ନବରଙ୍ଗପୁର: ଦକ୍ଷିଣ ଓଡିଶାରେ ଜାରି ରହିଛି ଲଗାଣ ବର୍ଷା । ଏହାର ଅଧିକ ପ୍ରଭାବ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲାରେ । ଡାବୁଗାଁ ଥାନା ଜବାଗୁଡ଼ା ପଞ୍ଚାୟତ ଅନ୍ତର୍ଗତ ଦରଗୁଲା ଗ୍ରାମରେ ଭିଷଣ ବର୍ଷା ହେବା ଯୋଗୁଁ ଜଣେ ବୃଦ୍ଧଙ୍କ ଘର କାନ୍ଥ ଭୁଶୁଡି ଯାଇଛି । ଫଳରେ ଉକ୍ତ ଘରେ ବାସ କରୁଥିବା ବୃଦ୍ଧଙ୍କର ମୃତ୍ୟୁ ଘଟିଛି । ମୃତ ବୃଦ୍ଧ ଜଣକ ହେଲେ ହନୁ ଗୌଡ (75) ।
ତାଙ୍କ ସାଥିରେ ତାଙ୍କ ପୁଅ ଆଇତୁ ଓ ଜଣେ ସମ୍ପର୍କୀୟ ମଧ୍ୟ ବସିଥିଲେ । ତେବେ ଲଗାଣ ବର୍ଷାରେ ଦୁର୍ବଳ ହୋଇଯାଇଥିବା କାନ୍ଥ ହଠାତ୍ ଭୁଶୁଡ଼ି ପଡ଼ିବାରୁ ହନୁ ଗୌଡ ଉପରେ ପଡିଥିଲା । ଏଥିରେ ହନୁ ଗୁରୁତର ଆହତ ହୋଇଥିଲା । ତୁରନ୍ତ ପରିବାର ଲୋକେ 108 ଏମ୍ବୁଲାନ୍ସକୁ ଫୋନ୍ କରିଥିଲେ । କିନ୍ତୁ ଅଳ୍ପ ସମୟ ମଧ୍ୟରେ ହନୁ ଗୌଡଙ୍କର ମୃତ୍ୟୁ ଘଟିଥିଲା । କାନ୍ଥ ପଡ଼ି ମୃତ୍ୟୁ ଘଟିଥିବା ଖବର ପାଇ ଡାବୁଗାଁ ଅତିରିକ୍ତ ତହସିଲଦାର ସୁବାଷ ପୂଜାରୀ, ରେଭେନ୍ୟୁ ସୁପର ଭାଇଜର ମଙ୍ଗଳୁ ବେଶରା, ତଥା ଅନ୍ୟ କର୍ମଚାରୀ ପ୍ରମୁଖ ଘଟଣା ସ୍ଥଳରେ ପହଞ୍ଚି ମୃତକଙ୍କ ପରିବାରକୁ ସମବେଦନା ଦେଇଥିଲା ।
ଏହାସହ କ୍ଷୟକ୍ଷତି ସମ୍ପର୍କରେ ପଚାରି ବୁଝିଥିଲେ । ମୃତ ହନୁ ଗୌଡ ଏକ ଗରିବ ପରିବାରର ହୋଇଥିବାରୁ ସରକାରଙ୍କ ତରଫରୁ ଉକ୍ତ ପରିବାରକୁ ଆର୍ଥିକ ସହାୟତା ସହ ଆବାସ ଯୋଜନାରେ ଘରଟିଏ ଯୋଗାଇ ଦେବା ପାଇଁ ଦରଗୁଲା ଗ୍ରାମର ୱାର୍ଡ ମେମ୍ବର ଶିଙ୍ଗ ମାଝୀ, ମହାଦେବ ମାଝୀ ତଥା ଗ୍ରାମବାସୀ କହିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
