ଭୁବନେଶ୍ବର: ଓଡିଶା ପୋଲିସ ଉପରେ ମୋର ଆଉ ବିଶ୍ବାସ ଭରଷା ନାହିଁ । ସରକାର ଦେଇଥିବା ବ୍ୟକ୍ତିଗତ ସୁରକ୍ଷାକର୍ମୀଙ୍କୁ ଫେରାଇ ଦେଉଛି । ଓଡିଶା ପୋଲିସର କୌଣସି ସୁରକ୍ଷା ନେବି ନାହିଁ । ଓଡିଶା ପୋଲିସ ରାଜନୈତିକ ଦଳର କର୍ମୀ ଭାବେ କାମ କରୁଛି । ତେଣୁ ପୋଲିସ ଉପରେ ଭରଷା ନାହିଁ । ଦିବଂଗତ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ନେଇ ରାଜ୍ୟ ସରକାରଙ୍କୁ ଆକ୍ରମଣ ଜାରି ରଖିଥିବା ବିରୋଧୀ ଦଳନେତା ଜୟ ନାରାୟଣ ମିଶ୍ର ଆଜି ଏହି ବଡ ଘୋଷଣା କରିଛନ୍ତି ।
ଏକ ପ୍ରେସମିଟ କରି ଜୟ କହିଛନ୍ତି ‘‘ ଓଡ଼ିଶା ପୋଲିସ ଉପରେ ମୋର ଆଉ ବିଶ୍ବାସ ନାହିଁ, ମୁଁ ମୋ ସୁରକ୍ଷାକର୍ମୀଙ୍କୁ ଫେରାଇ ଦେଉଛି । ଓଡିଶା ପୋଲିସର କୌଣସି ସୁରକ୍ଷା ନେବି ନାହିଁ । ଓଡିଶା ପୋଲିସ ରାଜନୈତିକ ଦଳର କର୍ମୀ ଭାବେ କାମ କରୁଛି । ତେଣୁ ପୋଲିସ ଉପରେ ଭରଷା ନାହିଁ ।’’ ସେହିପରି ଜୟ ଆଜି ପୁଣି ନବ ଦାସଙ୍କ ହତ୍ୟାକାଣ୍ଡକୁ ନେଇ ସଂଗୀନ ଅଭିଯୋଗ ଆଣି କହିଛନ୍ତି କ୍ରାଇମବ୍ରାଞ୍ଚ ତଦନ୍ତ ଉପରେ ଆମର ଭରଷା ନାହିଁ । ଏମାନେ(କ୍ରାଇମବ୍ରାଞ୍ଚ) ପ୍ରତିଦିନ ନୂଆନୂଆ ଆଇ ମା କାହାଣି ଶୁଣାଉଛନ୍ତି ।
ନବଦାସଙ୍କ ହତ୍ୟା ଏକ ସାମନ୍ୟ ଘଟଣା ନୁହେଁ । ସେ ରାଜ୍ୟର ଜଣେ ବରିଷ୍ଠ ମନ୍ତ୍ରୀ ଥିଲେ । ତାଙ୍କ ହତ୍ୟାକୁ ନେଇ ହୋଇଥିବା ଷଡଯନ୍ତ୍ରର ପର୍ଦ୍ଦାଫାସ ହେବା ଜରୁରୀ । ମର୍ଡର ମିଷ୍ଟ୍ରି ଉପରୁ କେବେ ପରଦା ହଟିବା ତାହାକୁ ଚାହିଁ ବସିଛନ୍ତି ରାଜ୍ୟବାସୀ ।
ସେହିଭଳି ଜୟ ରାଜ୍ୟ ସରକାରଙ୍କୁ ପ୍ରଶ୍ନ କରି କହିଛନ୍ତି ନବ ଦାସଙ୍କୁ ଗୁଳିକାଣ୍ଡ ପରେ ଝାରସୁଗୁଡା ହସ୍ପିଟାଲର ଭର୍ତ୍ତି କରାଯାଇଥିଲା । ସେଠାକାର ଇସିଜି ରିପୋର୍ଟ ଏବଂ ସେହି ସମୟରେ ତାଙ୍କର ସ୍ବାସ୍ଥ୍ୟଗତ ଅବସ୍ଥା କେମିତି ଥିଲା ତାହା ସାର୍ବଜନୀନ କରାଯାଉ । ସେ କହିଛନ୍ତି, "ନବ ଦାସ ଏୟାରଲିଫ୍ଟ ହେବାକୁ ଯୋଗ୍ୟ ଥିଲେ କି ନାହିଁ ତାର ମଧ୍ୟ ସାର୍ଟିଫିକେଟ, ଝାରସୁଗୁଡା ଏୟାରପୋର୍ଟ ଅଥରିଟି ଦେବାର ଆବଶ୍ୟକତା ରହିଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା ଆପୋଲୋ ହସ୍ପିଟାଲରେ ନବ ଦାସଙ୍କୁ ଯେତେବେଳେ ଅଣାଗଲା କଣ ପାଇଁ ମୁଖ୍ୟମନ୍ତ୍ରୀ ନମସ୍କାର କରିଥିଲେ ? ଜଣେ ଲୋକ ବଞ୍ଚିଛି ଏବଂ ବୟସରେ ଛୋଟ ନବ ଦାସ ହେଲେ ତାଙ୍କୁ କାହିଁକି ନମସ୍କାର କଲେ ମୁଖମନ୍ତ୍ରୀ । ଏହା ହେଉଛି ପୃଥିବୀରେ ପ୍ରଥମ ଘଟଣା ଯେ ମୃତ ବ୍ୟକ୍ତି ଉପରେ ଅସ୍ତ୍ରୋପଚାର କରାଯାଇଛି । ଲୋକଙ୍କୁ ଦେଖାଇବା ପାଇଁ ଅସ୍ତ୍ରୋପଚାର କରାଯାଇଛି ଏହାର ତଦନ୍ତ ହେବା ଦରକାର ।"
ରାଜ୍ୟ ସରକାର ଏହି ହତ୍ୟାକାଣ୍ଡକୁ ଚାପି ଦେବାକୁ ଯୋଜନା କରିଥିବା ଅଭିଯୋଗ ହୋଇଛି । ଘଟଣାର ନିରପେକ୍ଷ ଓ ସିବିଆଇ ତଦନ୍ତ ଦାବି କରିଛନ୍ତି ବିରୋଧୀ ଦଳନେତା ଜୟନାରାୟଣ ମିଶ୍ର ।
ଏହା ବି ପଢନ୍ତୁ...Naba Das Death Case: କ୍ରାଇମବ୍ରାଞ୍ଚକୁ ମିଳିଲା ନବ ଦାସଙ୍କ ଜୀବନ ନେଇଥିବା ଗୁଳି
ସୂଚନାଯୋଗ୍ୟଯେ ଜାନୁଆରୀ 29 ରେ ନବ ଦାସଙ୍କୁ ଝାରସୁଗୁଡା ବ୍ରଜରାଜନଗରରେ ଗୁଳିମାଡ ହୋଇଥିଲା । ଗୁଳିମାଡ କରିଥିଲେ ପୋଲିସ ଏଏସଆଇ । ସେହିଦିନ ସଂଧ୍ଯାରେ ନବ ଦାସଙ୍କ ଦେହାନ୍ତ ହୋଇଥିଲା ।
ଇଟିଭି ଭାରତ, ଭୁବନେଶ୍ବର
