କୋରାପୁଟ: କୋରାପୁଟ ମ୍ୟୁନିସିପାଲଟିର ନାହିଁ ନିଜସ୍ବ ମାନଚିତ୍ର । ସହର କେଉଁ ସ୍ଥାନଟି ପୌରପରିଷଦର ତାହା ମଧ୍ୟ ସ୍ପଷ୍ଟ ନାହିଁ । ଯାହାର ପରିଣାମ ଭୋଗୁଛନ୍ତି ସାଧାରଣ ଲୋକେ । ନିଜସ୍ବ ମାନଚିତ୍ର ନଥିବାରୁ ସାଧାରଣ ଲୋକଙ୍କୁ ପାର୍କିଂ ପାଇଁ ସ୍ଥାନଟିଏ ଯୋଗାଇ ପାରୁନାହିଁ ପୌରପରିଷଦ । ଏହାକୁ ନେଇ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି ।
କୋରାପୁଟ ବିଜ୍ଞାପିତ ପରିଷଦ ଦୀର୍ଘ 50 ତଳେ ପ୍ରତିଷ୍ଠା ହୋଇଥିଲେ । କାଳକ୍ରମେ ଏଥିରେ ଅନେକ ପରିବର୍ତ୍ତନ ଘଟି ଏହା ପୌର ପରିଷଦରେ ପରିଣତ ହୋଇଛି । ହେଲେ ଏପର୍ଯ୍ୟନ୍ତ କେଉଁ ସ୍ଥାନଟି ପୌର ପରିଷଦର ତାହା ସ୍ପଷ୍ଟ ହୋଇପାରିଲା ନାହିଁ । ଏପରିକି ପୌରପରିଷଦ ନିଜ ଜାଗାକୁ ସୁରକ୍ଷା ପ୍ରଦାନ କରିବାରେ ନିଷ୍କ୍ରିୟତା ଯୋଗୁଁ କୋରାପୁଟ ବସଷ୍ଟାଣ୍ଡ ନିକଟରେ ଥିବା ହକି ପଡିଆକୁ ପୋଲିସ ବିଭାଗ ଠାରୁ ଫେରିପାଇବାରେ ପରିଷଦ ବିଫଳ ହୋଇଥିଲା । ଯାହାକୁ ନେଇ ସମାଜସେବୀ ବିଦ୍ୟାଧର ଚୌଧୁରୀ କ୍ଷୋଭ ପ୍ରକାଶ କରିଛନ୍ତି ।
ଅନ୍ୟପଟେ ପୌରପରିଷଦର ନିର୍ଦ୍ଦିଷ୍ଟ ସ୍ଥାନ ନିରୁପିତ ହୋଇଥିବା ମାନଚିତ୍ର ପ୍ରସ୍ତୁତ କରିବା ପାଇଁ ତହସିଲ କାର୍ଯ୍ୟାଳୟ ସହିତ ଯୋଗାଯୋଗ କରାଯାଇଥିବା ପୌରପରିଷଦର ନିର୍ବାହୀ ଅଧିକାରୀ ଗୌର ଚନ୍ଦ୍ର ପଟ୍ଟନାୟକ କହିଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
