ବାଲେଶ୍ବର: ଦଇବର ନିଷ୍ପତ୍ତି ଆଗରେ ଆଜି ହାରିଯାଇଛି ଜଣେ ମା । ଏକା ସାଙ୍ଗରେ ପୋଛି ହୋଇଯାଇଛି ମଥାର ସିନ୍ଦୁର ଓ ଖାଲି ହୋଇଛି ମମତାର କୋଳ । ପୁଅକୁ ଛାତି ବାଡେଇ ଯେତେ ଡାକିଲେ ବି ସେ ଆଉ ଶୁଣୁନି । ଏପଟେ ସ୍ବାମୀ ବି ପୁଅ ସାଙ୍ଗରେ ଚାଲି ଯାଇଛନ୍ତି ଆରପାରିକୁ । ଗାଁ ମଶାଣିରେ ଜଳୁଛି ବାପା ପୁଅଙ୍କ ଜୁଇ, ଏପଟେ କାନ୍ଦ ବୋବାଳିରେ ଫାଟି ପଡୁଛି ପୁରା ଗାଁ । ଏମିତି ହୃଦୟ ବିଦାରକ ଘଟଣା ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ବାଲିଆପାଳ ବ୍ଲକ ଆରୁଆଦମ ଗାଁରେ ।
ସୂଚନାଥାଉକି ମଙ୍ଗଳବାର ଗାଁର କାଶୀନାଥ ରାଉତ ଓ ପୁଅ ରାମକୃଷ୍ଣ ପାନ ବରଜରେ ପାଣି ମଡ଼ାଇବାକୁ ଯାଇଥିବା ବେଳେ ବିଦ୍ୟୁତ ଆଘାତର ଶିକାର ହୋଇ ଦୁଇଜଣ ଯାକ ପ୍ରାଣ ହରାଇଥିଲେ । ଅନ୍ୟପଟେ ଘରର ସାନପୁଅ ବିଦେଶକୁ ଦାଦନ ଖଟିବାକୁ ଯାଇ ସେ ମଧ୍ୟ ଲକଡାଉନ ଯୋଗୁଁ ଫସି ରହିଥିଲା । ଏକାସାଙ୍ଗରେ ବାପା ପୁଅଙ୍କ ଜୁଇ ଜଳିବାକୁ ନେଇ କିଏ ବା ସମ୍ଭାଳି ପାରିବ ଦୁଃଖ । ପୁରା ଗାଁ ଆଜି ଏହି ପରିବାର ପାଇଁ କାନ୍ଦୁଥିବା ଦେଖିବାକୁ ମିଳିଛି । ଜଣେ ଅସହାୟ ମା ର କାନ୍ଦରେ ଆଜି ଫାଟି ପଡୁଛି ପୁରା ପରିବେଶ । ଗାଁ ମଶାଣି ଆଜି କୋଳେଇ ନେଇଛି ମାର ମମତା ଆଉ ମଥାର ସିନ୍ଦୁର । ସତରେ ଏମିତି ଦୁଃଖ ଆଉ କାହାକୁ ନମିଳୁ । ଏହି ଘଟଣା ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ
