ମୁମ୍ବାଇ: ଲୋକପ୍ରିୟ ଅଭିନେତା ଋଷି କପୁର ଦୀର୍ଘ ସମୟରୁ ନ୍ୟୁୟର୍କରେ ନିଜର ଚିକିତ୍ସା ପାଇଁ ଅଛନ୍ତି । ସେ ଧିରେ ଧିରେ ସୁସ୍ଥ ହେବାରେ ଲାଗିଛନ୍ତି ବୋଲି ତାଙ୍କ ସମ୍ପର୍କୀୟଙ୍କ ଠାରୁ ଶୁଣିବାକୁ ମିଳୁଛି । ଏହାସହ ଋଶି ମଧ୍ୟ ନିକଟରେ କହିଥିଲେ ଯେ ସେ ନିଜର ଜନ୍ମଦିନ ଭାରତରେ ପାଳନ କରିବାକୁ ଚାହୁଁଛନ୍ତି ।
ଇତିମଧ୍ୟରେ ତାଙ୍କ ଫ୍ୟାନ୍ସଙ୍କ ପାଇଁ ଖୁସି ଖବର ସାମ୍ନାକୁ ଆସିଛି । ତାଙ୍କ ଆଗାମୀ ଫିଲ୍ମ 'ଝୁଠା କହିଁ କା'ର ଫାଷ୍ଟ ଲୁକ ପୋଷ୍ଟର ଜାରି ହୋଇଯାଇଛି ।
ସମୀପ କାଙ୍ଗଙ୍କ ନିର୍ଦ୍ଦେଶନାରେ ତିଆର ହେଉଥିବା ଫିଲ୍ମ 'ଝୁଠା କହିଁ କା'ର ନିର୍ମାତା ଫିଲ୍ମର ଫାଷ୍ଟଲୁକ ପୋଷ୍ଟର ରିଲିଜ କରିଦେଇଛନ୍ତି । ଫିଲ୍ମରେ ଋଷିଙ୍କ ସହ ଓମକାର କପୁର, ସନି ସିଂହ, ଜିମି ସେରଗିଲ, ଲିଲିତ ଦୁବେ ଓ ମନୋଜ ଯୋଶୀ ଭଳି କଳାକାର ନଜର ଆସିବେ ।
ପୋଷ୍ଟରେ ଫିଲ୍ମର ରିଲିଜ ତାରିଖ ମଧ୍ୟ ଘୋଷଣା ହୋଇଛି । ଫିଲ୍ମଟି ଜୁଲାଇ 19ରେ ରିଲିଜ ହେବାକୁ ଯାଉଛି । ପ୍ରକାଶ ଥାଉକି ଋଷି ସେପ୍ଟେମ୍ବରରେ ଭାରତ ଫେରିବେ ବୋଲି ଆଶା କରାଯାଉଛି । ଅନ୍ୟପଟେ ସେ ଭାରତ ଫେରିବା ପୂର୍ବରୁ ହିଁ ତାଙ୍କ ଫ୍ୟାନ୍ସ ତାଙ୍କୁ ସ୍କ୍ରିନରେ ଦେଖିବାକୁ ପାଇବେ । ଯାହାକୁ ନେଇ ଖୁବ୍ ଉତ୍ସାହିତ ଫ୍ୟାନ୍ସ ।
