ପୁରୀ: ପୁରୀ ଶ୍ରୀମନ୍ଦିରରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ ବେଳେ ଅଭାବନୀୟ ଘଟଣା । ଦର୍ଶନ ପାଇଁ ଆସିଥିବା ଜଣେ ନାବାଳିକା ଭକ୍ତ ଅଣନିଃଶ୍ବାସୀ ହୋଇ ବ୍ୟାରିକେଡ୍ ଭିତରେ ବେହୋସ ହୋଇପଡ଼ିଲେ। ଅସୁସ୍ଥ ଭକ୍ତଙ୍କୁ ଜଗନ୍ନାଥ ମନ୍ଦିର ପ୍ରାଥମିକ ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଛି । ନାବାଳିକା ଭକ୍ତଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି । ବ୍ୟାରିକେଡ୍ ଭିତରେ ଘଣ୍ଟାଘଣ୍ଟା ଧରି ଠିଆ ହୋଇ ରହୁଥିବା ଭକ୍ତମାନଙ୍କ ପାଇଁ ପ୍ରଶାସନ ପାନୀୟ ଜଳର ବ୍ୟବସ୍ଥା କରିନଥିବା ସଙ୍ଗୀନ ଅଭିଯୋଗ ହୋଇଛି ।
ଆଜି(ସୋମବାର) ପୁରୀ ଶ୍ରୀମନ୍ଦିରରେ ଦର୍ଶନ ବେଳେ ଅଭାବନୀୟ ଘଟଣା ଘଟିଛି । ଦର୍ଶନ ପାଇଁ ଆସିଥିବା ଜଣେ ନାବାଳିକା ଭକ୍ତ, ଧାଡ଼ିରେ ଅପେକ୍ଷା କରିଥିବା ବେଳେ ହଠାତ୍ ଅଣନିଃଶ୍ବାସୀ ହୋଇ ପଡ଼ିଥିଲେ । ନାବାଳିକା ଭକ୍ତ ପରିବାର ସହ ମହାପ୍ରଭୁଙ୍କୁ ଦର୍ଶନ ପାଇଁ ଆସିଥିବା ବେଳେ, ବ୍ୟାରିକେଡ଼ ଭିତରେ ବେହୋସ ହୋଇ ପଡ଼ିଥିଲେ । ମହାପ୍ରଭୁଙ୍କ ଦର୍ଶନ ପାଇଁ ଦୀର୍ଘ ସମୟ ଧରି ବ୍ୟାରିକେଡ଼ ଭିତରେ ଠିଆ ହୋଇଥିବାରୁ ସେ ବେହୋସ୍ ହୋଇପଡ଼ିଥିବା ପରିବାର ଲୋକେ ଅଭିଯୋଗ କରିଛନ୍ତି ।
ନାବାଳିକା ଜଣକ ଗଞ୍ଜାମ ଜିଲ୍ଲା ଓଡନଇ ଗାଁର । ପ୍ରବଳ ଭିଡ଼ିରେ ସେ ଅଣନିଶ୍ବାସୀ ହୋଇପଡ଼ିବା ପରେ, ତାଙ୍କୁ ଶ୍ରୀଜଗନ୍ନାଥ ମନ୍ଦିର ପ୍ରାଥମିକ ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଥିଲା । ନାବାଳିକା ଭକ୍ତଙ୍କର ସ୍ବାସ୍ଥ୍ୟାବସ୍ଥା ସ୍ଥିର ଥିବା ଜଣାପଡିଛି । ଏବେ ମହାଧାର୍ମିକ କାର୍ତ୍ତିକ ମାସ ଚାଲିଥିବାରୁ ପ୍ରତିଦିନ ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିରରେ ଅସମ୍ଭାଳ ଭିଡ଼ ହେଉଛି । ରାଜ୍ୟର ବିଭିନ୍ନ ଅଞ୍ଚଳ ସମେତ ରାଜ୍ୟ ବାହାରୁ ହଜାର ହଜାର ଭକ୍ତ ମହାପ୍ରଭୁଙ୍କ ଦର୍ଶନ ପାଇଁ ପୁରୀ ଆସୁଛନ୍ତି ।
