରୀମନ୍ଦିରର ସେବାୟତ ମଧ୍ୟ ଆର୍ଥିକ କ୍ଷତି ସହିଥିବା ଜଣାପଡିଛି । ପୁରୀ ସହରରେ ବ୍ୟବସାୟୀମାନେ ମଧ୍ୟ ପର୍ଯ୍ୟଟକଙ୍କ ଆଗମନ ବନ୍ଦ ପରେ ମୁଣ୍ଡରେ ହାତ ଦେଇ ବସିଛନ୍ତି ।
ତେବେ କେନ୍ଦ୍ର ସରକାର ଚତୁର୍ଥ ପର୍ଯ୍ୟାୟ ଲକଡାଉନ ସମାପ୍ତି ପରେ ଶ୍ରୀମନ୍ଦିରରେ ଭକ୍ତଙ୍କ ପ୍ରବେଶ କଟକଣା କୋହଳ କରିବାକୁ ସେବାୟତ ମାନେ ଦାବି କରିଛନ୍ତି । ଇତିମଧ୍ୟରେ କର୍ଣ୍ଣାଟକ ସରକାର ମନ୍ଦିର ସମେତ ମସଜିଦ ଓ ଚର୍ଚ୍ଚ ଖୋଲିବା ନେଇ ନିଷ୍ପତ୍ତି ନେଇଛନ୍ତି । ଏନେଇ କେନ୍ଦ୍ର ସରକାରଙ୍କ ଠାରୁ ଅନୁମତି ଲୋଡିଛନ୍ତି । ଏହି କ୍ରମରେ ରାଜ୍ୟ ସରକାର ମଧ୍ୟ ଶ୍ରୀମନ୍ଦିରେ ଭକ୍ତଙ୍କ ପ୍ରବେଶ ପାଇଁ କଟକଣା କୋହଳ କରିବାକୁ ସେବାୟତ ମତବ୍ୟକ୍ତ କରିଛନ୍ତି ।
କୋରୋନା ଗାଇଡଲାଇନ ଅନୁଯାୟୀ ସାମାଜିକ ଦୂରତ୍ବ ସହ ଭକ୍ତଙ୍କ ପ୍ରବେଶ ନେଇ ରାଜ୍ୟ ସରକାର ଅନୁମତି ଦେବାକୁ ସେବାୟତ ଦାବି କରିଛନ୍ତି । ପୁରୀକୁ ଭକ୍ତଙ୍କ ଆଗମନ ଫଳରେ ପୁରୀ ସହରର ଅର୍ଥନୀତି ପୁଣି ଅଣ୍ଟା ସଳଖିବା ସହ ହଜାର ହଜାର ଲୋକଙ୍କ ଜୀବନ ଜୀବିକା ଗତିଶୀଳ ହୋଇପାରିବ ବୋଲି ବରିଷ୍ଠ ସେବାୟତ ମତ ରଖିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
