କୋରାପୁଟ: କୋଭିଡ ବିରୁଦ୍ଧରେ ସଂଗ୍ରାମ କରିବା ପାଇଁ କୋରାପୁଟରେ ଆମ୍ବୁଲାନ୍ସ , ଭେଣ୍ଟିଲେଟର ତଥା ଅନ୍ୟାନ୍ୟ ସ୍ବାସ୍ଥ୍ୟ ଯୋଗାଣକାରୀ ସରଞ୍ଜାମର ଆବଶ୍ୟକତାକୁ ଦେଖି ଗତ ମାର୍ଚ୍ଚ ମାସରେ କୋରାପୁଟ ସାଂସଦ ସପ୍ତଗିରି ଉଲାକା କୋରାପୁଟ ଜିଲ୍ଲା ପ୍ରଶାସନକୁ ସାଂସଦ ପାଣ୍ଠିରୁ 50 ଲକ୍ଷ ଟଙ୍କା ଦେଇଥିଲେ । କିନ୍ତୁ ଏହି ଅର୍ଥ ଖର୍ଚ୍ଚ ନ ହେବା ନେଇ ସାଂସଦ ନିକଟ ଅତୀତରେ ତୀବ୍ର ଅସନ୍ତୋଷ ବ୍ୟକ୍ତ କରିଥିଲେ ।
ତେବେ ଆମ୍ବୁଲାନ୍ସ ଚଳାଇବା ପାଇଁ ଆନୁସଙ୍ଗିକ ଖର୍ଚ୍ଚ ରହୁଥିବା ଯୋଗୁଁ ରାଜ୍ୟ ସରକାରଙ୍କ ନିର୍ଦ୍ଦେଶ ଅନୁଯାୟୀ ନୂତନ ଆମ୍ବୁଲାନ୍ସ କିଣା ନଯାଇ ବେସରକାରୀ ଆମ୍ବୁଲାନ୍ସକୁ ଆବଶ୍ୟକ ସ୍ଥଳେ ବ୍ୟବହାର କରୁଥିବା ଜିଲ୍ଲାପାଳ ମଧୁସୂଦନ ମିଶ୍ର ସ୍ପଷ୍ଟ କରିଛନ୍ତି । କିନ୍ତୁ ରାୟଗଡା ଜିଲ୍ଲାରେ ଏହି ଅର୍ଥର ସୁବିନିଯୋଗ ହୋଇ ସାରିଥିବା ବେଳେ କୋରାପୁଟ ଜିଲ୍ଲାରେ ସରକାରଙ୍କ ଏପରି ଅଲଗା ନୀତି ଉପରେ କଂଗ୍ରେସ ଦଳର ବରିଷ୍ଠ ନେତା ତଥା ମାଲକାନଗିରି ର ପୂର୍ବତନ ବିଧାୟକ ନିମାଇଁ ସରକାର ପ୍ରଶ୍ନ କରିଛନ୍ତି ।
କୋଭିଡ ଭଳି ଏକ ମହାମାରୀ ସହିତ ଲଢେଇ କରୁଥିବା ସମୟରେ ଲୋକଙ୍କ ଆବଶ୍ୟକତାକୁ ପୂରଣ କରିବା ପାଇଁ ଲାଭ କ୍ଷତି ଦେଖିବା ଠିକ ନୁହେଁ ବୋଲି ସେ ମତ ରଖିଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
