ଫୁଲବାଣୀ: ଜିଲ୍ଲାରେ ମର୍ମନ୍ତୁଦ ସଡକ ଦୁର୍ଘଟଣା । ଏକ ବାଇକ୍ ସ୍କୁଟି ମଧ୍ୟରେ ମୁହାଁମୁହିଁ ଧକ୍କା ହେବାରୁ ଚାଲିଗଲା ଦୁଇ ଜୀବନ । ମୃତକମାନେ ହେଲେ ଲିଙ୍ଗାଗଡ କନ୍ୟାଶ୍ରମ ସ୍କୁଲର ଶିକ୍ଷୟତ୍ରୀ ପ୍ରଦିପ୍ତା ସାହୁ ସେହି ସ୍କୁଲର କିରାଣି ବିମଳା ପ୍ରଧାନ ।
ସୂଚନାଅନୁସାରେ, ସବୁଦିନ ପରି ଗତକାଲି ସକାଳେ ମଧ୍ୟ ସ୍କୁଟି ଯୋଗେ ଜି. ଉଦୟଗିରିରୁ ଲିଙ୍ଗାଗଡ କନ୍ୟାଶ୍ରମକୁ ବାହାରିଥିଲେ ଶିକ୍ଷୟତ୍ରୀ ପ୍ରଦୀପ୍ତା ସାହୁ ଏବଂ କିରାଣୀ ବିମଳା ପ୍ରଧାନ । ଆଉ ତିନି କିମି ଯାଇଥିଲେ ସ୍କୁଲରେ ପହଞ୍ଚିଥାନ୍ତେ । କିନ୍ତୁ ବାଟରେ କାଳ ଯେପରି ଛକି ବସିଥିଲା । ସ୍କୁଲ ପହଞ୍ଚିବା ପୂର୍ବରୁ ସମ୍ମୁଖରୁ ଏକ ପଲସର ବାଇକ ଧକ୍କା ଦେବା ଫଳରେ ଉଭୟେ ରାସ୍ତା ଉପରେ ଛିଟିକି ପଡିଥିଲେ। ଫଳରେ ସ୍ଥାନୀୟ ଲୋକେ ଆହତମାନଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲେ । ତେବେ ହସ୍ପିଟାଲରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ତେବେ ଏହି ଦୁର୍ଘଟଣାରେ ବାଇକ୍ ଚାଳକ ମଧ୍ୟ ଗୁରୁତର ଆହତ ଥିବାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି ।
ଦୁର୍ଘଟଣାରେ ମୃତ୍ୟୁବରଣ କରିଥିବା ମହିଳାମାନେ ହେଲେ ଲିଙ୍ଗାଗଡ କନ୍ୟାଶ୍ରମ ସ୍କୁଲର ଶିକ୍ଷୟତ୍ରୀ ପ୍ରଦିପ୍ତା ସାହୁ (୩୪), ଏବଂ କିରାଣୀ ବିମଳା ପ୍ରଧାନ (୪୦) । ଖବରପାଇ ଜି. ଉଦୟଗିରି ଥାନା ଅଧିକାରୀ ଅଜୟ କୁମାର ସ୍ୱାଇଁ ଦୁର୍ଘଟଣାସ୍ଥଳ ସହିତ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ତଦନ୍ତ ଅଧିକାରୀ ଏସଆଇ ଅନନ୍ତ ପ୍ରଧାନ କେସ ୧୫୨/୨୨ରେ ରୁଜୁ କରି ୨ ବାଇକ୍ ଜବତ କରିଛନ୍ତି ।
ଇଟିଭି ଭାରତ, କନ୍ଧମାଳ
