ଭୁବନେଶ୍ବର: OLX ସପିଙ୍ଗ୍ ସାଇଟରେ ଠକେଇ । OLX ରେ ମିଛ ବିଜ୍ଞାପନ ଦେଇ ଲୋକଙ୍କୁ ଲଗାଉଥିଲେ ଚୂନ। ଏନେଇ ଅଭିଯୁକ୍ତ ଆଶିଷ ଜେନାଙ୍କୁ ଗିରଫ କରିଛି ସାଇବର ଥାନା ପୋଲିସ । ଏଥିସହ ଯେଉଁ ସିମ କାର୍ଡ, ମୋବାଇଲ, ୱାକୀଟକି ବ୍ରଡବ୍ୟାଣ୍ଡ ଓ ପାସ୍ବୁକ ବ୍ୟବହାର କରି ଲୋକଙ୍କୁ ଠକିଥିଲା ସେସବୁ ଜବତ କରିଛି ପୋଲିସ । ଆଶିଷ ମୋଟ ୨ ଲକ୍ଷ ଟଙ୍କା ଠକେଇ କରିଥିବା ନେଇ ପୋଲିସ ପକ୍ଷରୁ ସୂଚନା ମିଳିଛି।
ଦିନକୁ ଦିନ ସାଇବର ଠକେଇ ଘଟଣା ବଢ଼ିବାକୁ ଲାଗିଥିବା ବେଳେ ବିଭିନ୍ନ ବାଟରେ ଠକ ମାନେ ଲୁଟି ନେଉଛନ୍ତି ଲକ୍ଷଲକ୍ଷ ଟଙ୍କା । ଏହି ଠକାମୀ ବର୍ତ୍ତମାନ କେବଳ ଅନଲାଇନ୍ ଆପରେ ସୀମିତ ରହି ନାହିଁ । ଅନ୍ୟାନ୍ୟ ମାଧ୍ୟମରେ ଠକେଇ କରିବାର ଅନେକ ଉଦାହରଣ ମଧ୍ୟ ସାମ୍ନାକୁ ଆସୁଛି । ସେହିଭଳି ଗୋଟିଏ ଠକକୁ ଆଜି ଭୁବନେଶ୍ୱର ସାଇବର ଥାନା ପୋଲିସ ଗିରଫ କରିଛି । OLX ମାଧ୍ୟମରେ ଲୋକଙ୍କୁ ଯୋଗାଯୋଗ କରି ଆଶିଷ ଜେନା ନାମକ ଏହି ଠକ ଲୁଟୁଥିଲା ଟଙ୍କା । OLXରେ ସେକେଣ୍ଡ ହ୍ୟାଣ୍ଡ ମୋବଇଲର ମିଛ ବିଜ୍ଞାପନ ଦେଇ ଆଶିଷ ଲୋକଙ୍କୁ ଠକୁଥିଲେ ।
ଅନଲାଇନ ବିଜ୍ଞାପନ ଦେଖି ଯେତେବେଳେ ଲୋକମାନେ ଦୋକାନରୁ ସେକେଣ୍ଡ ହ୍ୟାଣ୍ଡ ମୋବାଇଲ କିଣୁଥିଲେ ଓ ଟଙ୍କା ଦେଉଥିଲେ ସେତେବେଳେ ଆଶିଷଙ୍କ ପାଖକୁ ଆସୁଥିଲା ଟଙ୍କା । ବିଭିନ୍ନ ବାର୍ କୋଡ ବ୍ୟବହାର କରି ମାଲାମାଲ ହେଉଥିଲେ ଆଶିଷ । ବିଭିନ୍ନ ଉପାୟରେ ଲୋକଙ୍କୁ ଚୂନ ଲଗାଇ ବେଆଇନ ଉପାୟରେ ଅର୍ଜନ କରୁଥିଲା ଲକ୍ଷଲକ୍ଷ ଟଙ୍କା । OLXରେ ଆକାଉଣ୍ଟ ଖୋଲି ଦାମୀ ମୋବାଇଲର ବିଜ୍ଞାପନ ଦେଇ ଲୋକଙ୍କୁ ଯୋଗାଯୋଗ କରି ପରେ ସବୁ ଟଙ୍କା ଆତ୍ମସାତ କରୁଥିଲା ଅଭିଯୁକ୍ତ ।
