ଟୋକିଓ: Tokyo Olympics ର ଷଷ୍ଠ ଦିନରେ ଭାରତୀୟ ଦଳର ମିଶ୍ରିତ ଫଳାଫଳ ରହିଛି । କିଛି ଇଭେଣ୍ଟରେ ନିରାଶା ମିଳିଥିବା ବେଳେ ଅନ୍ୟ କିଛି ଇଭେଣ୍ଟରେ ପୁଣି ଥରେ ଦେଶବାସୀଙ୍କ ମନରେ ପଦକର ଆଶା ଭିଛନ୍ତି ଆଥଲେଟ । ମୁଷ୍ଟିଯୋଦ୍ଧା ପୂଜା ରାନୀ, ଷ୍ଟାର ଶଟଲର ପିଭି ସିନ୍ଧୁ, ତୀରନ୍ଦାଜ ଦୀପିକା କୁମାରୀ ବୁଧବାର ନିଜ ନିଜ ଇଭେଣ୍ଟରେ ବିଜୟ ହାସଲ କରିଛନ୍ତି ।
ତେବେ ଜାଣନ୍ତୁ ବୁଧବାର କଣ ଥିଲା ଭାରତର କାର୍ଯ୍ୟସୂଚୀ, ଆଉ କେମିତି ଥିଲା ଆଥଲେଟଙ୍କ ପ୍ରଦର୍ଶନ:-
ବକ୍ସିଂ: ଇଚରାକ ଚାଇବଙ୍କୁ ପ୍ରଥମ ରାଉଣ୍ଡରେ ୫.୦ ରେ ପରାସ୍ତ କଲେ ବକ୍ସର ପୂଜାରାନୀ । କ୍ବାର୍ଟର ଫାଇନାଲ ପାଇଁ କଲେ ଯୋଗ୍ୟତା ହାସଲ ।
ତୀରନ୍ଦାଜୀ: ଦୀପିକା କୁମରୀ ଭୁଟାନର କର୍ମାଙ୍କୁ ୬-୦ ସେଟ୍ରେ କଲେ ପରାସ୍ତ ଏବଂ ଦ୍ବିତୀୟ ରାଉଣ୍ଡରେ ଆମେରିକାର ତୀରନ୍ଦାଜଙ୍କୁ ପରାଜିତ କରି ପ୍ରି-କ୍ବାର୍ଟର ଫାଇନାଲକୁ ହେଲେ ଉତିର୍ଣ୍ଣ ।
ତୀରନ୍ଦାଜୀ: ପ୍ରବୀଣ ଯାଦଭ ପ୍ରଥମ ରାଉଣ୍ଡରେ ବିଶ୍ବର ନମ୍ବର ଦୁଇ ଗଲସନ ବାଜାରଝାପୋଭଙ୍କୁ ପରାସ୍ତ କରିଥିଲେ କିନ୍ତୁ ପରବର୍ତ୍ତୀ ପର୍ଯ୍ୟାୟରେ ବିଶ୍ବର ଏକ ନମ୍ବର ବ୍ରାଡି ଏଲିସନଙ୍କ ଠାରୁ ପରାଜିତ ହୋଇଥିଲେ ।
ତୀରନ୍ଦାଜୀ: ତରୁଣଦୀପ ରାୟ ପ୍ରଥମ ପର୍ଯ୍ୟାୟରେ ଓଲେକ୍ସି ହୁନବିନଙ୍କୁ ୬-୪ ସେଟ୍ରେ ପରାସ୍ତ କରିଥିବା ବେଳେ ଦ୍ବିତୀୟ ପର୍ଯ୍ୟାୟରେ ଇଟେ ଶାନିଙ୍କ ଠାରୁ ୬-୪ ସେଟରେ ପରାସ୍ତ ହୋଇଛନ୍ତି ।
ବ୍ୟାଡମିଣ୍ଟନ: ପିଭି ସିନ୍ଧୁ ଗାନ ୟି ଚେଉଙ୍ଗଙ୍କୁ ୨୧-୯, ୨୧-୧୬ ସେଟରେ ପରାସ୍ତ କରି ପ୍ରି-କ୍ବାର୍ଟର ଫାଇନାଲ ପାଇଁ ଯୋଗ୍ୟତା ଅର୍ଜନ କରିଛନ୍ତି ।
ବ୍ୟାଡମିଣ୍ଟନ: ସେପଟେ ପୁରୁଷ ବର୍ଗରେ ସାଇ ପ୍ରଣୀତ ମାର୍କ କାଲଜୋଉଙ୍କ ଠାରୁ ୧୪-୨୧, ୧୪-୨୧ ରେ ପରାଜିତ ହୋଇ ନିଜର ଅଲମ୍ପିକ ଯାତ୍ରା ଶେଷ କରିଛନ୍ତି ।
ମହିଳା ହକି: ଗ୍ରେଟ ବ୍ରିଟେନ ଠାରୁ ୧-୪ ଗୋଲରେ ପରାସ୍ତ ହେଲା ଭାରତୀୟ ମହିଳା ହକି ଦଳ ।
ରୋଇଂ: ଅର୍ଜୁନ ଲାଲ ଜଟ ଓ ଅରବିନ୍ଦ ସିଂହ ଲାଇଟ ୱେଟ ଡବଲ୍ସ ସ୍କଲ ଇଭେଣ୍ଟରେ ଷଷ୍ଠ ସ୍ଥାନରେ ରହି ମେଡାଲ ଦୌଡରୁ ବାଦ ପଡ଼ିଛନ୍ତି । ରୋଇଂରେ ପ୍ରଥମ ଥର ପାଇଁ ଭାରତ ସେମି ଫାଇନାଲରେ ପହଁଞ୍ଚିଥିଲା ।
ନୌଚାଳନା: କେସି ଗଣପତି/ ବରୁଣ ଠକ୍କର ୪ଟି ରେସ ପରେ ୧୯ ଟିମ ମଧ୍ୟରେ ୧୮ ସ୍ଥାନରେ ରହିଛନ୍ତି । ଆଉ ୮ଟି ରେସ ବାକି ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
