ଝାରସୁଗୁଡ଼ା: ଜିଲ୍ଳାରେ ଆୟୋଜିତ ହୋଇଛି ଜିଲ୍ଲାସ୍ତରୀୟ ପ୍ରବାସୀ ନିଯୁକ୍ତି ମେଳା । ଝାରସୁଗୁଡ଼ାର ମନମୋହନ ଏମ. ଇ ସ୍କୁଲ ପଡିଆ ଠାରେ ଏହି ନିଯୁକ୍ତି ମେଳା ଆୟୋଜନ କରାଯାଇଛି । ମହାମାରୀ କୋରୋନା ଯୋଗୁଁ ପ୍ରଭାବିତ ହୋଇଛନ୍ତି ପ୍ରବାସୀ ଶ୍ରମିକ । ଲକଡାଉନ ପାଇଁ ନିଜ ଜିଲ୍ଲାକୁ ଫେରି ଆସିଥିବା ଶ୍ରମିକ ରୋଜଗାର ହରାଇଥିବାବେଳେ ବର୍ତ୍ତମାନ ଜିଲ୍ଲାରେ ନିଯୁକ୍ତି ଦେବା ପାଇଁ ପ୍ରୟାସ ଆରମ୍ଭ କରିଛି ଝାରସୁଗୁଡ଼ା ଜିଲ୍ଲା ପ୍ରଶାସନ ।
ଏହି ନିଯୁକ୍ତି ମେଳାରେ ଜିଲ୍ଲାର ବିଭିନ୍ନ ସଂସ୍ଥା ଅଂଶ ଗ୍ରହଣ କରି ପ୍ରବାସୀ ଶ୍ରମିକଙ୍କୁ ନିଯୁକ୍ତି ସୁଯୋଗ ଦେଇଛନ୍ତି । ଏହି କାର୍ଯ୍ୟକ୍ରମକୁ ଜିଲ୍ଲାପାଳ ଉଦଘାଟନ କରିଥିବାବେଳେ ଏଥିରେ ଜିଲ୍ଲା ନିଯୁକ୍ତି ଅଧିକାରୀ ଯୋଗ ଦେଇଥିଲେ ।
ସେପଟେ ପ୍ରବାସୀ ନିଯୁକ୍ତି ମେଳାକୁ ଏକ ପ୍ରହସନ ବୋଲି ରାଜ୍ୟ ବିଜେପି ରାଜ୍ୟ ସଂପାଦକ ଟଙ୍କଧର ତ୍ରିପାଠୀ ଅଭିଯୋଗ କରିଛନ୍ତି। କୋରୋନା ମହାମାରୀ ସମୟରେ ଅନ୍ୟ ରାଜ୍ୟରୁ ଆସିଥିବା ଯେଉଁ ପ୍ରବାସୀ ଶ୍ରମିକ ମାନେ ରେଜିଷ୍ଟ୍ରେସନ ପୂର୍ବରୁ ଓ ପରେ ଆସିଛନ୍ତି ସେହି ଶ୍ରମିକ ମାନେ ଏହି ନିଯୁକ୍ତି ମେଳାରେ ସୁଯୋଗ ନେଇ ପାରିନାହାଁନ୍ତି । ନିଯୁକ୍ତି ଓ ରୋଜଗାରରୁ ବଞ୍ଚିତ ହେଲେ ଏଥିପାଇଁ ରାଜ୍ୟ ସରକାର ଓ ଜିଲାପ୍ରଶାସନ ଦାୟୀ ହେବେ ବୋଲି କହିବା ସହ ଝାରସୁଗୁଡ଼ାରେ ବିଭିନ୍ନ କମ୍ପାନୀ ଓ କୋଇଲା ଖଣି ଥିବା ବେଳେ ସିଧାସଳଖ କମ୍ପାନୀରେ ରୋଜଗାର ସୁଯୋଗ ନଦେଇ କମ୍ପାନୀର ଠିକା ସଂସ୍ଥାରେ ନିଯୁକ୍ତି କରାଉଛନ୍ତି । ଆଗାମୀ ଦିନରେ ଜିଲ୍ଲାର ପ୍ରବାସୀ ଶ୍ରମିକ ଓ ସ୍ଥାନୀୟ ବେକାର ଯୁବକ ଯୁବତୀଙ୍କ ପାଇଁ ଝାରସୁଗୁଡା ଜିଲ୍ଲାରେ ରହିଥିବା କଳ କାରଖାନାରେ ନିଯୁକ୍ତି ର ସୁଯୋଗ ଦେବାକୁ ସେ କହିଛନ୍ତି ।
ଝାରସୁଗୁଡ଼ାରୁ ରବି ନାରାୟଣ ସାହୁ, ଇଟିଭି ଭାରତ
