ଦେବଗଡ: ଅସ୍ବାଭାବିକ ଭାବେ ବଢ଼ିବାରେ ଲାଗିଛି ପେଟର ଆକାର । ଅଜଣା ରୋଗ ଯନ୍ତ୍ରଣାରେ ଛଟପଟ ହେଉଛନ୍ତି ଜଣେ ଅସହାୟ ବିଧବା ବୃଦ୍ଧା । ଚିକିତ୍ସା ପାଇଁ ବାଧକ ସାଜିଛି ଅର୍ଥ । ଅର୍ଥାଭାବରୁ ଚିକିତ୍ସା କରାଇ ନପାରି ଦୀର୍ଘ ଚାରିବର୍ଷ ହେଲା ଅସହ୍ୟ ରୋଗ ଯନ୍ତ୍ରଣା ଭୋଗୁଛନ୍ତି ଦେବଗଡ଼ ଜିଲ୍ଲା ତିଳେଇବଣି ବ୍ଲକ ବଡାଛପଲ ପଞ୍ଚାୟତ ଅଧିନସ୍ଥ ବିଛଣାପୁର ଗାଁର 65 ବର୍ଷୀୟା ବିଧବା ବୃଦ୍ଧା ସୁମତି ସାହୁ ।
ବିଛଣାପୁର ଗାଁରେ ରହୁଥିବା ସୁମତିଙ୍କ ବୟସ ପାଖାପାଖି 65 ହେବ । ସ୍ବାମୀ ଗୌତମ ସାହୁଙ୍କ ଦୀର୍ଘ ଦଶବର୍ଷ ହେବ ଦେହାନ୍ତ ହୋଇ ସାରିଛି । ପରିବାର କହିଲେ ପାଖରେ ଅଛନ୍ତି କେବଳ ଜଣେମାତ୍ର 17 ବର୍ଷୀୟା ଝିଅ ଆଶାଲତା ।
ପରିବାର ପ୍ରତିପୋଷଣ କରିବା ସହିତ ଝିଅ ଆଶାଲତାକୁ ପାଠ ପଢ଼ାଇ ମଣିଷ କରିବା ପାଇଁ ବୃଦ୍ଧା ଜଣକ ପରଘରେ ମୂଲ ମଜୁରୀ କରି ଦୁଇପାଇସା ରୋଜଗାର କରି ଆସୁଥିଲେ । ମାତ୍ର ଆଜକୁ ଦୀର୍ଘ ଚାରିବର୍ଷ ହେଲା ଏକ ଅଜଣା ରୋଗର ଶିକାର ହୋଇ ବଞ୍ଚିବାକୁ ସଂଗ୍ରାମ କରୁଛନ୍ତି ସୁମତି । ଅସ୍ବାଭାବିକ ଭାବେ ବଢ଼ିବାରେ ଲାଗିଛି ପେଟର ଆକାର । ପେଟ ବଢ଼ିବା ସହିତ ଯନ୍ତ୍ରଣା ମଧ୍ୟ ଅସହ୍ୟ ହେବାରେ ଲାଗିଛି । ଫଳରେ ସୁମତି ଆଉ ଚଳପ୍ରଚଳ କିମ୍ବା କାମଧନ୍ଦା କରିନପାରି ଚାରିବର୍ଷ ହେବ ଶଯ୍ୟାଶାୟୀ ହୋଇଛନ୍ତି । ଉତ୍କଟ ଦାରିଦ୍ର୍ୟ ଓ ଅର୍ଥାଭାବ କାରଣରୁ ଚିକିତ୍ସା କରାଇବା ସମ୍ଭବ ହେଉନାହିଁ । ତେଣୁ ଭାଗ୍ୟକୁ ଆଦରି ବିଛଣା ଉପରେ ପଡିରହିଛନ୍ତି ଅସହାୟ ବୃଦ୍ଧା ଜଣକ ।
