ରାଇରଙ୍ଗପୁର: ଠାକୁରମୁଣ୍ଡା ଥାନା ଅନ୍ତର୍ଗତ ଠାକୁରମୁଣ୍ଡା ହଂସୀ ସାହିଠାରେ ଜଣେ ଯୁବ ବ୍ୟବସାୟୀଙ୍କୁ ରସି ସାହାଯ୍ୟରେ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଛି । ସେହି ସାହିର ଚକ୍ରଧର ବେହେରାଙ୍କ ପୁଅ ଜ୍ଞାନରଞ୍ଜନ ବେହେରା(୪୮)ଙ୍କ ମୃତ ଦେହ ନିଜ ଘର ପଛପଟେ ଥିବା ଏକ ଗଛରେ ଝୁଲୁଥିବାର ଆଜି(ମଙ୍ଗଳବାର) ଭୋର ସକାଳୁ ପରିବାର ଓ ପଡ଼ୋଶୀମାନେ ଦେଖିବାକୁ ପାଇଥିଲେ । ପରେ ଠାକୁରମୁଣ୍ଡା ଥାନାରେ ଜଣାଇବା ପରେ ଥାନା ଅଧିକାରୀ ନିରୋଜ କୁମାର ସାମଲ, ଏଏସଆଇ ଅକ୍ଷୟ କୁମାର ସାହୁ ଘଟଣାସ୍ଥଳରେ ପହଞ୍ଚି ମୃତ ଜ୍ଞାନରଞ୍ଜନଙ୍କ ନିକଟରୁ ଏକ ସୁଇସାଇଡ଼ ନୋଟ ଜବତ କରିବା ସହ ମୃତଦେହକୁ ବ୍ୟବଚ୍ଛେଦ ପାଇଁ କରଞ୍ଜିଆ ଡ଼ାକ୍ତରଖାନାକୁ ପଠାଇଥିଲେ ।
ଏ ନେଇ ଠାକୁରମୁଣ୍ଡା ଥାନା ପୋଲିସ ଏକ ଅପମୃତ୍ୟୁ ମାମଲା ରୁଜ୍ଜୁ କରି ଘଟଣାର ତଦନ୍ତ ଆରମ୍ଭ କରିଛି । କିଛି ଦିନ ପୂର୍ବରୁ ପାରିବାରିକ କଳହ ଯୋଗୁଁ ଏପରି ଘଟି ଥାଇ ପାରେ ବୋଲି ଅନୁମାନ କରାଯାଉଛି । ମୃତ ଯୁବକ ଜଣକ ଘରେ କିଛିଦିନ ହେବ ଏକୁଟିଆ ରହୁଥିବା ବେଳେ ତାଙ୍କର ସ୍ତ୍ରୀ ଓ ଛୋଟ ପୁଅ ବାପଘରକୁ ଚାଲି ଯାଇଥିଲେ । ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ଘଟଣାର ସତ୍ୟାସତ୍ୟ ଜଣାପଡ଼ିବ ବୋଲି କୁହାଯାଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡ଼ା, ଇଟିଭି ଭାରତ