ଭକ୍ତଙ୍କ ଶୃଙ୍ଖଳିତ ଦର୍ଶନ, ସୁରକ୍ଷା ଓ ସୁବିଧା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ହେଲେ ବ୍ୟାରିକେଡ୍ ଭିତରେ ଘଣ୍ଟା ଘଣ୍ଟା ଧରି ଠିଆ ହୋଇ ରହୁଥିବା ଭକ୍ତମାନଙ୍କ ପାଇଁ ପ୍ରଶାସନ ପାନୀୟ ଜଳର ବ୍ୟବସ୍ଥା କରିନଥିବା ସଙ୍ଗୀନ ଅଭିଯୋଗ ହୋଇଛି । ଯାହାକୁ ନେଇ ଭକ୍ତ ମହଲରେ ଅସନ୍ତୋଷ ପ୍ରକାଶ ପାଇଛି ।
ଗତ କିଛଦିନ ତଳେ ଶ୍ରୀମନ୍ଦିରରେ ଦର୍ଶନ ବେଳେ ଠେଲାପେଲା ହୋଇ 10ରୁ ଅଧିକ ଭକ୍ତ ଆହତ ହେଇଥିଲେ । କାର୍ତ୍ତିକ ମାସରେ ଭକ୍ତଙ୍କ ଅତ୍ୟଧିକ ଭିଡ଼କୁ ନିୟନ୍ତ୍ରଣ କରିବା ପାଇଁ ପୋଲିସ ପକ୍ଷରୁ ସବୁ ବ୍ୟବସ୍ଥା ହୋଇଥିବା କୁହାଯାଉଛି । ହେଲେ ଗ୍ରାଉଣ୍ଡ୍ରେ ଏହାର ଓଲଟା ଚିତ୍ର ଦେଖିବକୁ ମିଳୁଛି । ସବୁବେଳେ ଗହଳିରେ ଭକ୍ତମାନେ ବିଭନ୍ନ କାରଣରୁ ଆହତ ହେଉଛନ୍ତି । ମହାପ୍ରଭୁଙ୍କ ଧୂପ ନୀତି ବେଳେ ମନ୍ଦିର ଭିତରକୁ ଭକ୍ତଙ୍କୁ ପ୍ରବେଶ ଅନୁମତି ଦିଆଯାଉ ନାହିଁ । ଫଳରେ ହଜାରହଜାର ଭକ୍ତଙ୍କୁ ଘଣ୍ଟା ଘଣ୍ଟା ଧରି ମନ୍ଦିର ବାହାରେ ଲାଇନରେ ଛିଡ଼ା ହେବାକୁ ପଡୁଛି । ଦୀର୍ଘ ଘଣ୍ଟା ଧରି ଭିଡ଼ ଭିତରେ ଛିଡ଼ା ହେବାକୁ ପଡୁଥିବାରୁ ଭକ୍ତମାନେ ବେହୋସ୍ ହୋଇ ପଡୁଛନ୍ତି । ପୁର୍ବରୁ ଏଭଳି କଟକଣା ନଥିଲା ବୋଲି ଭକ୍ତମାନେ କହିଛନ୍ତି । ଏଣୁ ଭକ୍ତମାନେ ଭଲରେ ମହାପ୍ରଭୁଙ୍କୁ ଦର୍ଶନ କରି ଫେରୁଥିଲେ । ଧୂପ ସମୟରେ ଶ୍ରୀମନ୍ଦିର ଭିତରକୁ ପ୍ରଵେଶ ନିଷିଦ୍ଧକୁ ନେଇ ଭକ୍ତମାନେ ଅସନ୍ତୋଷ ପ୍ରକାଶ କରିଛନ୍ତି । ଧୂପ ସମୟରେ ଭକ୍ତଙ୍କୁ ପ୍ରଵେଶ ଅନୁମତି ଦେଲେ ଶ୍ରୀମନ୍ଦିର ବେଢ଼ାରେ ଥିବା ପାର୍ଶ୍ଵ ଦେବଦେବୀ ମନ୍ଦିରଗୁଡ଼ିକ ବୁଲି ପାରନ୍ତେ ଭକ୍ତ । ଫଳରେ ଭକ୍ତଙ୍କ ଭିଡ଼ ହେବ ନାହିଁ ବୋଲି କୁହାଯାଉଛି । ଏହି ଦାବି କାହିଁକି ପ୍ରଶାସନ ଶୁଣୁ ନାହିଁ ବୋଲି ସାଧାରଣରେ ପ୍ରଶ୍ନ ଉଠିଛି ।
ଇଟିଭି ଭାରତ, ପୁରୀ
