ଅନୁଗୋଳ: ମେଲାଣି ନେଉଛନ୍ତି ମା' । ଯେମିତି ଝିଅକୁ ବିଦାବେଳେ ସମସ୍ତେ ବନ୍ଦାପନା କରନ୍ତି ଠିକ ସେମିତି ଦୁର୍ଗା ମା'ଙ୍କୁ ବିଦାୟ ଦେବା ପୂର୍ବରୁ ସିନ୍ଦୂର ବୋଳିବା ସହ ମେଲାଣି ଦେଇଛନ୍ତି ମହିଳାମାନେ ।
ମଣ୍ଡପରେ ମା' ଦୁର୍ଗାଙ୍କୁ ଚାରିଦିନ ପୂଜା କରିବା ପରେ ଆଜି ମେଲାଣି ଦେଉଛନ୍ତି ସମସ୍ତେ । ଅନୁଗୋଳ ସହରର ସମସ୍ତ ପୂଜା ମଣ୍ଡପରେ ମେଲାଣି ପୂର୍ବରୁ ବଙ୍ଗୀୟ ମହିଳାମାନେ ମା'ଙ୍କ ନିକଟରେ ପୂଜାର୍ଚ୍ଚନା କରିଛନ୍ତି । ଠିକ ଯେଭଳି ଝିଅଟିଏ ବିବାହ ପରେ ବାପ ଘରୁ ବିଦାୟ ନେବା ବେଳେ ତାକୁ ବନ୍ଦାପନା କରାଯାଏ ଠିକ ସେଭଳି ମା' ଦୁର୍ଗାଙ୍କୁ ବନ୍ଦାପନା କରିଥିଲେ ମହିଳାମାନେ । ମା'ଙ୍କ ନିକଟରେ ସିନ୍ଦୂର ପୂଜା କରିବା ପରେ ପରସ୍ପରକୁ ସିନ୍ଦୂର ଲଗାଇଥିଲେ । ନିଜ ପରିବାରର ଶୁଭ ମନାସି ସଧବାମାନେ ଖେଳିଥିଲେ ସିନ୍ଦୂରର ଖେଳ । ଅନୁଗୋଳ ସହରର ସମସ୍ତ ମଣ୍ଡପରେ ଦେଖିବାକୁ ମିଳିଥିଲା ବଙ୍ଗୀୟ ମହିଳାଙ୍କ ସିନ୍ଦୂର ଖେଳ।
କୋଭିଡ କଟକଣା ପାଇଁ ଏଥର କମ ସଂଖ୍ୟକ ମହିଳା ମା'ଙ୍କୁ ବନ୍ଦାପନା ପାଇଁ ଆସିଥିଲେ । ମନରେ କୋହଭରି ମା'ଙ୍କୁ ମେଲାଣି ଦେଇଥିଲେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
