ବରଗଡ଼: ଜିଲ୍ଲାର ଚାଷୀଙ୍କ ପିଛା ଛାଡୁନାହିଁ ସମସ୍ୟା । ଚାଷକାମ ଆରମ୍ଭରୁ ସମସ୍ୟା ଘେରରେ ରହିଥିବା ଚାଷୀ ମୁକୁଳି ପାରୁନାହିଁ ମଣିଷକୃତ ସମସ୍ୟା ଭିତରୁ। ଫସଲବୀମା ପାଇଁ ପ୍ରିମିୟମ ପଇଠ କରିଥିଲେ ଶୁଦ୍ଧା ଚାଷୀକୁ ମିଳୁନାହିଁ ଫସଲର କ୍ଷତିପୂରଣ ।
ତେବେ ବରଗଡ଼ ଜିଲ୍ଲାର ଚାଷୀଙ୍କୁ ଫସଲ ବୀମା ନାଁରେ ଠକି ଚାଲିଛନ୍ତି ସମସ୍ତେ । ବିମା କମ୍ପାନୀ ମାନେ ଫସଲବୀମା ପ୍ରିମିୟମ ସଂଗ୍ରହ କରିଦେଲାପରେ ଆଉ ଧରାଛୁଆଁ ଦେଉନାହାନ୍ତି । ଫସଲ କ୍ଷତି ହେଲେ କ୍ଷତିପୂରଣ ପାଇବାକୁ ବର୍ଷ ବର୍ଷ ବିତିଯାଉଛି ତଥାପି ମଧ୍ୟ ଚାଷୀ ପାଇପାରୁନାହିଁ କ୍ଷତିପୂରଣ। ଭଟଲି ବ୍ଲକ ଅନ୍ତର୍ଗତ ଖରମୁଣ୍ଡା ପଞ୍ଚାୟତ ର ତରାକନା ଗ୍ରାମର ବହୁ ଚାଷୀ ଗତ ଖରିଫ ଚାଷର କ୍ଷତିପୂରଣ ପାଇନଥିବା ଅଭିଯୋଗ ନେଇ ଆଜି ଜିଲ୍ଲାପାଳଙ୍କ ନିକଟକୁ ଆସିଥିଲେ ।
ଖବର ଅନୁଯାୟୀ, ତରାକନା ଗ୍ରାମରେ ୪୦୦ ରୁ ଅଧିକ ଏକର ଧାନ ଚାଷ କରାଯାଉଥିବା ବେଳେ ଗତ ୨୦୧୮ ମସିହା ଖରିବ ଫସଲରେ ହୋଇଥିବା ଚକଡାମାଡ଼ ଯୋଗୁଁ ଅଧିକାଂଶ ଚାଷୀଙ୍କ ଫସଲ ନଷ୍ଟ ହୋଇଯାଇଥିଲା । ସେ ସମୟରେ ଓରିଏଣ୍ଟ ଫସଲବୀମା କମ୍ପାନୀ ଓ ସମସ୍ତ ସରକାରୀ ଅଧିକାରୀ କ୍ଷତିର ଆକଳନ କରି ୪୫% କ୍ଷତି ହୋଇଥିବା ଦର୍ଶାଇଥିଲେ ମଧ୍ୟ କ୍ଷତିପୂରଣ ଆଜି ଯାଏଁ ମିଳିନଥିବା ଅଭିଯୋଗ ହୋଇଛି ।
ତେବେ ବରଗଡ଼ କୃଷି ବିଭାଗ, ବିମା କମ୍ପାନୀ ନିକଟକୁ ତରାକନା ଗ୍ରାମର କୌଣସି କ୍ଷତିର ତଥ୍ୟ ଦେଇନଥିବାରୁ ସେଠାକାର ଚାଷୀଙ୍କୁ କ୍ଷତିପୂରଣ ଦିଆଯାଇନଥିବା ଅଭିଯୋଗ ହୋଇଛି । ଏପଟେ କେଉଁ କାରଣରୁ କୃଷିବିଭାଗ ଏପରି ଫାଇଲ ଦବାଇ ରଖିଛି ତାହା କୃଷିବିଭାଗର କାର୍ଯ୍ୟକଳାପ ଉପରେ ସନ୍ଦେହ ସୃଷ୍ଟି କରିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
