ଢେଙ୍କାନାଳ: ଜିଲ୍ଲାରେ ହାତୀ ଉପଦ୍ରବକୁ ନେଇ ବିକ୍ଷୋଭ । ଢେଙ୍କାନାଳ ଜିଲ୍ଲା ମହାବିରାଡି ବନାଞ୍ଚଳର ହାତୀପଲ 3ଜଣଙ୍କୁ ଆକ୍ରମଣ କରିଥିବାରୁ ସ୍ଥାନୀୟ ଲୋକେ କଟାବାହାଳ ଛକ ରାସ୍ତା ଅବରୋଧ କରିଛନ୍ତି । ସ୍ଥାନୀୟ ରେଞ୍ଜର ଆସି ଲୋକଙ୍କୁ ବୁଝାସୁଝା କରିବା ସହ ହାତୀମାନଙ୍କୁ ନିୟନ୍ତ୍ରଣରେ ରଖିବା ଓ ଲୋକଙ୍କୁ ସୁରକ୍ଷା ଦେବା ଦିଗରେ ଗୁରୁତ୍ବ ଦିଆଯିବ ବୋଲି ପ୍ରତିଶ୍ରୁତି ଦେବାପରେ ଆନ୍ଦୋଳନ ହଟିଛି ।
ସୂଚନା ଅନୁଯାୟୀ, ଆଜି(ଶନିବାର) ସକାଳେ ଢେଙ୍କାନାଳ ଜିଲ୍ଲା ମହାବିରାଡି ବନାଞ୍ଚଳର କିଛି ହାତୀପଲ ପରଜଙ୍ଗ ସାଆନ୍ଦା ପୂର୍ତ୍ତ ବିଭାଗ ରାସ୍ତାରେ ଯାଉଥିବା ୩ଜଣ ଯାତ୍ରୀଙ୍କୁ ଆକ୍ରମଣ କରିଛନ୍ତି । ସ୍ଥାନୀୟ ଲୋକେ ସେମାନଙ୍କୁ ହାତୀପଲଙ୍କ କବଳରୁ ଉଦ୍ଧାର କରି ପ୍ରଥମେ ପରଜଙ୍ଗ ଡାକ୍ତରଖାନାରେ ଭର୍ତ୍ତି କରିଥିଲେ । ମାତ୍ର ସେମାନଙ୍କ ଅବସ୍ଥା ସଙ୍କଟାପନ୍ନ ଥିବାରୁ ପରେ ସେମାନଙ୍କୁ ଢେଙ୍କାନାଳ ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ଗୁରୁତରମାନେ ପରଜଙ୍ଗ ଥାନା ଅନ୍ତର୍ଗତ କଟାବାହଳ ଗ୍ରାମର ବିଶ୍ୱନାଥ ପ୍ରଧାନ, ବାଇଗିଣିଆ ଗ୍ରାମର ସରୋଜ ଭୋଇ ଓ କାର୍ତ୍ତିକ ଭୋଇ ବୋଲି ଜଣାପଡିଛି । ଏମାନେ ବାଇକରେ ଯାଉଥିବାବେଳେ କଟାବାହାଳ ନିକଟରେ ହାତୀ ପଲଙ୍କ ହାବୁଡ଼ରେ ପଡିଯାଇଥିଲେ ।
ତେବେ ଏନେଇ ସ୍ଥାନୀୟ ଲୋକେ ଉତ୍ୟକ୍ତ ହୋଇ କାଟାବାହାଳ ଛକ ଅବରୋଧ କରିଥିଲେ । ଯାତାୟତ ବାଧାପ୍ରାପ୍ତ ହେବାରୁ ସ୍ଥାନୀୟ ରେଞ୍ଜର ଆସି ଲୋକଙ୍କୁ ବୁଝାସୁଝା କରିଛନ୍ତି । ଏଥିସହ ବନାଞ୍ଚଳର ହାତୀଙ୍କୁ ନିୟନ୍ତ୍ରଣରେ ରଖିବା ଓ ଲୋକଙ୍କୁ ସୁରକ୍ଷା ଦେବା ଦିଗର ପ୍ରତିଶ୍ରୁତି ଦେବା ପରେ ରାସ୍ତାରୋକ ହଟିଛି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
