ଝାରସୁଗୁଡା: ଆକ୍ସନମୋଡରେ ଝାରସୁଗୁଡା ପୋଲିସ । ଏନକାଉଣ୍ଟରରେ ଆହତ ହୋଇଛି ଦୁର୍ଦ୍ଦାନ୍ତ ଅପରାଧୀ ସୋନୁ ଘୋଷର ଘନିଷ୍ଠ ସହଯୋଗୀ ବିନୋଦ ପ୍ରସାଦ ଓରଫ ଜାଜୁ । ଡାହାଣ ଗୋଡ଼ରେ ବାଜିଛି ଗୁଳି । ଜାଜୁ ନାଁରେ ପ୍ରାୟ 20ରୁ ଅଧିକ ମାମଲା ରହିଥିବାବେଳେ ତା’ ପାଖରୁ ଗୋଟିଏ ବନ୍ଧୁକ ଓ ବାଇକ ଜବତ ହୋଇଛି।
ଶୁକ୍ରବାର ରାତିରେ ଜାଜୁ ବାଇକରେ ବୁଲୁଥିବାବେଳେ ହଠାତ ପୋଲିସକୁ ଦେଖି ଗୁଳି ଚାଳନା କରିଥିଲା । ତାକୁ ଜବାବ ଦେବାକୁ ଯାଇ ଏନକାଉଣ୍ଟର କରିଥିଲା ପୋଲିସ। ଦୁଇ ରାଉଣ୍ଡ ଗୁଳି ଚଳାଇ ଫେରାର ହେବାକୁ ଉଦ୍ୟମ କରିବା ସମୟରେ ପୋଲିସ ଗୁଳିରେ ଆହତ ହୋଇଥିଲା ଜାଜୁ । ତାକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ଜାଜୁ ନାଁରେ ହତ୍ୟା ଉଦ୍ୟମ,ଦାଦାବଟି ଆଦାୟ,ଡକାୟତି, ରାହାଜାନୀ ଭଳି ପ୍ରାୟ 20ରୁ ଅଧିକ ମାମଲା ରହିଛି। ଗତ ଜୁଲାଇରେ ବ୍ରଜରାଜନଗର ବସ ଷ୍ଟାଣ୍ଡରେ ଅମିତ ଧଳ ହତ୍ୟାକାଣ୍ଡ ଘଟଣା ଘଟିବା ପରେ ହତ୍ୟାକାଣ୍ଡର ମାଷ୍ଟରମାଇଣ୍ଡ ସୋନୁ ଘୋଷକୁ ଗିରଫ କରିଥିଲା ପୋଲିସ। ପ୍ରାୟ ମାସେ ପରେ ତାକୁ କୋଲକାତାରୁ ଗିରଫ କରି କୋର୍ଟ ଚାଲାଣ କରିଥିବାବେଳେ ବର୍ତ୍ତମାନ ସେ ଏବେ ଜେଲରେ। ଜିଲ୍ଲାକୁ ଅପରାଧ ମୁକ୍ତ କରିବାକୁ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛି ଝାରସୁଗୁଡା ପୋଲିସ ।
ଝାରସୁଗୁଡାରୁ ରବିନାରାୟଣ ସାହୁ, ଇଟିଭି ଭାରତ
