ଭବାନୀପାଟଣା: ଇନ୍ଦ୍ରାବତୀ କେନାଲରେ ସୃଷ୍ଟି ହେଲା ଘାଇ । ଫଳରେ ଶହ ଶହ ହେକ୍ଟର ଚାଷ ଜମି ଏବେ ଜଳମଗ୍ନ ହୋଇ ରହିଛି । କଳାହାଣ୍ଡି ଜିଲ୍ଲା ଇନ୍ଦ୍ରାବତୀରୁ ଉଠାଜଳସେଚନ ମାଧ୍ୟମରେ ଜିଲ୍ଲାର କୋକସରା ଓ ଧର୍ମଗଡ ବ୍ଲକର ବିଭିନ୍ନ ଚାଷଜମିକୁ ପାଣି ଯୋଗାଇବା ପାଇଁ ପ୍ରଥମଥର ପାଇଁ ପାଣି ଛଡା ଯାଇଥିଲା । ହେଲେ ଜଳଭଣ୍ଡାରର ପ୍ରଥମ ବନ୍ୟାଜଳ ନିଷ୍କାସନରେ ଭାଙ୍ଗିଯାଇଥିଲା କେନାଲ ବନ୍ଧ । ଫଳରେ ଶହ ଶହ ହେକ୍ଟର ଚାଷଜମି ଏବେ ଜଳମଗ୍ନ ହୋଇଛି ।
କୋକସରା ବ୍ଲକର ମାଝୀଗୁଡା ନିକଟରେ ବିଳମ୍ୱିତ ରାତିରେ ଓଭର ଫ୍ଲୋ ପାଣି କେନାଲ ଦେଇ ପ୍ରବାହିତ ହେଉଥିବା ସମୟରେ କେନାଲବନ୍ଧ ଭାଙ୍ଗିଯାଇଥିବା ଜଣାପଡିଛି । ତେବେ ସ୍ଥାନୀୟ ଚାଷୀ ନିମ୍ନ ମାନର କାମ ଯୋଗୁଁ କେନାଲ ବନ୍ଧ ଭାଙ୍ଗିଯାଇଥିବା ଅଭିଯୋଗ କରିଥିବା ବେଳେ କେନାଲରେ ୧୦ଫୁଟର ଘାଇ ସୃଷ୍ଟି ହୋଇଥିବା ଦେଖିବାକୁ ମିଳିଛି । ଚାଷଜମି ଜଳମଗ୍ନ ହେବାରୁ ଚାଷୀ କ୍ଷୟକ୍ଷତିର ଆଶଙ୍କା ପ୍ରକାଶ କରି ତୁରନ୍ତ କେନାଲ ମରାମତି ସହ କ୍ଷତିପୂରଣ ପାଇଁ ଦାବି କରିଛନ୍ତି।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
