କେନ୍ଦୁଝର: ପାଟଣା ବ୍ଲକରେ ଦେଖିବାକୁ ମିଳିଛି ଅଭାବନୀୟ ଘଟଣା । ବିଲ ପାସ ନକରିବାରୁ ପଞ୍ଚାୟତ ଅଧିକାରୀଙ୍କୁ ତାଲା ପକାଇଲେ ଜିଲ୍ଲା ପରିଷଦ ସଦସ୍ୟା । ପାଟଣା ବ୍ଲକ ଅନ୍ତର୍ଗତ କେନ୍ଦେଇପଶି ପଞ୍ଚାୟତରେ ଏପରି ଘଟଣାକୁ ନେଇ ଉତ୍ତେଜନା ଦେଖାଦେଇଛି । ବିଲ ପାସ ନ କରିବାରୁ କେନ୍ଦେଇପଶି ପଞ୍ଚାୟତର ସହକାରୀ ଯନ୍ତ୍ରୀ ମୋନାଲିସା ଚକ୍ର ଓ ଗ୍ରାମ ରୋଜଗାର ସେବକ ନିର୍ମଳ ମହାନ୍ତଙ୍କୁ ପଞ୍ଚାୟତ କାର୍ଯ୍ୟାଳୟରେ ଜିଲ୍ଲା ପରିଷଦ ସଦସ୍ୟା ଡଲି ପାତ୍ର ତାଲା ପକାଇଥିବା ଜଣାପଡିଛି ।
ସୂଚନା ଅନୁସାରେ ଜିଲ୍ଲା ପରିଷଦ ପାଣ୍ଠିରୁ କାମ କରିଥିବା ବିଲକୁ ପାସ ନ କରିବାରୁ ଆଜି ପଞ୍ଚାୟତକୁ ସହକାରୀ ଯନ୍ତ୍ରୀ ଆସିଥିବାବେଳେ ତାଲା ପକାଇଛନ୍ତି ଜିଲ୍ଲା ପରିଷଦ ସଦସ୍ୟା ଡଲି ପାତ୍ର । ବିଲ ପାସ କରିବାକୁ ସହକାରୀ ଯନ୍ତ୍ରୀ ପିସି ମାଗିଥିବା ଅଭିଯୋଗ ମଧ୍ୟ କରିଛନ୍ତି ଜିଲ୍ଲା ପରିଷଦ ସଦସ୍ୟା । ତାଲା ପକାଇଥିବା ଖବର ପାଇ ତୁରୁମୁଙ୍ଗା ପୋଲିସ ପହଞ୍ଚି ତାଲା ଖୋଲିବା ସହ ବୁଝାମଣା ପରେ ପରିସ୍ଥିତି ଶାନ୍ତ ହୋଇଥିବା ଜଣାପଡିଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
