ନୟାଗଡ଼: ମାଡ଼ ମାରି ମହିଳାଙ୍କ ଗର୍ଭ ନଷ୍ଟ କଲେ ଗ୍ରାମବାସୀ । ନ୍ୟାୟ ପାଇଁ ଫତେଗଡ଼ ଥାନାର ଦ୍ବାରସ୍ଥ ହେଲେ ମହିଳା l ନୟାଗଡ଼ ଜିଲ୍ଲା ଫତେଗଡ଼ ଥାନା ରାକମା ପଞ୍ଚାୟତ ବାଦିଲୋ ଗାଁରେ ଏଭଳି ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି । ଗାଁର ନର୍ମଦା ବେହେରାଙ୍କ ସ୍ୱାମୀ ଅଯୋଧ୍ୟା ବେହେରାଙ୍କୁ ଗତକାଲି(ରବିବାର) ପଠାଣି ଜେନା ଏବଂ ତାଙ୍କ ସହଯୋଗୀମାନେ ମିଳିତ ଭାବେ ଗାଁ ଦାଣ୍ଡରେ ମାଡ଼ ମାରୁଥିଲେ ।
ନୟାଗଡରେ ଅମାନବୀୟ ଘଟଣା: ଗୋଇଠା ମାଡରେ ମହିଳାଙ୍କ ଗର୍ଭ ନଷ୍ଟ!
ଆକ୍ରମଣକାରୀଙ୍କ କବଳରୁ ସ୍ୱାମୀଙ୍କୁ ରକ୍ଷା କରିବାକୁ ନର୍ମଦା ସେଠାକୁ ଯାଇଥିଲେ । ତେବେ ଆକ୍ରମଣକାରୀମାନେ ତାଙ୍କୁ ମଧ୍ୟ ଛାଡ଼ିନଥିଲା । ନର୍ମଦାଙ୍କୁ ମଧ୍ୟ ପଠାଣି ଜେନା ଏବଂ ତାଙ୍କ ସହଯୋଗୀମାନେ ଆକ୍ରମଣ କରିଥିଲେ । ଆକ୍ରମଣକାରୀଙ୍କ ମାଡ଼ରେ ନର୍ମଦାଙ୍କ ଗର୍ଭ ନଷ୍ଟ ହୋଇଯାଇଛି । ଏନେଇ ନର୍ମଦା ଫତେଗଡ଼ ଥାନାରେ ଲିଖିତ ଅଭିଯୋଗ କରିଛନ୍ତି । ପୋଲିସ ଏହି ଘଟଣାରେ ଜଣଙ୍କୁ ଅଟକ ରଖିବା ସହ ତଦନ୍ତ ଜାରି ରଖିଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
