ବୌଦ୍ଧ : ବନ୍ୟଜନ୍ତୁଙ୍କ ପାଇଁ ବର୍ତ୍ତମାନ ଅସୁରକ୍ଷିତ ବିଭିନ୍ନ ଜଙ୍ଗଲ । ମାଫିଆମାନେ ବନ୍ୟଜନ୍ତୁଙ୍କ ଶିକାର ପାଇଁ ଜାଲ ବିଛାଇ ରଖିଛନ୍ତି । ଜାତୀୟ ଐତିହ୍ୟ ପ୍ରାଣୀ ହାତୀ ଶିକାର ଘଟଣା ବର୍ତ୍ତମାନ ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି । ବୌଦ୍ଧ ବନଖଣ୍ଡର ସଦର ରେଞ୍ଜ ଅନ୍ତର୍ଗତ ଭୁର୍କିପଡା ଓ ବେରେଡାବାରି ଜଙ୍ଗଲରେ ଦୁଇ ଦିନରେ ଦୁଇ ଦୁଇଟି ଦନ୍ତାହାତୀଙ୍କ ଗଳିତ ମୃତ ଶରୀର ଉଦ୍ଧାର ହୋଇଥିବାବେଳେ ଦୁଇ ହାତୀର ଦାନ୍ତକୁ ଦୁର୍ବୃତ୍ତ ମାନେ କାଟି ନେଇଛନ୍ତି ।
ଏନେଇ ବନ ବିଭାଗର ଭୂମିକା ସନ୍ଦେହ ଘେରରେ ରହିବା ସହିତ କର୍ମଚାରୀଙ୍କ କାର୍ଯ୍ୟ ଦକ୍ଷତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏହି ଘଟଣା ପଛରେ ଗତ ୨୦୧୬ ମସିହାରେ ହାତୀ ଦାନ୍ତ ଲୁଟରେ ସାମିଲ ଆନ୍ତରାଜ୍ୟ ମାଫିଆମାନେ ପୁଣିଥରେ ସକ୍ରିୟ ହୋଇ ଉଠିଥିବା ସନ୍ଦେହ ଦୃଢିଭୂତ ହେବାରେ ଲାଗିଛି ।
ଦୁଇଟି ଦନ୍ତାହାତୀ ଶିକାର ଘଟଣାରେ ଜଙ୍ଗଲ ବିଭାଗ ତିନି ଜଣ ଜଙ୍ଗଲ କର୍ମଚାରୀଙ୍କ ସମେତ ଶିକାର ସହିତ ସମ୍ପୃକ୍ତି ଅଭିଯୋଗରେ ବଘିଆପଡା ବିଟ ଅଞ୍ଚଳର ତିନି ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଯାହାକୁ ଅଞ୍ଚଳବାସୀ ବିରୋଧ କରିବା ସହିତ ପ୍ରକୃତ ଅପରାଧୀକୁ ଧରିବା ଦାବିରେ ବିକ୍ଷୋଭ ଓ ରାଜରାସ୍ତା ଅବରୋଧ କରିଥିଲେ ।
ତେବେ ଜିଲ୍ଲାରେ ବାରମ୍ବାର ବନ୍ୟଜନ୍ତୁଙ୍କ ଶିକାର ଓ ଅଙ୍ଗ ତସ୍କରୀ ହେଉଥିବା ତଥା ଏହାର ଏକ ବିରାଟ ରାକେଟ କାର୍ଯ୍ୟ କରୁଥିବାରୁ ଏହାର କ୍ରାଇମବ୍ରାଞ୍ଚ ତଦନ୍ତ କରାଗଲେ ଅନେକ ତଥ୍ୟ ପଦାକୁ ଆସିପାରିବ ବୋଲି ଚର୍ଚ୍ଚା ହେଉଛି ।
ଇଟିଭି ଭାରତ, ବୌଦ୍ଧ
