ଭୁବନେଶ୍ବର: ବହୁ ପ୍ରତୀକ୍ଷିତ ମେଟ୍ରୋ ରେଳ ପ୍ରକଳ୍ପ ନିର୍ମାଣ ପ୍ରସଙ୍ଗ । ରାଜ୍ୟ ସରକାଙ୍କୁ ଟାର୍ଗେଟ କରି ବର୍ଷିଲା ବିଜେପି । ସୂଚନା ଅନୁସାରେ, ବହୁ ପ୍ରତୀକ୍ଷିତ ଭୁବନେଶ୍ବର ମେଟ୍ରୋ ରେଳ ପ୍ରକଳ୍ପକୁ ରାଜ୍ୟ ସରକାର ନିଜସ୍ବ ଖର୍ଚ୍ଚରେ ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି । ଏଥିପାଇଁ ୫ ହଜାର ୯୨୯ କୋଟି ଟଙ୍କା ଖର୍ଚ୍ଚ ହେବ ବୋଲି ଆକଳନ କରାଯାଇଛି । ଏଥିପାଇଁ ଡିପିଆରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅନୁମୋଦନ କରିଛନ୍ତି । ୨୦୨୪ ମସିହା ଜାନୁଆରୀ ୧ ତାରିଖରେ ମୁଖ୍ୟମନ୍ତ୍ରୀ ମେଟ୍ରୋ ରେଳ ପ୍ରକଳ୍ପର ଶିଳାନ୍ୟାସ କରିବା ନେଇ ମଧ୍ୟ ସ୍ଥିର କରାଯାଇଛି ।
ଏହାକୁ ନେଇ ପ୍ରତିକ୍ରିୟାରେ ବିଜେପି ମୁଖପାତ୍ର ବିରଞ୍ଚି ନାରାୟଣ ତ୍ରିପାଠୀ କହିଛନ୍ତି, "ଓଡ଼ିଶାରେ ମେଟ୍ରୋର ଆବଶ୍ୟକତା ବିଶେଷ କରି କଟକ ଭୁବନେଶ୍ୱର ଅଛି । କିନ୍ତୁ ରାଜ୍ୟ ସରକାର ଯେତେବେଳେ ନିର୍ବାଚନ ଆସେ ସେ ସମୟରେ ଅନେକ ଘୋଷଣା କରନ୍ତି । ସେ ଘୋଷଣା ସହ ଅନେକ ନିର୍ବାଚନ ପୂର୍ବରୁ ମୃତ୍ୟୁ ହୋଇଥାଏ । ଆଉ ଯାହା ବାକି ଥାଏ ନିର୍ବାଚନ ପରେ ସମାପ୍ତ ହୋଇଥାଏ । ରାଜ୍ୟ ସରକାର ଠିକ୍ ଭାବରେ ଗୋଟେ ଓଭର ବ୍ରିଜ ତିଆରି କରି ପାରୁ ନାହାନ୍ତି । ଆମେ ପୂର୍ବରୁ ଦେଖିଛୁ ଭୁବନେଶ୍ଵରରେ ବମିଖାଲ ଓଭର ବ୍ରିଜ କେମିତି ତିଆରି ହେଲା, କେମିତି ଦୁର୍ଘଟଣା ଘଟିଲା । ସମ୍ପୂର୍ଣ୍ଣ ଭାବରେ ଏୟାରପୋର୍ଟ ଠାରୁ ଆରମ୍ଭ କରି ତ୍ରିଶୂଳିଆ ପର୍ଯ୍ୟନ୍ତ ଉପରେ ଉପରେ ମେଟ୍ରୋ ନେବାକୁ ରାଜ୍ୟ ସରକାର କେତେ ସଫଳ ହେବେ ତାକୁ ନେଇ ସନ୍ଦେହ ରହିଛି । ବମିଖାଲ ଓଭର ବ୍ରିଜର ମଧ୍ୟ ଡିପିଆର, ସଏଲ ଟେଷ୍ଟ, ହୋଇ ନଥିଲା କି ? କାହିଁକି ଠିକରେ କାମ ହେଲା ନାହିଁ?" ବୋଲି ପ୍ରଶ୍ନ କରିଛନ୍ତି ବିରଞ୍ଚି ।
ଏହା ବି ପଢନ୍ତୁ...ମେଟ୍ରୋ ରେଲ୍ DPRକୁ ଅନୁମୋଦନ, ଜାନୁଆରୀ 1ରେ ଶିଳାନ୍ୟାସ କରିବେ ମୁଖ୍ୟମନ୍ତ୍ରୀ
ସେ ଆହୁରି ମଧ୍ୟ କହିଛନ୍ତି, "ରାଜ୍ୟ ସରକାର ନିର୍ବାଚନକୁ ଦେଖି ଏପରି ଘୋଷଣା କରିଛନ୍ତି । ପୁରୀରୁ କଟକ ପର୍ଯ୍ୟନ୍ତ ବନ୍ଦେ ମେଟ୍ରୋ ଯୋଜନା କାର୍ଯ୍ୟକାରୀ ପାଇଁ ରେଳ ମନ୍ତ୍ରୀ ଘୋଷଣା କଲା ପରେ ରାଜ୍ୟ ସରକାର ତରବରିଆ ଭାବେ ଏହା କରୁଛନ୍ତି । କିନ୍ତୁ କାର୍ଯ୍ୟ ଠିକ୍ ହେଲେ ଆମେ ତାକୁ ସ୍ୱାଗତ କରିବା ।" ସୂଚନା ଅନୁସାରେ, ଶନିବାର ମୁଖ୍ୟମନ୍ତ୍ରୀ ଏହାର ସମୀକ୍ଷା କରିଛନ୍ତି । ଏହାକୁ 5T ନୀତିରେ ନିର୍ମାଣ କରିବାକୁ ସ୍ଥିର କରାଯାଇଛି। ଚଳିତ ଅତିରିକ୍ତ ବଜେଟ୍ରେ ଏଥିପାଇଁ ୨୧୦କୋଟି ବରାଦ ହୋଇଥିବାରୁ ଏହି ପ୍ରକଳ୍ପ କାମ ଜାନୁଆରୀ ମାସରୁ ହିଁ ଆରମ୍ଭ ହେବ । ଏହି ପ୍ରକଳ୍ପ ପାଇଁ କିପରି ଶୀଘ୍ର ଟେଣ୍ଡର ପ୍ରକ୍ରିୟା ଆରମ୍ଭ ହେବ ଏବଂ ବିଭିନ୍ନ କାର୍ଯ୍ୟ ତ୍ବରାନ୍ବିତ କରାଯାଇପାରିବ, ସେଥିପାଇଁ ଉନ୍ନୟନ କମିଶନର ଅନୁ ଗର୍ଗଙ୍କ ନେତୃତ୍ବରେ ଏକ ଉଚ୍ଚସ୍ତରୀୟ କମିଟି ଗଠନ ହୋଇଛି।
ଇଟିଭି ଭାରତ, ଭୁବନେଶ୍ବର