ସୂଚନା ମୁତାବକ,ଆଶିଷ ବଡ ଚଞ୍ଚକତାର ସହ ମୋବାଇଲ ଦୋକାନ ସହ ଯୋଗାଯୋଗ କରି ଫୋନ ସମ୍ବନ୍ଧରେ ତଥ୍ୟ ନେଉଥିଲେ । ଆଉ ସେହି ମୋବାଇଲକୁ OLXରେ ପକାଉଥିଲେ । ଲୋକମାନେ ଯେତେବେଳେ ମନୋନୀତ ଫୋନ ଆଣିବାକୁ ଯାଉଥିଲେ ସେ ଦେଇଥିବା ବାରକୋଡ଼ରେ ଟଙ୍କା ପଠାଇବାକୁ କହୁଥିଲେ । ଯେତେବେଳେ ଦୋକାନୀ ଫୋନ୍ ଦେଇନଥାନ୍ତି ସେତେବେଳେ ଗ୍ରାହକ ଓ ଦୋକାନୀ ଭିତରେ ବଚସା ହେଉଥିଲା । ଆଉ ଦୋକାନୀ ଓ ଆଶିଷ ମିଶି ଠକୁଛନ୍ତି ବୋଲି ଅଭିଯୋଗ କରୁଥିଲେ ଗ୍ରାହକ ।
ଏହାଙ୍କୁ ନେଇ ଗ୍ରାହକ ଓ ଦୋକାନୀଙ୍କ ପକ୍ଷରୁ ୩ଟି ମାମଲା ରୁଜୁ ହେବା ପରେ ଅଭିଯୁକ୍ତକୁ ଧରିଛି ପୋଲିସ । ଖାଲି ସେତିକି ନୁହେଁ ପ୍ରତିଥର ଆଶିଷ ନିଜର ବାରକୋଡ଼ ପରିବର୍ତ୍ତନ କରୁଥିଲେ । କାରଣ ଗୋଟିଏ ଜାଗାରୁ ଧରାପଡ଼ିଗଲା ପରେ ସେ ସେହି ବାରକୋଡ଼ ପୁନଃ ବ୍ୟବହାର କରୁନଥିଲେ । ସବୁଠାରୁ ବଡ କଥା ହେଉଛି ବଡ ବୁଦ୍ଧିମାନର ସହ ୧୦୦ ଓ ୨୦୦ ଟଙ୍କା ଦେଇ ଦୋକାନୀ ହେଉ ଅବା ତାଙ୍କସାଙ୍ଗ ସାଥୀଙ୍କ ଠାରୁ ବାରକୋଡ଼ ନେଇ ପ୍ରତିଥର ନୂଆ ବାରକୋଡର ବ୍ୟବହାର କରୁଥିଲେ ଆଶିଷ ।
ତେବେ ଏନେଇ ସାଇବର ଥାନାରେ ଦୋକାନୀ ଓ ଠକାମୀ ଶିକାର ହୋଇଥିବା ୩ ଜଣ ବ୍ୟକ୍ତିଙ୍କ ଅଭିଯୋଗ ପରେ ଆଶିଷଙ୍କୁ ବାନ୍ଧିଛି ସାଇବର ଥାନା ପୋଲିସ। ତେବେ ଆଶିଷ ଏକ ସଂଭ୍ରାନ୍ତ ଶ୍ରେଣୀର ଘରୁ ଆସିଥିବା ବେଳେ ସେ ରାଜ୍ୟ ପାଇଁ 19 ବର୍ଷରୁ କମ୍ ଦଳରେ କ୍ରିକେଟ ଖେଳୁଥିଲେ । ତେବେ କାହିଁକି ଓ କେଉଁ ପରିସ୍ଥିତିରେ ସେ ଏଭଳି ଠକେଇ କରୁଥିଲେ ସେନେଇ ଆଶିଷଙ୍କୁ ଅଧିକ ପଚରାଉଚରା କରିବା ସହ ତଦନ୍ତ ଜାରି ରଖିଛି ସାଇବର ଥାନା ପୋଲିସ ।
ଇଟିଭି ଭାରତ, ଭୁବନେଶ୍ବର