ଅନ୍ୟପକ୍ଷରେ, ମା'ଙ୍କ ସେବା କରିବା ଓ ପରିବାର ଚଳାଇବା କଷ୍ଟକର ହେବାରୁ କଲେଜରେ ଯୁକ୍ତ ଦୁଇ ପାଠ ପଢ଼ୁଥିବା ଝିଅ ଆଶାଲତା ଅଧରୁ ପାଠ ଛାଡି ଆସି ପରଘରେ ମୂଲ ମଜୁରୀ ଲାଗି ପରିବାର ପ୍ରତିପୋଷଣ କରୁଛନ୍ତି । ଯେଉଁ କାରଣରୁ ପାଠପଢିବା ସ୍ବପ୍ନ ଧୂଳିସାତ ହୋଇଯାଇଛି । ତେବେ ଅର୍ଥାଭାବ ଯୋଗୁଁ ମା'ର ଚିକିତ୍ସା କରାଇବା ଓ ଅଧିକ ପାଠ ପଢିବା ସମ୍ଭବ ହେଉନଥିବା କହନ୍ତି ଆଶାଲତା ।
ବିଛଣାପୁର ଗାଁରେ ବସବାସ କରୁଥିବା ଅସହାୟ ବୃଦ୍ଧା ସୁମତି ସାହୁଙ୍କ ଅବସ୍ଥା ଚିକିତ୍ସା ଅଭାବରୁ ଦିନକୁଦିନ ବିଗିଡିବାରେ ଲାଗିଛି । ଏହାକୁ ନେଇ ଗ୍ରାମବାସୀ ମଧ୍ୟ ଚିନ୍ତାପ୍ରକଟ କରିଛନ୍ତି । ତେବେ ସୁମତିଙ୍କ ଚିକିତ୍ସା ପାଇଁ ସରକାର ଯଦି କିଛି ଆର୍ଥିକ ସହାୟତା କରନ୍ତି ତାହେଲେ ରୋଗ ଯନ୍ତ୍ରଣାରେ ଦୀର୍ଘ ସମୟ ଧରି ଛଟପଟ ହେଉଥିବା ସୁମତି ଆରୋଗ୍ୟ ଲାଭ କରିପାରନ୍ତେ ବୋଲି ଗ୍ରାମବାସୀ ଆଶାବାଦୀ ଅଛନ୍ତି ।
ଆର୍ଥିକ ଅନଗ୍ରସର ଓ ଅସହାୟ ରୋଗଗ୍ରସ୍ତଙ୍କୁ ଚିକିତ୍ସା ସହାୟତା ଯୋଗାଇ ଏକ ସୁସ୍ଥ ସମାଜ ଗଠନ କରିବା ପାଇଁ ସରକାର ବିଭିନ୍ନ ଯୋଜନା କାର୍ଯ୍ୟକାରୀ କରି ଆସୁଛନ୍ତି । ବିଶେଷକରି ଅସହାୟଙ୍କୁ ଚିକିତ୍ସା ସହାୟତା ଯୋଗାଇ ଦେବାପାଇଁ ଜିଲ୍ଲାପାଳ ଓ ମୁଖ୍ୟମନ୍ତ୍ରୀଙ୍କ ସ୍ବତନ୍ତ୍ର ରିଲିଫ ପାଣ୍ଠି ରହିଛି । ତେବେ ବିଛଣାପୁର ଗାଁରେ ଦୀର୍ଘବର୍ଷ ହେଲା ଅଜଣା ରୋଗରେ ଆକ୍ରାନ୍ତ ହୋଇ ପ୍ରତି ମୁହୁର୍ତ୍ତରେ ମୃତ୍ୟୁକୁ ସାମ୍ନା କରୁଥିବା ଅସହାୟ ବିଧବା ବୃଦ୍ଧା ସୁମତି ସାହୁଙ୍କ ପ୍ରତି ସରକାର ଓ ଜିଲ୍ଲା ପ୍ରଶାସନର କେବେ କୃପାଦୃଷ୍ଟି ପଡୁଛି । ତାହା ଦେଖିବାକୁ ବାକି ରହିଲା ।
ଦେବଗଡରୁ ସରୋଜ କୁମାର ଶତପଥୀ, ଇଟିଭି ଭାରତ
