ଯାଜପୁର: ନା ସେ ଅବଳା ନା ସେ ଦୁର୍ବଳା । ନାରୀ ଭିତରେ ରହିଛି ଅସୀମ ଇଚ୍ଛାଶକ୍ତି । ପାରିଲା ପଣିଆର ନିଦର୍ଶନ । ଯାହା ଅସମ୍ଭବ ବୋଲି କୁହାଯାଏ ତାକୁ ସମ୍ଭବ କରି ଦେଖାଇ ପାରେ ନାରୀ । ଭାଗ୍ୟ ବିଡମ୍ବନାରେ ବି ଭାଙ୍ଗି ପଡେନି ସେ । ସାହସ ଜୁଟାଇ ପରିସ୍ଥିତକୁ ମୁକାବିଲା କରିବାର ଦମ୍ଭ ରଖେ ସେ । ଆଜି ଆମେ ଆପଣଙ୍କୁ ଏପରି ଜଣେ ନାରୀଙ୍କ କଥା କହିବୁ ଯିଏ ସ୍ବାମୀଙ୍କ ପକ୍ଷାଘାତ ରୋଗ ପରେ ପରିବାରର ବୋଝକୁ ଏକାକୀ କାନ୍ଧେଇ ପାଲଟିଛନ୍ତି ସଫଳ ବ୍ୟବସାୟୀ। ଆଉ ଏହି ସଫଳତା ତାଙ୍କୁ ଆଣି ଦେଇଛି ହାତ ତିଆରି ବଡି ।
ଯାଜପୁର ଜିଲ୍ଲା ରସୁଲପୁର ବ୍ଲକ ଅନ୍ତର୍ଗତ ମହେଶ୍ବରପୁର ଗାଁର ସଂଯୁକ୍ତା ଦାସ । ସ୍ବାମୀ ପ୍ରମୋଦ ପକ୍ଷାଘାତରେ ପୀଡିତ ହେବା ପରେ ଦିଗ ହରା ହୋଇଯାଇଥିଲା ସାରା ପରିବାର । ପରିବାର ପ୍ରତିପୋଷଣ କରିବାର କୌଣସି ରାସ୍ତା ବି ନଥିଲା । ହେଲେ ଏପରି ସମୟରେ ହାର ନମାନି ସମସ୍ତ ବାଧା ବିଘ୍ନକୁ ପଛରେ ପକାଇ ନିଜକୁ ସ୍ବାବଲମ୍ବୀ କରିବାକୁ ସଂଯୁକ୍ତା ଆରମ୍ଭ କରିଥିଲେ ପ୍ରୟାସ । ବଡି ବ୍ୟବସାୟ କରି ଆଜି ସେ ନିଜେ ସ୍ବାବଲମ୍ବୀ ହେବା ସହ ପରିବାର ଚଳାଇବାକୁ ସକ୍ଷମ ହୋଇପାରିଛନ୍ତି । ଜଣେ ସଫଳ ବ୍ୟବସାୟୀର ପରିଚୟ ମଧ୍ୟ ସୃଷ୍ଟି କରିପାରିଛନ୍ତି ।
ପ୍ରାରମ୍ଭିକ ପର୍ଯ୍ୟାୟରେ ଘର ଘର ବୁଲି ବିରି ସଂଗ୍ରହ କରି ବଡି ପ୍ରସ୍ତୁତ କରୁଥିଲେ ସଂଯୁକ୍ତା । ଆଉ ଏହି ବଡିକୁ ଆଖପାଖ ଦୋକାନରେ କମ ଦରରେ ବିକି ଘର ସମ୍ଭାଳୁଥିଲେ । ହେଲେ ବଡିର ସ୍ବାଦ ଯୋଗୁଁ ଧିରେ ଧିରେ ବଢିବାରେ ଲାଗିଲା ତାଙ୍କ ବ୍ୟବସାୟ । ଆଉ ଏବେ ମାସକୁ ପ୍ରାୟ 5ରୁ 10 କ୍ବିଣ୍ଟାଲ ବିରିରେ ବଡି ପ୍ରସ୍ତୁତ କରି ଆତ୍ମନିର୍ଭରଶୀଳ ହୋଇପାରିଛନ୍ତି ସେ ।
ସଂଯୁକ୍ତା ଯେ କେବଳ ନିଜେ ସ୍ବାବଲମ୍ବୀ ହୋଇପାରିଛନ୍ତି ତାହା ନୁହେଁ, ବରଂ ପ୍ରାୟ 15 ଜଣ ମହିଳାଙ୍କୁ ଏଥିରେ ନିୟୋଜିତ କରି ସେମାନଙ୍କୁ ମଧ୍ୟ ରୋଜଗାରକ୍ଷମ କରାଇପାରିଛନ୍ତି ସେ । ଖୁବ୍ ଅଳ୍ପ ଦିନ ମଧ୍ୟରେ ସେ କେବଳ ଯାଜପୁର ଜିଲ୍ଲା ନୁହେଁ କେନ୍ଦୁଝର, ଭଦ୍ରକ, କଟକ, କେନ୍ଦ୍ରାପଡା, ଜଗସିଂହପୁର ଆଦି ଜିଲ୍ଲାରେ ମଧ୍ୟ ତାଙ୍କ ବ୍ୟବସାୟର କାୟା ବିସ୍ତାର କରିପାରିଛନ୍ତି । ଏଥିରେ ତାଙ୍କୁ ସହଯୋଗର ହାତ ବଢାଇଛନ୍ତି ଜିଲ୍ଲାର କିଛି ଏନଜିଓ ସଂସ୍ଥା ।
ସମୟର ବିଧି କାହା ପାଇଁ କେବେ କ’ଣ ଯେ ବିପଦ ଆଣେ ତାହା କଳ୍ପନା କରିବା ଅସମ୍ଭବ । ହେଲେ ଏପରି ସ୍ଥିତିରେ ଭାଙ୍ଗି ନପଡି ନିଜ ଗୋଡରେ ଛିଡା ହୋଇ ପରିବାରର ଆର୍ଥିକ ମେରୁଦଣ୍ଡ ସଳଖିବାରେ ସଂଯୁକ୍ତାଙ୍କ ସଂଘର୍ଷ ପ୍ରଶଂସନୀୟ ।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
