କୋରାପୁଟ: ଅନ୍ତଃସତ୍ତ୍ବା ହେବା ପରେ ଅଜଣା ପ୍ରେମିକର ପ୍ରତାରଣାର ଶିକାର ହୋଇ ପାଗଳୀ ପ୍ରାୟ ବୁଲୁଥିଲା ଯୁବତୀ । ଏପରିକି ସେମିଳିଗୁଡା ବସଷ୍ଟାଣ୍ଡରେ ପହଞ୍ଚିଥିଲାବେଳେ ନିଜ ପରିଚୟ କହି ପାରୁନଥିଲା ଯୁବତୀ। ଆତ୍ମହତ୍ୟା କରିବାକୁ ଯିବା ସମୟରେ ପେଟକଣାର ଯୁବକ ଜଳଧର ଭତ୍ରା ତାଙ୍କୁ ବାରଣ କରିଥିଲେ । ଏହା ସହ ତାଙ୍କୁ ଏକ ଚା ବଗିଚାରେ କର୍ମ ନିଯୁକ୍ତି ଦେବା ସହ ନିଜ ଘରେ ରଖିଥିଲେ । ସେ ଏବେ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି ।
ଗତକାଲି ଯୁବତୀ ଜଣକ ପେଟ ବ୍ୟଥା ହେଉଥିବା କହିବା ପରେ ଜଳଧର ତାକୁ ସୁନାବେଡା ସ୍ଥିତ ପ୍ରାଥମିକ ଚିକିତ୍ସା କେନ୍ଦ୍ରରେ ଭର୍ତ୍ତି କରିଥିଲା । ସେଠାରେ ଏକ ପୁତ୍ର ସନ୍ତାନ ଜନ୍ମ ହେବା ପରେ ଯୁବତୀ ଜଣକ ଅଧିକ ଦୁଃଖୀ ହୋଇଉଠିଥିଲା ଓ ଭୋ ଭୋ କରି କାନ୍ଦି ଉଠିଥିଲା । ପିଲାଟିକୁ ହାତରେ ଧରି କେତେବେଳେ କେହି ତାକୁ ନେଇଯିବା ପାଇଁ ସେ ଚିତ୍କାର କରିଉଠୁଥିଲା ତ ଆଉ କେତେବେଳେ ଜୀବନରେ ମାରିଦେବାକୁ ଉଦ୍ୟତ ହେଉଥିଲା ବୋଲି ତାକୁ ସେବା ଯୋଗାଉଥିବା ମହିଳା ଜଣାଇଛନ୍ତି । " ମୋ ଜୀବନ ଠିକ ନାହିଁ , ୟାକୁ ନେଇ କୁଆଡେ ଯିବି କେମିତି ପୋଷିବି" ବୋଲି ବାରମ୍ବାର ବାହୁନି ଉଠୁଥିଲା ଯୁବତୀ । ନବଜାତ ଶିଶୁର ପିତାର ପରିଚୟକୁ ନିଜ ହୃଦୟରେ ଅଜଣା କାରଣରୁ ଚାପି ରଖିଥିବା ଯୁବତୀର କ୍ରନ୍ଦନ ସମସ୍ତଙ୍କ ହୃଦୟକୁ ଦୋହଲାଇ ଦେଇଥିଲା । ତେବେ ଜଳଧର ଚାଇଲଡ଼ ଲାଇନକୁ ଖବର ଦେବା ପରେ ମା ଓ ନବଜାତ ଶିଶୁକୁ କୋରାପୁଟସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି ।
ନବଜାତ ଶିଶୁକୁ ସିଡବ୍ଲ୍ୟୁସି ସମ୍ମୁଖରେ ଉପସ୍ଥାପନ କରି କୌଣସି ଏକ ଶିଶୁ ଯତ୍ନ କେନ୍ଦ୍ରରେ ରଖାଯିବାର ବ୍ୟବସ୍ଥା କରାଯିବା ସହ ଯୁବତୀଙ୍କୁ ସଖୀର ସହଯୋଗରେ ସୁଧାର କେନ୍ଦ୍ରରେ ପୁନର୍ବାସ କରାଯିବ ବୋଲି ଜିଲ୍ଲା ଶିଶୁ ସୁରକ୍ଷା ଅଧିକାରୀ ରାଜଶ୍ରୀ ଦାସ ଜଣାଇଛନ୍ତି । ତେବେ ଯୁବତୀର ଦୀର୍ଘସ୍ଥାୟୀ ରକ୍ଷଣାବେକ୍ଷଣ କରିବା ପାଇଁ ସରକାରଙ୍କ କୌଣସି ଏକ ଯୋଜନାରୁ ସହାୟତା ପ୍ରଦାନ କରି ବାସଗୃହ ଓ ଜୀବିକାର ବ୍ୟବସ୍ଥା କରିବା ପାଇଁ ସାଧାରଣରେ ଦାବି ହୋଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
